Paulo Akusambalila Bantu Kitondo kya Isonga
7
1 Ku bitondo bibyo biwansanzide: Buli busoga buno wamulume nteitubye ku mukikulu. 2 Tondo, ku kabamba ka kwibembukya na butazi, na muntu na muntu abe na mukikulu wage wenyene, nu mukikulu abe n'iba wage wenyene. 3 Wamulume atunganana kukasa mukikulu wage mubili wage, ububo nu bo mukikulu atunganana kukasa iba wage mubili wage. 4 Mukikulu nteli na bwangato ku mubili wage wenyene, tondo iba wage; bubobubo nu bo iba wage nteli na bwangato ku mubili wage wenyene, tondo mukikulu wage. 5 Tamusumbilizanie mubili anga batagomia, tondo mwitabizanie gamozi nkungu kisyembe, buno mube na nkungu za kusega nu kumbusa nti mugomie lingo, buno Satana anavwa kumulindika ku kitondo kya kulekanuka. 6 Bitondo bibyo binkumutenda t'ikakizio, tondo nakasilwe tugu bwangato bwa kubutenda. 7 Kubuno ninatunda buno bansania babe anga bunili, tondo na muntu na muntu eli na lukaso lwage wenyene lukutukaga ku Kalaga, wono bubuno nu wozo bubo. 8 Tondo ku babo batesonga nu ku misigala, nkutenda buno, bunaba busoga beikale anga bunili. 9 Tondo ndi tabanavwama kwikala tabasonga, aba tabasongwa, nti basongwe, aba basonge, kubuno buli busoga kusonga aba kusongwa bubatanaba na lutundo lubi.
10 Tondo ku babo basila kusongana, nabakakizia aba ta nne, tondo Mukota u wabakakizia buno mukikulu ntatunganana kulekanuka n'iba wage, 11 (tondo ndi alekanuka nage, nti eikala ntasongwa, aba agomie lingo n'iba wage), nu lingo wamulume ntalekanuke na mukikulu wage.
12 Tondo ku bango bantu, namubula bunee, nne, ta Mukota; ndi mubuto umozi eli na mukikulu utakatizia, nu mukikulu wono akwitabizia, nu ndi wamulume wono akutunda kwikala nage, ntamusige. 13 Nu mukikulu, ndi eli n'iba wage utakatizia, nu ndi wamulume wono akakutunda kwikala nage ntamusige. 14 Kubuno wozo wamulume utakatizia asililila nu we ku kabamba ka mukikulu wage nu wozo mukikulu utakatizia asililila nu we ku kabamba k'iba wage. Songo ta bubo, songo bana beinyu banabede batasililila, tondo kano kaluma beli basililila. 15 Tondo ndi wozo utakatizia atuka, nti atuka: u gago mukatizia wamulume aba mukatizia mukikulu ntakandwe, tondo Kalaga atumanine ku bubobelelo. 16 Kubuno ukumenya buni, uwe mukikulu, embe unonia iba wobe? Aba ukumenya buni, uwe wamulume, embe unonia mukikulu wobe?
17 Tondo, anga bwabeganizie Kalaga ku muntu na muntu, anga bwamanine Mukota muntu na muntu, u bubo bwenda, nu bubo u bunkukakizia mu makanisa mansania ma Kristo. 18 Ndi muntu umozi amanwa abezaga asila kumonesibwa, ntalonde kutamonesizibwa. Nu ndi muntu umozi amanwa gatemonesibwa, ntalonde kumonesibwa. 19 Kumonesibwa takuli kena, nu kutamonesibwa takuli kena, tondo kwanza makakizio ma Kalaga. 20 Na muntu na muntu eikale mu lukita lwabezaga mulo gaamaninwe na Kalaga. 21 Ndi wamaninwe ukili mukobe, ntuzangezange. Tondo ndi wakandulwa, nti wakita anga mukandulwa. 22 Kubuno wozo wamaninwe eli mukandulwa, nti eli mukobe wa Kristo. 23 Inyuwe mwakunzilwe ku bukunza bunene, tamube bakobe ba bantu. 24 Mibuto zane, na muntu na muntu eikale mu lukita lwabezaga mulo gaamaninwe na Kalaga.
Meigisia ku Bikumi nu Misigala
25 Ku bikumi, nsili n'ikakizio lya Mukota, tondo nkumubula tugu makengelo mane, anga bwankwilide Mukota kyombo buno nibe mukatizia.
26 Bubo bunkukengela buli busoga ku kabamba ka kabebe katuli nako kano kaluma, buno buli busoga ndi muntu eikala anga bweli. 27 Ndi wasongile mukikulu, ntulonde kulekanuka nage. Nu ndi ntwasongile, ntulonde lingo mukikulu. 28 Tondo ndi wasonga, nti ntwaga, nu ndi kikumi asongwa nti ntaga. Tondo babo bakababazibwa mu mubili; nu nne ninatunda kumubembukya na zezo mbabazio.
29 Tondo nkutenda bubuno, mibuto zane, buno nkungu zise nkeke, kutukila kano kaluma, babo beli na bakikulu babe anga beteli nabo, 30 nu babo bakulila, babe anga batakulila; nu babo bakubogaboga babe anga batakubogaboga; nu babo bakukunza, babe anga babo beteli na kampa; 31 nu babo bakulemanina kisi kikino, babe anga batakukilemanina nunse: kubuno bitondo bya kisi kikino bikutinga.
32 Tondo nsikutunda muzangezange. Wozo utasonga akukengela bitondo bya Mukota, buno, buni bwanatananizia Mukota: 33 tondo wozo wasonga akukengela bitondo bya kisi kikino buno, buni bwanatananizia mukikulu wage. 34 Lingo bwengukana gasamba mukikulu wasongwa nu kikumi. Wozo utasongwa akwidangia mu bitondo bya Mukota Kalaga, buno asililile mu mubili nu ku muuza, tondo wozo wasongwa akwidangia ku bitondo bya kisi kikino, buno buni bwanatananizia iba wage.
35 Nkutenda bubo ku mutali weinyu; nsikumubikila itega, nkutunda buno mulame mu nzila zisanana nu mukitile nunse Mukota Kalaga geteli kubiganwa na bingo bitondo. 36 Tondo ndi muntu akukengela buno ntakukitila kikumi kyage busoga, ndi atinga nkungu za bukinga bwage nu akutunda kusongwa, akite anga bwakutunda; ntakita bwagi; basongane tugu. 37 Tondo wozo walindia mutima, nu nteiyanina, tondo avwama kwangata kusombola kwage wenyene lingo, akukengela mu mutima wage, kulanga kikumi kyage, nti akita nu we busoga. 38 Umpanga wozo ukusongia kikumi kyage akukita busoga nu wozo utakukisongia nti akita busoga nunse kutinga.