Paulo ku Kisanga kya Melita
28
1 Gatwabezaga tuse tona, tungule buno kisanga kikyo kyamanagwa Melita. 2 Beiyakyo batukitide busoga nunse: nu batusekede beiswe bansania kubuno mbula zalokaga nu kwabezaga mpego nunse. 3 Paulo akundamanizie kibombo kya tuti twakama nu gaabezaga akukyisa ga keiya, ku kabamba ka muzuzo, nzoka (zikumanwa mpoma) zabasile nu zamubangile ku kuboko kwage. 4 Gamonine beiya kisanga ku zezo mpoma zikuzembela ku kuboko kwa Paulo, batendene bwabobwabo bunee: “Lebelebe muntu wono eli mwiti kubuno aba onine mu kitatenge, tondo bulili bwa Kalaga tabukuziga buno alame.” 5 Tondo Paulo eititwidezo mu keiya nu ntungule ku lubaba lwampa. 6 Babo bantu bakengelaga buno bamone kwatumba aba kukua kitangalabesi. Tondo, kumbusa kwa kulindila nkungu ndazi nu kumona buno takuli bubi bwampa bwamubasila, bagalukizye makengelo mabo nu batendile buno eli kalaga. 7 Bwigi na kikyo kiziki kwabezaga masoa ma mukota wa kisanga, wamanagwa Publio. Wono atusekede busoga nu atukungile kwage bindi bisatu. 8 Isi wa Publio abezaga ga mugu kubuno abezaga na lusambo lw'isusila nu lwa kwansa mikila. Paulo endile kumulola, asegile, abikile maboko gantata gage nu amwonezie. 9 Kusila kwa bubo, bango basambi ba ga kikyo kisanga bavule nu bo nu bonezibwe. 10 Batulolesizie nunse lwanzo, nu nkungu zitwatukile kuko na bwato, batukasile binsania bitwiyaninaga ku lugendo lweitu.
Paulo Abasa ku Roma
11 Kumbusa kwa myezi isatu, twendile na bwato bwa ku Alesanduria, bwamanagwa bunee: “Tulaga Twa Maasa,” bwabezaga ga kikyo kisanga ku nkungu za mpego. 12 Twabasile ku mwino wa Sirakuse, twikede kuko bindi bisatu. 13 Nu kutuka kuko, twendile mu kakulu ka kitatenge aaba nu twabasile ku Regio. Gakede busi, lumpumpu lwa ku lulenge lwa kwidume kwa kisi lwapupile nu twakitile lugendo lwa bindi bibili aaba nu twabasile ku Puteoli. 14 Mu wozo mwino, twasangile mibuto zatusegile nunse buno tusigale gamozi nabo bindi mutubakamo. Nu bubo u butwendile ku Roma. 15 Mibuto zeitu za ku Roma, gababezaga bese basila kungwa ku misagu zeitu za kuvwa, batukile kuko nu bavule kutukulumania ku isoko lya Apio nu ku Numba Isatu za bageni. Paulo, gaabamonineko, aganwine Kalaga nu alangamenne. 16 Gatwabasile ku Roma, bakasile Paulo bwangato bwa kwikala wenyene gamozi na mukoloboyo umozi wamulangaga.
Paulo Akwigisia ku Roma
17 Kusila kwa bindi bisatu, Paulo amanine bakulu ba baYuda. Nu gabakundamenne, abatendile bunee: “Mibuto zane, aba ndi nsyakitile bubi bwampa ku kilongo kyeitu aba ku lukita lwa batateiswe, nakandilwe ku Yerusalema nu nakasenwe ku maboko ma baRoma. 18 Nu bo gabasilile kumbuzia, batundaga kunkandula, kubuno mundi, tabamonine kyampa kininakwila. 19 Tondo baYuda babusombile nu nidangizie buno nende kulondozibwa na Kaisari, ta ku kabamba ka buno nabezaga na kitondo kya kusongela kilongo kyane. 20 Ku bubo, nabuzizie kumumonako nu kutenda n'inyu; kubuno nakandilwe na mamano makoki ku kabamba ka kilemanizio kya Israeli.”
21 Bamutendile bunee: “Tatwakatile mukanda wampa kutuka ku Yudea ku kitondo kyobe nu takwavule mubuto weitu wampa kutusambalila musagu aba kututenda kitondo kibi ku kabamba kobe. 22 Tondo tukutunda kungwa bukukengela uwenyene, kubuno twizi buno meigisia mamano makusombwa kunsania.”
23 Bamubikide busi bwa kukulumana nage, nu bantu beingi bavule kumulola ku kiziki kyeikalaga kukyo. Kutukila nindunindu aaba nu kubasa ku igolo, Paulo abeigisizie nu abasambalide bukota bwa Kalaga nu atundile kubalolesia bitondo bya Yesu mu mulembe wa Musa nu mu mikanda za balengania. 24 Bamozi beitabizizie byatendaga, tondo bango bananine kukatizia. 25 gababede tabakwitabizania bobenyene, beiyendede, nu Paulo atendile lingo bunee: “Muuza Wasililila atendile buligo gaatendaga ku babuti beinyu ku kanua ka mulengania Isaya bunee:
26 ‘Enda ku kilongo kikino nu kitende bunee:
“Kungwa, mungwe tondo tamwasongolole kampa,
Nu kulola, mwalole tondo tamwamenyinine kampa.”
27 Kubuno mitima za kilongo kikino zili mibibu;
Babikile matuzi mabo kuba mabibu,
Nu bazibile meiso mabo;
Buno banavwa kutitika na meiso mabo,
Nu banavwa kuba na bumenyinino mu mitima zabo,
Nu banavwa kugaluka buno nibonie.’a
28 Umpanga menyazi buno lonio luluno lwa Kalaga lwekwa ku baBilongo, nu bo balungwe!” 29 Gasilile Paulo kutenda bubo, baYuda bendile nu bakananizanizie bwabobwabo. 30 Paulo eikede myaka ibili migimagima mu numba zaligaga. Asekelaga bansania bavwaga kumulola. 31 Nu asambalaga bukota bwa Kalaga nu kwigisia bitondo bya Mukota Yesu Kristo, na bupuka nu takuli muntu wampa wamuzugide.