Paulo Asingwa ku Roma
27
1 Galongekilwe buno twatunganana kwenda mu bwato ku Italia, babikile Paulo nu bango bakandwa bamozi ku mukota umozi wa kibombo kya bakoloboyo lukama ba Augusto wamanagwa Yulio. 2 Twingide mu bwato bumozi bunene bwa Adramiti bwendaga mu ntungo ku miino z'ibungu lya kisi kya Asia, nu twendile mu kitatenge, nu Aristarko muntu wa ku Makedonia, wa ku Tesalonika abezaga gamozi n'iswe. 3 Gakede busi, twabasile ku Sidoni; nu Yulio, wakungile Paulo busoga, amukasile bwangato bwa kwenda ku bilemba byage buno amone byeiyaninaga. 4 Kutuka kuko, twendile mu mutili wa bwigi na kisanga kya Kipuro, kubuno lumpumpu lwatubigenne. 5 Gatwasilile kusoka kitatenge bwigi na Kilikia nu Pamfilia, twabasile ku Mira, mwino umozi wa ku Likia. 6 Kuko, mukota wa bakoloboyo amonine ku bwato bunene bwa ku Alesanduria bwendaga ku Italia nu atwingizizie mubo. 7 Ku bindi byingi, twendile bukebuke, nu ku nsungio ningi mbibu twabasile ku mwino wa Kinido. Kuko, lumpumpu lwatubigenne kubasako, nu twatingile kunsi kwa kisanga kya Krete, ku lulenge lwa ku Salmone. 8 Twitide kuba na nsungio ningi mu ntungo zakyo nu twabasile ga kiziki kyamanagwa Ibungu Isoga, kili bwigi na mwino wa Lasea. 9 Twazimizizie nkungu ningi nu bwabede buse bubibu nunse kwenda mu bwato, kubuno bindi bya kukanda kulia byabezaga bise byasila kutinga. Ku kabamba kako, Paulo abakengelezizie bunee: 10 “Bamulume, nkumona buno lugendo luluno lukuba na kabebe nu kubigia bituli nabyo, ta ku mizigo nu ku bwato tugu kankanka, tondo lingo nu ku tulamo tweitu.” 11 Tondo mukota wa bakoloboyo ongwilide nunse iyuki lya nyene bwato nu lya musondelezia wa bwato kutinga bitondo byatendaga Paulo. 12 Nu kubuno ibungu lilyo talyabezaga isoga kwikala galyo mu nkungu za mpego, bantu beingi ku babo babezaga mu bwato bakalile lwango kutuka gago buno ndi bwakulungana, babase ku Foinike, ku ibungu lya Krete lyalolela ku lulenge lwa kwikazi nu lwa kwidume kubanatunganenne kusigala nkungu insania za mpego.
Kisoa Gantata ga Kitatenge
13 Gabede lumpumpu lukeke lwa ku lulenge lwa kwidume lukupupa, bakengede buno banavwama kukita bubakengelaga. Bazanzwide nanga nu bendile nunse ku mutili wa bwigi na Krete. 14 Tondo kusila kwa nkungu nkeke, lumpumpu lunene lwamanagwa buno, “Eurakilo,” lwapupile nunse, kutuka ku miduko za kisanga. 15 Bwato bwekilwe kubuno tabwakulungenne kubwimika ku kabamba ka lumpumpu nu twatunganenne kubusiga buno twekwe. 16 Twatingile kunsi kwa kisanga kikeke kyamanagwa Kauda, twasigede gago nkungu nkeke. Ku magala nu ku bitondo byingi bibibu, twaswikile bwato bukeke ku kansinsi ka bwato bunene. 17 Nu gabasilile kubuzanzula, babubakamizie mu bwato bunene, kusila baswikile mizigi za kukasia ku bwato bobwenyene. Kubuno babezaga bakukua boba buno banavwa kukatwa g'isege lya Sirti, bagezizie nanga nu bubo basigile bwato bwekwe na lumpumpu. 18 Kisoa kyitide nunse kutugingiagingia nu ku kabamba kako, balekede mizigo mu kitatenge. 19 Nu ku kindi kya bisatu, beisile bintu bya bwato mu kitatenge na maboko mabo bobenyene. 20 Ku bindi byingi, takwamonekile ku musi, aba nkeninkeni, nu kisoa kinene kyitide nunse bubibu, nu tatwabezaga lingo nunse na kilemanizio kya kona.
