Ba Kikanga kya Kristo Tamusongelane ku Bangati
6
1 Ndi muntu umozi wa kumuli eli na kitondo na munyage, kubuni akugeleka kumusongela ku babo batakatizia geteli kumusongela ku basililila? 2 Aba ndi tamwizi buno basililila bakasungia kisi? Nu ndi kisi kikasungibwa n'inyuwe, buni bumutanamenya kusungia bitondo bikeke? 3 Ndi tamwizi buno tukasungia banzelo? Embe munatinga kusungia bitondo bya kalamo kakano? 4 Ndi muli na myango ku bitondo bya kalamo kakano, nti buli busoga kusombola bantu beteli banene mu kanisa babe ngatu! 5 Nkutenda bubuno buno nimwitie na nsoni ndi buligo nunse buno mumuli takuli aba muntu umozi unavwama kusesa mulondo gasamba batakatizia! 6 Tondo mukusongelana bweinyubweinyu ku babo batakatizia! 7 Lebelebe, kano kaluma mukwaga nunse, kubuno mukusongelana bweinyubweinyu. Kubuni kumutakwikalila bwagi? Kubuni kumutanaziga munyagwe bikulo byeinyu? 8 Tondo, inyuwe mukwagilaga bantu, nu kwiba bikulo byabo, nu mibuto zeinyu u zimukukitila bubo. 9 Ndi tamwizi buno bateisanana tabakapiena Bukota bwa Kalaga? Tamwengelelwe, aba bitazi, aba bakukita butazi bwabobwabo buteli anga bumba bwa bantu, 10 aba beibi, aba beli na lugi, aba banuzi ba maku, aba balingani, aba banyagi, tabakapiena Bukota bwa Kalaga. 11 Nu bamozi kumuli babezaga mu lulo lukita, tondo mwasugilwe, nu mwaswagizibwa, nu mwabede beisanana mu izina lya Mukota Yesu Kristo, nu mu Muuza wa Kalaga weitu.
Mibili Zeitu Zasililila
12 Nili na bwangato bwa kukita binsania; tondo binsania tabinaba bisoga kundi. Nili na bwangato bwa kukita binsania; tondo nsyangatwe na kimozi. 13 Malia meli ku kitondo kya nda, nu nda zili ku kitondo kya malia; tondo Kalaga akabigia bibyo bibili: nda nu malia. Tondo mubili taguli ku kitondo kya butazi, tondo ku kitondo kya Mukota, nu Mukota eli ku kitondo kya mubili. 14 Nu Kalaga wayukizie Mukota kutuka ku bakuzi ku magala mage, akatuyukya nu iswe lingo.
15 Tamwizi buno mibili zeinyu zili biganza bya Kristo? Ndi nitole biganza bya Kristo, nu kubibika kuba biganza bya kitazi? Kilo, aba nunse! 16 Ndi tamwizi wozo ukugomia na kitazi nti eli bumozi nage? Kubuno bwatendilwe bunee: “Babo babili babe mubili umozi.” a 17 Nu wozo ukwikulumania na Mukota eli umozi nage mu muuza.
18 Tinazi butazi. Bwagi bunsania bukukita muntu tabuli mu mubili wage; tondo wozo ukwikasana ku kukita butazi, akubigia mubili wage wenyene. 19 Aba ndi tamwizi buno mibili zeinyu zili numba za Muuza Wasililila uli munda mweinyu, u mwakasilwe na Kalaga nu tamuli bikulo byeinyu mubenyene; 20 kubuno mwakunzilwe ku bukunza bunene; ububo ganunazi Kalaga mu mibili zeinyu nu mu Muuza weinyu kubuno bili bya Kalaga.