Paulo Akwenda ku Yerusalema
21
1 Nu gabede twasila kulekanuka nabo, twingide mu bwato nu twendile mu nzila zatinta aaba nu kubasa ku Kosi, nu gakede busi, twabasile ku Rodo, nu kutuka kuko twabasile ku Patara, 2 nu twasangile bwato bumozi bukusoka ku Foinike, twingide mubo, nu twendile mubo. 3 Nu gabede tuse twamona ku kisanga kya Kipuro, twakisigile ku lulenge lwa kwidume kwakyo, nu twatingile ku Suria, nu twemenne ku Tiro, kubuno bwato bwabezaga bwatunganana kukimizia mizigo gago. 4 Nu twasangile beigisibwa kuko, twikede nabo bindi mutubakamo, nu ku magala ma Muuza Wasililila, babwide Paulo buno ntabakame ku Yerusalema. 5 Tondo gatwazindilizizie bindi byeitu, twatukile nu twalingile lingo lugendo, nu bantu bansania batwelekezizie gamozi na bakikulu babo nu bana babo, aaba nu kubasa ku isula lya mwino. Twakomine mazu ku mutili nu twasegile. 6 Kumbusa kwa kulagana, twingide mu bwato, nu bo basubizie kwabo. 7 Nu gatwasilile lugendo lweitu mu kitatenge kutukila ku Tiro, twabasile ku Tolemai. Kuko twasambizizie mibuto zeitu, nu twatingizie nabo kindi kimozi. 8 Nu gakede busi, twatukile, nu twabasile ku Kaisaria, twingide mu numba za Filipo, musambazi wa Musagu Musoga, wabezaga umozi wa ku babo mutubakamo, twiyombekile kwage. 9 Wozo muntu abezaga na bakinga bage banazi batemenya wamulume, babezaga balengania. 10 Nu gatwikede kuko bindi byingi, kwabasile mulengania umozi kutuka ku Yudea, wamanagwa Agabo, 11 nu avule kutuli, atolile mukoma wa Paulo, eitendekile magulu nu maboko, nu atendile bunee: “Muuza Wasililila akutenda buno, u bubo bwabe wozo muntu mwiya wono mukoma, baYuda bakamutendeka anga bubuno ku Yerusalema, nu bakamugabula ku maboko ma baBilongo.”
12 Nu gatungule ku bubo, iswe nu beiya kikyo kiziki twasegile nunse Paulo buno ntabakame ku Yerusalema. 13 Tondo Paulo akwide bunee: “Ku kitondo kikizi mukulila nu kuntambia mutima? Kubuno nili kayikayika ta ku kukandwa tugu kankanka, tondo lingo kukua ku Yerusalema ku kabamba k'izina lya Mukota Yesu.” 14 Nu anga bwatazigile kukatizia butwatendaga, twikede kibibi, nu twatendile bunee: “Kusombola kwa Mukota kukitwe.”
15 Kusila kwa bindi bibyo, twakanine mizigo zeitu, nu twabakamine ku Yerusalema. 16 Beigisibwa bamozi kutuka ku Kaisaria batwelekezizie nu batusondelezizie ku numba za Munasoni, muntu wa ku kisanga kya Kipuro, mwigisibwa umozi ku babo batangi, buno twiyombeke kwage.
