Paulo Akulondola Mulondo Wage Lwabusio lwa Agripa
26
1 Agripa atendile Paulo bunee: “Wakaswa bwangato bwa kulondola mulondo wobe.” Nu Paulo alambizie kuboko nu kwitendela wenyene bunee: 2 “Mukota Agripa, nili na mbogimbogi lelo kukaswa bwangato bwa kwidondolela lwabusio lwobe ku bitondo binsania byansongede ku baYuda, 3 kubuno wizi nunse nkita za baYuda nu myango zabo. Ububo umpanga nkukusega buno unnungwilile na nkiki.
4 BaYuda bansania beizi bwabezaga kalamo kane, kutukila bwana bwane, beizi bunalamaga nabo kutukila ku kulinga, munkatini mwa kilongo kyane nu lingo ku Yerusalema. 5 Benizi kutukila wakalazi nu banabwitabizia ndi batunda kubulongeka, buno nalamine anga muFarisayo mu kuyanga meigisia meitu mabibu ma baFarisayo. 6 Nu kano kaluma, nabikwa ku lusungio kubuno nili na kilemanizio ky'idagano lyalagile Kalaga ku batateiswe. 7 Nu ku lilyo idagano, bilongo byeitu ikumi nu bibili bili na kilemanizio kumona ku kuzindilila ku idagano lilyo nu kwitila kukitila Kalaga musi nu kindi. Nu ku kabamba ka kilemanizio kikyo, ee, mukota, baYuda bakunsongela. 8 Kubuni mukukengela buno tabunakatizibwa, buno Kalaga akayukya bakuzi?
9 Kundi nnenyene, nakengede mu mutima wane buno natunganana kwikokomezia na magala nunse kusungia izina lya Yesu muNazareti. 10 U bunakitile kuko ku Yerusalema. Nakatile bwangato ku bakota ba basankoga nu nakandizie basililila beingi mu kikando; nu gababeitaga, nitabizagia nu nne bubo. 11 Mambizi meingi nabasungagia mu numba insania za misanganano nu nabasindikaga buno basombe bukatizio bwabo. Nabongedwe bubibu nunse anga musile nu kubababazia aaba nu ku miino za bugeni.
Paulo Akusambala Kugaluka Kwage
12 Nu mu mulimo wono u munendaga ku Damasiki na magala nu na bwangato bwankasile bakota ba basankoga. 13 Ku nkungu mutuba, ganabezaga mu nzila, ee mukota, namonine ku kyengi kyatuka mwigulu nu kyasanine mu ntungo mwane nu mwa babo banendaga nabo gamozi, nu kyasanine bukali kutinga kyengi kya musi. 14 Twagwede gansi beiswe bansania nu nungule ku iyuki lyatendaga na nne mu mutendezi wa kiEbrania bunee: ‘Saulo, Saulo, kubuni kuukumbabazia? Buli bubibu kuguli kwikuka magulu ku mikele.’ a 15 Nu nakwide bunee: ‘Uwe uli nazi Mukota?’ Nu Mukota atendile bunee: ‘Nili Yesu u ukubabazia. 16 Tondo emanuka nu emana kima, kubuno nakubasila buno nikubike mukiti nu mulongeki wa bitondo biwamonine kubyo nu wa bibyo binakulolesie lingo. 17 Nkakwonia munkatini mwa kilongo kikino nu munkatini mwa baBilongo babo banakusinga kubo. 18 Buno ubakandule meiso, buno ubagalukye kutuka ku kapilo nu kubasa ku kyengi, nu kubatikya mu magala ma Satana nu kuvwa ku Kalaga, buno ku kunkatizia basigililwe ku bwagi bwabo nu babe na bupieni gamozi na basililila.’
Paulo Akusambala Mulimo Wage
19 Ku bubo, ee mukota Agripa, nsyananine kwanza kalolesio ka mwigulu. 20 Tondo nigisizie tanga bantu ba ku Damasiki nu ba ku Yerusalema, mu kisi kinsania kya Yudea nu lingo ku baBilongo buno beiyanie nu kugalukila ku Kalaga nu bakite misako zikulolesia kwiyania kwabo. 21 Ku kabamba kako baYuda bankatile mu numba za kukumbamina nu bagelekile kunita. 22 Tondo ku mponga za kukasibwa na Kalaga, ukinsa nikinemana aaba nu ku busi bwa lelo, kwitila kulongekela bakeke nu bakulu banene. Aba nsikutenda kingo kitondo, umpanga kikyo kyatendilwe na balengania nu Musa buno kikabasa: 23 buno bwatunganana Kristo asungibwe nu abe mutangi wa kuyuka kutuka ku bakuzi nu asambale musagu wa kyengi ku kilongo kyeitu nu ku baBilongo.”
Paulo Akumana Agripa Kukatizia
24 Gabezaga Paulo akwitenda bubuno, Festo alalukile n'iyuki inene bunee: “Paulo, uli musile! Tugu, meigisia mobe meingi makukugalukya musile!” 25 Paulo amwakwide bunee: “Ee, mwiya lwanzo, nsili musile. Tondo bitondo binkutenda biligo nu bukungubwa. 26 Mukota Agripa eizi bitondo bibino nu nkumusambalilabyo geteli boba. Kubuno nizi nunse buno takuli kitondo kyampa ku bitondo bibino kyeteizi kubuno kitondo kikino takyakitilwe ku lumbisombiso. 27 Mukota Agripa ukukatizia balengania? Nizi buno ukubakatizia!” 28 Nu Agripa atendile Paulo bunee: “Ku bitondo bibino bikeke ukutunda kungalukya buno nibe muKristo!” 29 Paulo akwide bunee: “Ndi mu bikeke aba mu binene, nkusega Kalaga buno ta uwenyene tugu, tondo bansania bakunnungwilila lelo, babe anga bunili, tondo geteli bikando bibino!”
30 Mukota, nu mwangati, nu Berenike nu bansania babezaga beikala gansi gamozi nabo bemanukile, 31 kusila kwa kutuka gago batendenne bwabobwabo bunee: “Wono muntu ntakitile bubi bwampa bwatunganana kukwila kubo aba kukandilwa kubo.” 32 Nu Agripa atendile ku Festo bunee: “Muntu wono anatunganana kukandulwa gatanasegile kwenda kulondozibwa ku Kaisari.”