Bitondo bya Kukumbamina Nkisi
8
1 Ku kitondo kya nyama zakasanwa kayulo ku nkisi, twizi buno beiswe bansania tuli na bumenyinino. Bumenyinino bubuno bukulusia lwikotio, tondo lutundo lukutulindia mu bukatizio. 2 Ndi muntu akwikengela buno eizi kitondo nti ntemenya anga bwamutunganana kumenya. 3 Ndi muntu akutunda Kalaga nti wozo amenyininwa nage. 4 Ku musagu wa kulia idia lyakasanwa kayulo ku nkisi, twizi buno nkisi ta kena mu kisi, nu buno kuli Kalaga umozi tugu. 5 Kubuno ndi kuli bamanagwa tulaga, ndi mwigulu aba mu kisi, nu kuli tulaga twingi, nu bakota beingi. 6 Tondo kutuli kuli Kalaga umozi tugu, u Tateiswe, kweli u kukutukaga binsania nu iswe tuli mweli; nu kuli Mukota umozi tugu, u Yesu Kristo, kweli binsania byabede, nu iswe tuli mweli.
7 Bumenyinino bubuno tabuli mu bantu bansania; tondo bamozi, ku kugomia na nkisi aaba nu kano kaluma, bakulia idia lilyo lyabikwa kayulo ku nkisi; nu kalenganio kabo katamba ku kabamba k'idia lilyo. 8 Tondo idia talinatubasia ku Kalaga, kubuno, ndi twalia tatunatalikilwa kena, nu ndi tatwalia tatunakokoka ku kena.
9 Tondo idangazi, magala ma bukatizio bweinyu tamakikitanie babo batamba. 10 Kubuno ndi muntu akumona buno uwe uli na bumenyinino wikala kulia idia mu numba za nkisi; ndi muntu wono watamba, ntanalia nu we lilyo idia lyakasanwa kayulo ku nkisi? 11 Nu wozo mubuto watamba ndi ntanazimina ku bumenyinino bwobe, nu ku kabamba kage Kristo akule! 12 Nu kungwa mwagila mibuto zeinyu mu lukita luluno nu kutambia tulenganio twabo, nti mukwagila Kristo. 13 Ububo, ndi idia lyagusia mubuto wane mu bwagi, nsikalia nyama lingo nunse, ninavwa kugusia mubuto wane mu bwagi.