BaIsraeli Beli Tulolesio Kutuli
10
1 Mibuto zane, nsikutunda mwiba buno batateiswe bansania basondelezizibwe na kimpa, nu bansania basokile mu kitatenge, 2 nu bansania batutikilwe mu Musa mu kimpa nu mu kitatenge; 3 nu bansania balide idia limozi lya Muuza; 4 nu bansania banune mazi mamozi ma Muuza, kubuno banune ga lwanda lwa Muuza lwabayangaga, nu lwanda lulo u Kristo. 5 Tondo beingi kubeli tabatananizizie Kalaga, ububo bazikile mu kalula. 6 Umpanga bitondo bibino byabede buno bibe tulolesio kutuli, nu buno tatube na ntundo mbi anga bubazitundile. 7 Aba tamube bakumbamizi ba nkisi, anga bwabezaga bamozi kubeli; kubuno bwasanzilwe bunee: “Bantu beikede gansi buno balie nu kunua, kusila bemanukile nu baminine.” a 8 Aba tatukite butazi, anga bwakitile bamozi ba kubeli, aba nu bantu tununu makumi mabili nu tusatu bakule busi bumozi. 9 Aba tatulindike Mukota Kalaga, anga bwamulindikile bamozi kubeli, nu bakule na nzoka. 10 Aba tamukite manungunungu, anga bwakitile bamozi kubeli manungunungu, nu beitilwe na mwanzelo wa kusungia.
11 Bitondo bibino binsania byababaside buno bibe tulolesio ku bango bantu, nu byasanzilwe buno bibe meigisia kutuli, iswe bakulama ku nkiko nzinda. 12 Ububo wozo ukukengela buno emana, eidange buno ntagoe. 13 Takuli idindiko lyampa limukulindikwa, litakulindikwa bango bantu, tondo Kalaga eli Wasililila, utanamusigilila buno mulindikwe n'idindiko limutanavwama kukinda, tondo gamukulindikwa, amukasie mu idindiko buno mulikinde nu mukokomene.
Basililila Beibembukye na Nkisi
14 Batundwa bane, ku bubuno tinazi kukumbamina nkisi. 15 Nkutenda n'inyuwe anga bantu beli na bumenyinino; menyininazi ku bubo bunkutenda. 16 Kituma kya mponga kitukuganunaga ku Kalaga, ndi takili mugomio ku mikila za Kristo? Nu kampampa katukubungulaga, ndi takeli mugomio mu mubili wa Kristo? 17 Kubuno kuli kampampa kamozi, iswe beli beingi, tuli mubili umozi; kubuno iswe tubansania tukulia ku kako kampampa kamozi.
18 Lolazi bwabezaga baIsraeli ku lukita lwa mubili: babo bakulia ku byakasanwa ku kayulo, ndi nti tabagomia nako? 19 Umpanga nitende buni? Ndi kikyo kyakasanwa kayulo ku nkisi, kili kena? Aba ndi nkisi zili kena? 20 Ta bubo, tondo nkutenda buno bibyo bikukasana baBilongo, bakubikasana ku basumbu, ta ku Kalaga: nu nne, nsikutunda buno mugomie gamozi na musumbu. 21 Tamunavwama kunua gamozi ku kituma kya Mukota Kalaga, nu ku kituma kya basumbu: tamunavwama kugomia gamozi ku meza za Mukota nu ku meza za basumbu. 22 Aba ndi tukutunda kwitia Mukota Kalaga lugi? Ndi tuli na magala nunse kumutinga?
Bantu ba Kalaga Tabalolesie Bango Bantu Buubi
23 Bitondo binsania bili na bwangato kukitwa, tondo ta binsania u bikukasia, bitondo binsania bili na bwangato kukitwa tondo ta binsania u bikobaka. 24 Muntu ntalonde mutali wage wenyene, tondo mutali wa munyage.
25 N'idia n'idia na likukunzibwa ku isoko, liliazi geteli kubuzia ku kabamba ka kalenganio; 26 kubuno “kisi nu binsania bili mukyo bili bya Mukota Kalaga.” b
27 Nu ndi muntu utakatizia amumana ku idia, nu inyuwe mukutunda kwendako; liazi n'idia n'idia limwakaswa, tondo tamubuzie ku kabamba ka kalenganio. 28 Tondo ndi muntu amubula bunee: “Idia lilino lyakasenwe kayulo ku nkisi,” tamulilie lingo, ku kabamba ka wozo wamukengelezia, nu ku kabamba ka kalenganio. 29 Nkutenda bubuno, ta ku kalenganio kobe, tondo ka wozo ungo muntu.
Kubuni kukandulwa kwane kunasungibwa na kalenganio ka ungo muntu? 30 Ndi nkulia nu nkuganuna Kalaga, kubuni kuninalingwa ku kitondo ky'idia linaganuninaga ku Kalaga?
31 Umpanga, kungwa mukulia aba mukunua, aba mukukita kitondo kinsania, kitazi binsania ku lutanuno lwa Kalaga. 32 Tamukikitanie baYuda, aba baBilongo, aba Kanisa ka Kalaga: 33 anga nne bunkutananizia bantu bansania mu bitondo binsania, nsikulonda mutali wane nnenyene, tondo mutali wa beingi, buno bonibwe.