Paulo Akutabangila Yakobo
17 Gatwabasile ku Yerusalema, mibuto zeitu batusekede na mbogimbogi. 18 Gakede busi, Paulo eingide n'iswe kwa Yakobo kwabezaga kwakundamana bakulu bansania ba kanisa. 19 Paulo abasekede nu abasambalide bunsania bwakitile Kalaga ku kitondo na kitondo ku mulimo wage munkatini mwa baBilongo. 20 Gabongule ku bubo, baganwine Kalaga. Kusila batendile Paulo bunee: “Mubuto weitu, ukumona tununu tunga twa baYuda twasila kukatizia: babo bansania bakwanzaga mulembe wa Musa na magala. 21 Nu bo bongule ku musagu wobe buno ukwigisagia baYuda bansania babalangenne munkatini mwa baBilongo, kusiga milembe za Musa nu wabatendile buno tabamonesie lingo bana babo aba tabayange lingo nkita za baYuda. 22 Tukite buni? Kubuno lebelebe bongwe buno wabasile. 23 Kita bubuno butukukutenda. Tuli gano na bamulume banazi bakitile idagano. 24 Tola babano, wiyengie gamozi nabo nu ubaligile bikulo buno babegwe mumpugu nu bantu bansania bamenye buno wozo musagu u bongwagile kuguli uli wa buza; tondo uwenyene ukukita busoga, nu ukwanzaga milembe za Musa. 25 Ku babo baBilongo basilile kukatizia twabasanzide mukanda kubakakizia buno babembuke nyama insania zikubikwa ku nkisi, nu mikila, nu nyama zakamwa, nu batunganana kwidanga ku butazi.” 26 Nu gakede busi, Paulo atolile babo bamulume nu eiyengezie gamozi nabo, nu eingide nabo mu numba za kukumbamina, kusambala busi bukizi bukasila bindi bya kwengibwa, u kutenda buno, nkungu nkizi zibanavwama kukasana kayulo ku kabamba ka muntu na muntu.
BaYuda Bakata Paulo mu numba za Kukumbamina
27 Gabede bibyo bindi mutubakamo bise bwigi na kusila, baYuda ba mu kisi kya Asia bamonine ku Paulo mu numba za kukumbamina. Balubikanizie musanganano unsania wa bantu nu bamukatile, 28 balalukile bubibu bunee: “Bantu ba Israeli, tukasiazi! Lolazi, wono muntu akwigisagia bantu bansania ku biziki binsania buno basombe kilongo kya Israeli, nu kusomba mulembe wa Musa, nu kusomba numba zeno za kukumbamina. Nu kano kaluma, lingo akubika baGriki mu numba za kukumbamina nu kubika nsese ku kiziki kikino kyasililila!” 29 (Batendile bubo kubuno bamonine ku Trofimo, muEfeso, gamozi na Paulo mu mwino: bakengelaga buno Paulo amwingizizie mu numba za kukumbamina.) 30 Nu mwino unsania wangamine nu bantu bansania bakundamenne lubilo nu bakatile Paulo nu bamubulutile nu kumutikya mu numba za kukumbamina nu beigede nibi insania mu zezo nkungu. 31 Gabalondaga kwita Paulo, musagu wabasile ku mukota wa bakoloboyo buno Yerusalema unsania walubikana. 32 Nu kazanga kongo, atolile bakota ba bakoloboyo nu bakoloboyo, nu abasile lubilo kubabezaga. Nu bo, gabamonine ku wozo mukota wa bita nu bakoloboyo, bamenkede kulibula Paulo. 33 Mukota abasile ku Paulo, amukatile nu akakizizie bamutendeke na makoki mabili, kusila abuzizie bunee: “Nazi wono nu kikizi kyakitile?” 34 Bamozi mu wozo musanganano balalukile bubuno nu babo bango bungo. Ku kabamba ka buno mukota ntavwamine kumenya kibakutenda ku kitondo kya kazege, akakizizie buno Paulo abikwe mu numba nnene za bakoloboyo. 35 Mu nkungu zabasile Paulo gamozi nabo ku kyindo, bakoloboyo bamwekile ku kabamba ka magala mabibu ma kibombo kikyo, 36 kubuno musanganano wa bantu wamuyangaga nu kulaluka bunee: “Mwitazi!”
Paulo Akwidongekela
37 Nu gabede bese beingizia Paulo mu numba nnene za bakoloboyo, atendile ku mukota wa kibombo kya bakoloboyo bunee: “Ndi ninaba na bwangato kukutenda iyuki?” Nu mukota wa bakoloboyo amubwide bunee: “Ndi wizi kiGriki? 38 Ndi ta uwe u wozo muMisri widubikanizie bindi bibino nu wasondelezizie tununu tunazi twa banyagi mu kalula?” 39 Paulo akwide bunee: “Nili muYuda, nabutilwe ku Tarso ku Kilikia, muntu wa mwino uteli mukeke. Nkukusega nunse bwangato nitende ku bantu.” 40 Nu gabede mukota wa bakoloboyo amukasa bwangato, Paulo emenne ga kikyo kyindo nu abatengezizie kuboko; nu kwabede kibibi nunse nu Paulo abatendile mu mutendezi wa kiEbrania bunee: