22
1 “Mibuto zane nu batatane, mungwilile bitondo binkumutenda kano kaluma buno nidongekele.” 2 Gabongule akutenda mu mutendezi wa kiEbrania, bitide nunse kwikala kibibi. Nu Paulo atendile bunee: 3 “Nili muYuda, nabutilwe ku Tarso ku Kilikia, tondo nakulile mu wono mwino nu ku magulu ma Gamalieli, nigisizibwe bubibu kumenya nunse lebelebe mulembe wa batateiswe nu nabede na magala manene ku Kalaga anga bumuli inyuwe bansania lelo. 4 Nasungizie nunse bantu bayangaga nzila za Mukota, aba nu kubeita, nakandaga bamulume nu bakikulu nu kubabika mu kikando. 5 Sankoga munene nu kibombo kinsania kya bakulu banavwama kundongekela ku bubo. Aba nu nakatile kubeli mikanda za mibuto zabo ba ku Damasiki kunendaga kukata babo babezagako buno nivwe nabo ku Yerusalema kubasungia.
Paulo Akusambala Bwagalukile
6 Ganabezaga nkwenda mu nzila nu kubasa bwigi na ku Damasiki, kitangalabesi, ku nkungu mutuba munkatini mwa musi, kyengi kinene kutuka kwigulu kyasanine kunsania mu ntungo mwane. 7 Nagwede gansi nu nungule ku iyuki lyantendile bunee: ‘Saulo, Saulo, kubuni kuukunsungia?’ 8 Nakwide bunee: ‘Uwe u nazi Mukota?’ Nu ambwide bunee: ‘Nili Yesu wa Nazareti, u ukusungia.’ 9 Babo babezaga gamozi na nne bamonine ku kyengi, tondo tabongule ku iyuki lya watendaga na nne. 10 Nabuzizie lingo bunee: ‘Nikite buni, Mukota?’ Nu Mukota antendile bunee: ‘Emanuka, enda ku Damasiki, nu kuko bakutende bunsania buwakakizizibwe kukita.’ 11 Nu gabede nsikuvwama kumona ku kampa ku kabamba ka kukelima kwa kikyo kyengi, babo banendaga nabo bankatile ku kuboko nu bansondelezizie ku Damasiki.
12 Kuko kwabezaga muntu umozi wamanagwa Anania wakuaga Kalaga boba nu kwanza milembe zeitu, nu baYuda bansania ba ku Damasiki bamulumbagia busoga. 13 Avule kundi, eikede bwigi na nne nu antendile bunee: ‘Saulo, mubuto wane, umone lingo!’ Nu ku nkungu zezo, namonine lingo nu namulolile. 14 Antendile bunee: ‘Kalaga wa batateiswe akusombwede nunse buno umenye kusombola kwage, nu umone ku wozo wisanana nu ungwe ku iyuki lya kanua kage. 15 Buno ube mulongeki wage kusambala lwabusio lwa bantu bansania biwamonineko nu biwungule kubyo. 16 Nu kano kaluma, kikizi kyukulindila lingo? Emanuka, ututikwe nu usugwe bwagi bwobe, nu sega mu izina lyage.’
Paulo Akusambala Bwasingilwe ku BaBilongo
17 Ganasubizie ku Yerusalema nu ganabezaga nkusega mu numba za kukumbamina, nendile kalengwe. 18 Nu namonine ku Mukota wantendile bunee: ‘Tuka lubilo ku Yerusalema, kubuno beiyamo tabeitabizie buukutenda ku kabamba kane.’ 19 Nu nakwide bunee: ‘Mukota, beizi bobenyene buno nendaga kunsania ku numba za misanganano nu nababikaga mu kikando nu kulibula babo bakukatizia. 20 Nu nkungu zibabasizie mikila za Stefano, mulongeki wobe, nne nabezaga gago. Nitabizizie kukua kwage gamozi na bango nu nalangile nsulu za babo bamwitile.’ 21 Mukota ambwide bunee: ‘Enda, kubuno nakusinge bulazi, ku baBilongo!’”
Paulo Akusambala Buno Eli MuRoma
22 Bantu bongwilide Paulo aaba nu nkungu zatendile bitondo bibyo, tondo ku nkungu zezo balalukile bunee: “Tikyazi muntu wono ga kisi! Ntakuka kulama!” 23 Nu balalukile n'iyuki inene, batede nsulu zabo nu beisile mukungu mu mpena. 24 Mukota wa bakoloboyo akakizizie buno beingizie Paulo mu numba nnene za bakoloboyo nu abuzibwe ku kumulibula na kasusula buno amenye ku kabamba kakizi bantu bamukitilaga kazege. 25 Tondo gaabezaga es'akandwa na mizigi buno bamulibule, Paulo abwide mukota umozi wa bakoloboyo wabezaga gago bunee: “Ndi muli na bwangato bwa kulibula muRoma na kasusula nu we ntesungibwa?” 26 Gongule ku bibyo bitondo, wozo mukota endile kukengelezia mukota wa bakoloboyo bunee: “Buni buukukita? Muntu wono eli muRoma!” 27 Mukota wa bakoloboyo avule ku Paulo nu amubuzizie bunee: “Mbule ndi uli muRoma?” Paulo akwide bunee: “Ee.” 28 Mukota wa bakoloboyo atendile lingo bunee: “Naligile bikulo byingi ku bwangato bwa kuba muRoma.” Nu Paulo akwide bunee: “Nne nili muRoma ku kubutwa.” 29 Kusila, babo balondaga kumubuzia kumulibula, batukile bwigi nage, nu mukota wa bakoloboyo wenyene abede na boba, nkungu zamenyine buno Paulo abezaga muRoma nu abezaga amukanda na makoki.
Paulo Eli Lwabusio lwa Lusu Lunene Lwa Milondo
30 Gakede busi, mukota wa bakoloboyo atundile kumenya lebelebe kubuni baYuda basongede Paulo, ku bubo, amukandwide makoki mage nu akakizizie bakota ba basankoga nu bakazi ba nango nnene buno bakundamane. Kusila agezizie Paulo nu amubikile lwabusio lwabo.