Paulo Akubasungula ku Kitondo kya Butazi Kubeli
5
1 Kukutendwa nunse buno kuli butazi munkatini mweinyu, nu butazi bubuno buli bwa lukita luteli aba ku baBilongo, buno muntu umozi mumuli nti akita butazi na mukikulu w'isi. 2 Nu inyuwe mukwikotia, aba tamukwikongoboteka buno wozo muntu wakitile kitondo kikino atikibwe munkatini mweinyu! 3 Kubuno nne lebelebe, aba nsiligo ku mubili, tondo nili gamozi n'inyuwe mu muuza, nasungia kalazi wozo wakitile kitondo kikino anga buno niligo. 4 Gamwakundamana nage mu izina lya Mukota weitu Yesu Kristo, inyuwe, nu nne nili gamozi n'inyuwe mu muuza wane, nu magala ma Mukota weitu Yesu Kristo meligo, 5 bwatunganana buno muntu wono akasanwe ku Satana buno mubili wage ubigibwe, tondo muuza wage wonibwe mu busi bwa Mukota Yesu. 6 Kwikaka kweinyu ta kusoga. Ndi tamwizi buno mugago mukeke ukugagagia kibombo kinsania? 7 Mutikye wono mugago mukulu wa bwagi buno mwengibwe, mube kibombo kiteli na mugago. Kubuno Kristo, kayulo keitu k'Isuluko, akasenwe ku kabamba keitu. 8 Umpanga tukite kisagulo kyeitu, ta ku mugago mukulu, aba mugago wa bwagi nu bubi, tondo ku kampampa katagaga, u kampampa kasoga nu ka bulili.
9 Namusanzide mu mukanda wane buno tamugomie na bitazi; 10 nsikutenda buno tamugomie nunse na bitazi bya kisi kikino, aba na bakutonia, aba na banyagi, aba na bakumbamizi ba nkisi; kubuno songo bubo, songo bunatunganenne mutuke mu kisi kikino: 11 tondo kano kaluma namusanzila buno tamugomie na muntu ukwimana muKristo ndi eli kitazi, aba akutonia, aba eli mukumbamizi wa nkisi, aba mulingani, aba munuzi wa maku, aba munyagi; muntu wa lukita luluno tamuzige aba kulia gamozi nage.