Nkaso za Muuza Wasililila
12
1 Mibuto zane, nsikutunda buno mwikale geteli kumenyinina bitondo bya nkaso za Muuza Wasililila. 2 Mwizi buno gamwabezaga baBilongo mwendaga ku nkisi zitakutenda, anga bumwasondelezizibwe. 3 Ku bubuno nkumumenyesia buno takuli muntu wampa, ndi akutenda mu Muuza wa Kalaga, unatenda bunee: “Yesu aswililwe,” nu takuli muntu wampa unatenda bunee: “Yesu eli Mukota!” Ndi ntakutenda mu Muuza Wasililila. 4 Kuli nkaso za nkita na nkita, tondo Muuza eli umozi. 5 Kuli milimo za nkita na nkita, tondo Mukota eli umozi. 6 Kuli makitilo ma nkita na nkita, tondo Kalaga umozi u gukukita makitilo mansania mu bansania. 7 Tondo na muntu na muntu akukaswa kalolesio ka Muuza buno kube mutali ku bansania. 8 Kubuno muntu umozi, ku Muuza akukaswa menge makutenda, nu ungo bumenyinino bwa bitondo, ku Muuza wozo umozi; 9 nu ungo, bukatizio, mu Muuza wozo umozi, nu ungo nkaso za konia, mu Muuza wozo umozi, 10 nu ungo magala ma kuganiagania; nu ungo bulengania, nu ungo kusongolola myuza; a nu ungo nkita za mitendezi, nu ungo kwisula mitendezi; tondo ku milimo zeno insania. 11 Muuza wono umozi u gukuzikitaga, akubeganagia nkaso ku muntu na muntu anga bwakutunda.
Mubili Umozi Uli na Biganza Byingi
12 Kubuno anga bubo buli mubili guli umozi, nu guli na biganza byingi, nu biganza binsania bya mubili wozo aba ndi bili byingi, bili mubili umozi, ububo nu bo buli Kristo. 13 Kubuno iswe tubansania twatutikilwe mu Muuza umozi buno tube mubili umozi, ndi baYuda aba baYunani, ndi bakandwa, aba bakandulwa: iswe tubansania twanusizibwe na wozo Muuza umozi.
14 Ububo mubili taguli kiganza kimozi, tondo guli na biganza byingi. 15 Ndi kugulu kunatenda bunee: “kubuno nne nsili kuboko, nsili wa mubili;” ndi ku kitondo kikyo nti kugulu takuli kwa mubili? 16 Nu ndi kutuzi kunatenda bunee: “kubuno nne nsili liso, nsili wa mubili.” 17 Songo mubili unsania guli liso, buni bugunungwa? Songo unsania guli kutuzi, buni bugunungwa ku iyugo? 18 Tondo Kalaga abikile kiganza na kiganza ku mubili, anga bwatundile. 19 Tondo songo binsania bili kiganza kimozi, songo mubili unabede buni? 20 Tondo kano kaluma biganza bili byingi, tondo mubili guli umozi.
21 Nu liso talinavwama kubula kuboko bunee: “Nsikukwiyanina!” Aba lingo itoe talinavwama kubula magulu bunee: “Ntakumeiyanina inyuwe!” 22 Tondo biganza bya mubili bikumonekako buno byatamba nunse u bili bya mutali; 23 nu bibyo biganza bya mubili, bitakukengelwa kwanzwa, u biganza bitukwanza nunse; ububo biganza byeitu biteli bisoga bikwanzwa nunse; 24 kubuno biganza byeitu bili bisoga tabikwiyanina kena, tondo Kalaga akulumizizie mubili, buno kiganza kyida lwanzo kikaswe lwanzo nunse kutinga; 25 buno mubili tagubeganibwe; tondo biganza bibe na lwanzo lumozi nu kukasania. 26 Nu ndi kiganza kimozi kyababalwa, biganza binsania nti byababalwa gamozi nakyo; nu ndi kiganza kimozi kyakaswa lwanzo, bingo biganza binsania nti byabogaboga gamozi nakyo.
27 Kubuno inyuwe muli mubili wa Kristo, nu muli biganza byage, nakyo nakyo na kili kyage. 28 Nu Kalaga abikile bamozi mu kanisa, batangi basingwa, ba babili balengania, ba basatu basozi, kusila babo beli na magala ma kuganiagania, beli na nkaso za konia basambi, za kukasia bango, za kwangata, nu za nkita na nkita za mitendezi. 29 Ndi bansania beli basingwa? Ndi bansania beli balengania? Ndi bansania beli basozi? Ndi bansania bakukitaga magala ma kuganiagania? 30 Ndi bansania beli na nkaso za konia basambi? Ndi bansania bakutendaga mu mitendezi? Ndi bansania bakwisulaga mitendezi? 31 Tondo mube nunse na mpusia za kumona nkaso nsoga nunse.
Nu nti namulolesie nzila nsoga nunse kutinga insania.