4
1 Umpanga, bantu batulole anga bakiti ba Kristo nu balangi ba twinda twa bulili bwa Kalaga. 2 Tondo, lingo bwatunganana ku balangi, buno na muntu na muntu abe mukatizia walinda. 3 Tondo ta kitondo kinene kundi kusungibwa n'inyuwe, aba kusungibwa na bantu. Nsikwisungia nnenyene, 4 kubuno nsili na mpipi ku mutima wane, tondo kitondo kikino takinanisanania, tondo wozo ukunsungia u Mukota Kalaga. 5 Umpanga tamusese mulondo wampa nu nkungu zago tazika, lwabusio lwa kuvwa kwa Mukota, ukasania kyengi ku binsania byabisilwe mu kapilo, nu ukalolesia nango za mitima bwasibwasi. Ububo na muntu na muntu akamona luganuno lwamutananina ku Kalaga. Paulo Akubalolesia Bubakubenga Basingwa
6 Mibuto zane, ku kabamba keinyu, nakitile bitondo bibino, buno nne nu Apolo, tube kalolesio kumuli; tumwigisie kutasuluka byasanzilwe buno muntu wampa kumuli nteikotie ku muntu umozi nu kusomba ungo. 7 Umpanga nazi wakubumbile kuba bwebwe na ungo muntu? Nu uwe uli na kikizi kyutakasilwe? Nu ndi wakikasilwe, kubuni kuukwiganuna anga buno ntwakasilwekyo?
8 Mwasila kwikuta kalazi, nu museli bagumi nu mwangata kalazi anga bakota ga tuteli: nu tukutunda nunse mwangate buno nu iswe twangate gamozi n'inyu. 9 Kubuno, nkukengela buno Kalaga atubikile beiswe basingwa buno tukegibwe ku bansania anga bantu bakusungibwa buno beitwe lwabusio lwa bantu; kubuno tuseli tulolesio ku kisi, ku banzelo nu ku bantu. 10 Iswe tuli bikongolo ku kabamba ka Kristo, tondo inyuwe muli na menge mu Kristo. Iswe tukutamba, tondo inyuwe muli na magala; inyuwe mukuganunwa, tondo iswe tukubengwa. 11 Aaba nu nkungu zeno, tuli na nzala, nu mpusia, nu tuli na bwela, tukulibulwa ngizi nu tukwenda nako nako geteli kuba na biziki bya kwikala; 12 lingo tukukita milimo minene na maboko meitu; tukulingwa nti tukukita mponga, gatukubabazibwa, nti tukwikalila; 13 tukukandikwa nti twakula na kubota; tuseli anga nsese za kisi, anga busasa bwa binsania, aaba nu kano kaluma.
14 Nsikusanza bitondo bibino buno nimwitie na nsoni; tondo nkumutonda anga bana bane batundwa. 15 Kubuno aba munabede na basozi tununu ikumi (10.000) mu Yesu Kristo, tondo tamuli na basoinyuwe beingi, kubuno nne u wamubutile mu Yesu Kristo ku Musagu Musoga. 16 Umpanga nkumwana buno mukite anga bunkukita. 17 Kubuno namusingide Timoteo, mwana wane mutundwa, nu mukatizia mu Mukota Kalaga, amukengelezie misako zane za kulama mu Kristo Yesu, anga bunkwigisagia kunsania na kiziki na kiziki, mu kanisa na kanisa.
18 Bamozi kumuli bakwikotia anga buno nsyavwe kumuli. 19 Tondo nasasie kuvwa kumuli ndi kuli kusombola kwa Mukota Kalaga, nu nti namenye, ta bukutenda babano bakwikotia tugu, tondo nu magala mabo lingo. 20 Kubuno Bukota bwa Kalaga tabuli mu kutenda, tondo mu magala. 21 Buni bumukutunda? Ndi nivwe kumuli na kasusula, aba mu lutundo, nu na mutima wabota?