Paulo Akubalolesia Bwikokomezizie mu Busingwa Bwage
9
1 Ndi nne nsili mukandulwa? Ndi nne nsili musingwa? Ndi nne nsyamonine ku Yesu Mukota weitu? Ndi inyuwe tamuli biguma bya mulimo wane mu Mukota? 2 Ndi nsili musingwa ku bango bantu, tondo nili musingwa kumuli, kubuno kalolesio ka busingwa bwane u inyuwe mu Mukota. 3 Kwakula kwane ku babo bakunsongela u kukuno. 4 Ndi tatuli na bwangato bwa kulia nu kunua? 5 Ndi tatuli na bwangato bwa kwenda gamozi na mukikulu mukatizia anga bukukita bango basingwa, nu mibuto za Mukota Yesu na Kefa? 6 Aba ndi nnenyene nu Barnaba tugu, u beteli na bwangato bwa kutakita mulimo? 7 Mukoloboyo mukizi unenda kwitana bita nu kwidiga wenyene? Nu nazi unayika miti za mizabibu nu ntakulia ku biguma byazo? Aba nazi ukulisagia kibombo kya bituganwa nu ntakunuaga ku mabele makyo?
8 Ndi bubuno bunkutenda nkubutenda anga muntu tugu? Aba ndi mulembe tagukutenda nugo bubo? 9 Kubuno bwasanzilwe mu mulembe wa Musa bunee: “Ntukande kanua ka ngombe ndi zikunyanta tuguma twa ngano.” a Ndi Kalaga akulola bitondo bya ngombe? 10 Aba akutenda ku kabamba keitu umpanga? Ee, buligo, bwasanzilwe ku kabamba keitu buno bwatunganana mulimi alime ku kilemanizio, nu wozo ukususula nu we, asusule buno akaswe nkindi za matubulo. 11 Ndi twayikile mbuto za Muuza mumuli, kili kitondo kinene ndi twatubula ku biguma byeinyu bya mubili? 12 Ndi bango bakukaswa bwangato bwa kukita bubo kumuli, ndi iswe tatuli na bwangato nunse kutinga babo?
Tondo, iswe tatukuyanga bwangato bubo. Tondo tukwikalila binsania buno tunavwa kubigana Musagu Musoga wa Kristo. 13 Ndi tamwizi buno babo bakukitaga mulimo mu numba za kukumbamina, bakuliaga ku idia lya mu numba zezo, nu babo bakukitaga mulimo ku kasenga ka kayulo bakuliaga ku idia lya kako kasenga? 14 Ububo nu bo Mukota Kalaga akakizizie buno babo bakusambalaga Musagu Musoga bakalamaga ku Musagu Musoga.
15 Tondo nne nsyakitile aba kitondo kimozi ku bitondo bibino, aba nsyasanzile bubo ku kabamba ka kusega mutali wane; kubuno ninaswagizie nunse buno nikue kutinga muntu kubigia kwikaka kwane. 16 Kubuno ndi nkusambala Musagu Musoga, takili kitondo kyane kya kwikaka, kubuno natunganana kugusambala, nu kabebe kundi ndi nsyasambala Musagu Musoga. 17 Kubuno ndi nakita mulimo wono na mutima musoga, nti nili na lukalilo; tondo ndi nagukita ku kusindikwa, nti nkwiyekya muzigo muzitu. 18 Umpanga lukalilo lwane luli lukizi? U luluno, kusambala Musagu Musoga geteli bukunza, geteli nunse kukita na bwangato bwane bwa busambazi mu Musagu Musoga.
19 Kubuno aba nabezaga mukandulwa ku bantu bansania, tondo nibikile mukiti wa bansania, buno ndi bwakulungana nilute bantu beingi nunse. 20 Nabede anga muYuda ku baYuda, buno nilute baYuda; ku babo beli kunsi kwa mulembe, nabede anga uli kunsi kwa mulembe, tondo nnenyene nsyabezaga kunsi kwa mulembe, buno nilute babo beli kunsi kwa mulembe, 21 ku babo beteli na mulembe, nabede anga nsili na mulembe, (tondo ta anga buno nsili na mulembe wa Kalaga, tondo nili kunsi kwa mulembe wa Kristo) buno nilute babo beteli na mulembe. 22 Ku batamba nabede anga watamba, buno nilute batamba; nabede muntu wa nkita insania ku bantu bansania, buno ku nkita insania nivwame konia bamozi. 23 Nu nne nkukita bubuno bunsania ku kabamba ka Musagu Musoga, buno nimone kugomia gamozi n'inyuwe kugo.
24 Tamukumenya buno bakwendaga kantangoa bakwendaga lubilo bansania, tondo ukukasagwa lukalilo ku bukindi eli umozi tugu? Ububo endazi lubilo ku lukita luluno buno mukaswelo. 25 Nu na muntu na muntu ukukita magala ku kukinda akwizugila ku kukita bitondo binsania. Umpanga, babano bakukita bubuno buno bakaswe nkumbu zabiga; tondo iswe tukite bubo buno tube na nkumbu zitanakubiga. 26 Umpanga, nne nkwenda lubilo, ta lwa buliabulia; nkulwana, ta anga muntu ukulwana buliabulia. 27 Tondo nkubabazia nunse mubili wane, nu kugukitia na mulimo buno ninavwa kusombwa aba ganasila kwigisia bango.