Makitilo ma Bakikulu mu Numba za Kalaga
11
1 Munisusanie anga bunasusanizie Kristo. 2 Nkumuganuna ku bubo bumukunkengela mu bitondo binsania, nu bumukukokomezia meigisia mane anga bunamusambalidemo. 3 Tondo nkutunda mumenye buno, mwangati wa wamulume unsania eli Kristo, nu mwangati wa mukikulu eli iba wage, nu mwangati wa Kristo eli Kalaga. 4 Na wamulume na wamulume ukusega aba ukulengania, ndi akukila itoe lyage, nti abenga mwangati wage. 5 Tondo na mukikulu na mukikulu ukusega aba ukulengania, nu itoe talyakukilwa, nti abenga mwangati wage; kubuno nti eli bumozi anga wozo walulwa nzwili insania. 6 Kubuno ndi mukikulu nteikukila itoe, kasi nti alulwe nzwili insania; tondo ndi buli nsoni ku mukikulu kwalulwa nzwili zage, aba kukegibwa kwa nzwili, kasi akukilwe itoe. 7 Kubuno tabwatunganana ku wamulume kukukila itoe, kubuno eli kisusania nu lutanuno lwa Kalaga, tondo mukikulu eli lutanuno lwa wamulume. 8 Kubuno wamulume ntatukile ku mukikulu; tondo mukikulu u watukile ku wamulume; 9 aba wamulume ntabumbilwe ku kabamba ka mukikulu, tondo mukikulu u wabumbilwe ku kabamba ka wamulume. 10 Ku bubuno bwatunganana buno mukikulu abe na kakengelezio ka lwanzo ku itoe lyage, ku kabamba ka banzelo. 11 Tondo ku kalamo keitu mu Mukota, mukikulu ntanalama kuteli wamulume nu wamulume ntanalama kuteli mukikulu, 12 kubuno anga bubo bwatukile mukikulu ku wamulume, ububo wamulume nu we akubutagwa na mukikulu; tondo binsania bikutukaga ku Kalaga.
13 Kengelazi mubenyene buno ndi bwatananina ku mukikulu kusega Kalaga nu ntakukila itoe lyage? 14 Ndi bumba bwa bantu tabukwigisia buno buli nsoni ku wamulume kuba na nzwili ndazi, 15 tondo buli lutanuno ku mukikulu kuba na nzwili ndazi, kubuno nzwili ndazi zakasilwe ku mukikulu ku kukukila itoe lyage. 16 Tondo ndi muntu atunda kwenda myango ku kitondo kikino amenye tugu buno, aba iswe tubenyene, aba makanisa ma Kalaga, tatuli na lukita anga luluno mu meigisia.
Meza ma Mukota Kalaga
17 Mu kukakizia kukuno nsikumuganuna, kubuno mu kukundamana, ta ku busoga, tondo ku bubi. 18 Kubuno, kitondo kitangi kili buno ndi mwakundamana mu kanisa, nkungwa buno kuli malekanuko gamusamba, nu nkubukatizia kakeke. 19 Kubuno kwatunganana kuba malekanuko buno babo bakatizia ba lebelebe bamoneke mumuli. 20 Umpanga gamukukundamana ku kiziki kimozi, nti tabuli ku kulia idia lya Mukota, 21 kubuno ku nkungu zimukulia, na muntu na muntu akulinga kutola idia lyage wenyene nu kulia, kuteli kulindila bango, nu umozi eli na nzala nu ungo akatwa na maku. 22 Ndi tamuli na numba zeinyu za kulia nu kunua muzo? Aba ndi mukubenga kanisa ka Kalaga, nu babo beteli na kena mukubeitia na nsoni? Buni bunkumubula? Ndi nimuganune ku bubuno? Nsikumuganuna!
23 Kubuno nakasilwe meigisia na Mukota u mamo manamwigisizie buno Mukota Yesu, mu kindi kikyo kyakasenwe, atolile kampampa: 24 nu gaasilile kukakasa mponga, akabungwide, nu atendile bunee: “Wono uli mubili wane, wabungulwa ku kabamba keinyu, kitazi bubuno bumukankengelaga.” 25 Nu gabasilile kulia, atolile kituma, atendile bunee: “Kikino kituma kili idagano ito mu mikila zane; gamukanuaga, kitazi bubuno bumukankengelaga.” 26 Kubuno gamukalia kampampa kakano, nu gamukunua kituma kikino, mukulolesia lukuo lwa Mukota aaba nu gaakavwa.
27 Umpanga unsania ukulia kampampa kakano, aba ukunua kituma kikino kya Mukota na lukita luteli lusoga, abe na katati ka mubili nu mikila za Mukota. 28 Tondo muntu eidindike wenyene, nu bubo alie kampampa nu anue kituma. 29 Kubuno wozo walia nu wanua, geteli kumenyinina mubili wa Mukota, nti alia nu anua lusungio lwage wenyene. 30 Ku kabamba kakano beingi kumuli batamba nu bango bakusamba nu bango bese bakua. 31 Tondo ndi tukwiyania tubenyene, nti tatunasungibwa, tukusungulwa na Kalaga, buno tunavwa kusungibwa gamozi na kisi. 32 Tondo gatukusungibwa, tukusungulwa na Kalaga, buno tatusungibwe gamozi na bantu ba kisi.