21 Babo babezaga mu bwato tabalide kampa kutukila bindi byingi, ububo Paulo emanukile munkatini mwabo nu abatendile bunee: “Bamulume, bunatunganenne buno munungwilile nu tatutuke ku Krete. Bubo munabembukile mbabazio nu tubebe tutuno. 22 Tondo kano kaluma, nkumusega buno mulindie mitima zeinyu, kubuno takuli aba umozi wa kumuli wazimizie kalamo kage, umpanga bwato bobwenyene. 23 Kubuno mu kindi kikino, mwanzelo wa Kalaga, wozo u nili muntu wage nu u nkukitila mulimo, ambaside. 24 Nu ambwide bunee: ‘Ntukue boba, Paulo! Watunganana kulondola lwabusio lwa Kaisari, nu lola, Kalaga akukasile kalamo ka bantu bansania bakwenda mu bwato gamozi nobe.’ 25 Umpanga, bamulume, lindiazi mitima zeinyu, kubuno nkukatizia Kalaga, buno bubo bwambwide bwabe. 26 Tondo twatunganana kwiswa gantata ga kisanga kimozi.”
27 Ku kindi ky'ikumi nu binazi, kisoa kyitide kutweka kuno nu kuko mu kitatenge kya Adria. Munkatini mwa kindi, balugi ba bwato bakengede buno tuseli bwigi na ku mutili. 28 Balekede muzigi buno bamenye buzindu nu bamonine buno kwabezaga kwakuka buzindu bwa metre makumi masatu nu mutubakamo; nu bulazi kakeke, bagulekede lingo nu bamonine buno buzindu buseli metre makumi mabili nu kinana. 29 Ku boba buno bwato bweitu buneikuka ku makozi, beisile nanga inazi ku kyoba kya bwato nu balindide na boba nunse kukya kwa busi. 30 Tondo balugi ba bwato balondaga kutina nu kutuka mu bwato nu batundile kugezia bwato bukeke bwa kukasia mu kitatenge, anga buno bakutunda kwisa nanga ku kansinsi ka bwato bunene. 31 Tondo Paulo atendile ku mukota wa bakoloboyo gamozi na bakoloboyo bunee: “Ndi bantu babano tabasigala mu bwato, tamunavwama konibwa.” 32 Ububo, bakoloboyo baketwide mizigi zabezaga zakata bwato bukeke nu babusigile bukoloke mu kitatenge.
33 Lwabusio lwa kukya kwa busi, Paulo amanine bansania buno balie idia, nu atendile bunee: “Lelo u kindi ky'ikumi nu binazi mukulindila nu mukwikala bubo geteli kulia kampa. 34 Umpanga, namumana buno mulie idia, kubuno lili na mutali buno mwonibwe nu takuli aba umozi wa kumuli ukazimizia luzwili lwampa lwa ku itoe lyage.” 35 Kusila kwa kutenda bitondo bibyo, Paulo atolile kampampa nu aganwine Kalaga kuko lwabusio lwa bansania, kusila akaketwide nu alingile kulia. 36 Bansania balangamenne nu balide idia nu bo. 37 Twabezaga mu bwato, bantu bakuka nkama ibili, makumi mutubakamo nu mutuba. 38 Gabede beikuta nunse, balekede ngano zabezaga mu bwato mu kitatenge buno buzitu bwa bwato bukokokeko.
Kisoa mu Kitatenge
39 Gabede busi bwakya, balugi ba bwato tabamenyine kikyo kisi, tondo bamonine ku nkunda za kitatenge, zili n'isokelo lya misege, nu bakengede kwenda kubika bwato bwabo ga kiziki kikyo ndi bwakulungana. 40 Basulile nanga nu bazisigile zikoke mu kitatenge, nu bagondwede mizigi zibabezaga baswika kukukasia nkapi. Kusila babikile hema lwabusio lwa bwato buno lumpumpu lubusindike nu kubusondelezia ku mutili wabota. 41 Tondo babasile ga kiziki geli misege, gakulumanina bitatenge bibili, gago kansinsi ka bwato kakatilwe nunse geteli kutengatenga, tondo kyoba kyabo kyatikile na magala ma bimpumi. 42 Nu bakoloboyo babede na makengelo ma kwita bakandwa buno umozi wa mubo anavwa koga nu kutina. 43 Tondo mukota wa bakoloboyo atundaga konia Paulo, ububo, abananizie kukita anga bubabezaga bakukengela. Akakizizie buno babo beizi koga beiyise batangi mu mazi buno basoke ku muse, 44 nu bango basigede beikede gantata ga mbavu nu bango gantata ga bingo bintu bya bwato. Ububo bantu bansania basokile ku muse bulonge bukata.