Paulo Akwenda ku Makedonia nu ku BaGriki
20
1 Gasilile mulubu, Paulo akundamanizie beigisibwa nu gaasilile kubalindia, alagenne nabo nu endile ku Makedonia. 2 Atingile mu zezo ndenge nu abalindizie ku meigisia meingi nu abasile ku kisi kya baGriki. 3 Asigede kuko ku myezi isatu. Atundaga kwenda ku Suria na bwato, tondo ongule buno baYuda bamukalide lwango, ububo akengede kusubya ku nzila za Makedonia. 4 Bantu bendile gamozi nage ku Asia u babano: Sopateri, mwana wa Piro wa ku Beroya, lingo Aristarko nu Sekundo ba ku Tesalonika, Gayo wa ku Derbe, nu Timoteo, Tikiko nu Trofimo ba ku kisi kya Asia. 5 Babano batutangile lwabusio nu batulindide ku Troa. 6 Tubenyene, twendile ku Filipi kusila kwa kisagulo kya kampampa katagagibwa, nu kusila kwa bindi bitano, twabasangile ku Troa nu kuko twakitile bindi mutubakamo. Paulo Akuyukya Eutiko
7 Nu ku busi butangi bw'izinga, twakundamenne buno tubungule tumpampa, Paulo abasambalide nu atundaga kwenda busi bw'ibili mu nindunindu, ububo atendile bitondo byage byingi aaba nu kwika munkatini mwa kindi.
8 Nu ku bubo busio bwa kwigulu kutwabezaga twakundamana, mwabezaga tusuku twingi twagulumina. 9 Mwabezaga musikila umozi eikalaga g'idilisa lya numba, izina lyage Eutiko, nu azenzede na tulo, nu gabede Paulo alengelelwa na kwigisia, nu we alengeledwe na tulo, akolokile gansi kutukila ku nkiko z'isatu kwigulu, nu bamuzanzwide es'akua. 10 Nu Paulo agelile, agwede gantata gage, amukatile na maboko mage, ababwide bunee: “Tamuzangazange, kubuno eikili na kalamo!” 11 Nu abakamine lingo kwigulu, nu abungwide tumpampa, nu balide, nu asambede lingo nabo nkungu ndazi aaba nu gakede busi, kusila endile. 12 Nu bavule na musikila eli na kalamo, nu babobelede nunse.
Paulo Akwenda ku Mileto
13 Tondo iswe, twalingile kwenda na bwato aaba nu kubasa ku Asosi, twatundaga kweka Paulo anga bwatulagile, kubuno atundaga kwenda na magulu. 14 Gaatusangile ku Asosi, twamwekile nu twavule nage ku Mitilene. 15 Nu gatwatukile gago na bwato, twabasile bwigi na Kio; nu ku kindi kya bibili twabasile ku Samosi; twikede ku Trogilio, nu ku kindi kya bisatu twabasile ku Mileto. 16 Kubuno Paulo akengelaga kutinga ku Efeso na bwato, buno anavwa kwizizia mu Asia; kubuno alemaninaga kusasia, buno abase ku Yerusalema ku busi bwa Pentekoste ndi bwakulungana.
Paulo Akusambala na Bakulu ba Efeso
17 Paulo asingile musagu kutuka ku Mileto kwenda ku Efeso kumana bakulu ba kanisa. 18 Nu gababasile kweli, ababwide bunee: “Inyuwe mubenyene mwizi, kutukila busi butangi bunabasile mu Asia, lukita lukizi lunabezaga nalo kweinyu bindi binsania, 19 nakitilaga Mukota mu kwibotya kunsania, nu bisozi byingi nu malindiko manalindikilwe ku kabamba ka misona za baYuda; 20 nu nsyakule boba bwa kumusambalila bunsania bunamukasia, tondo namusambalide nu namwigisizie lwabusio lwa bantu bansania, nu ku numba na numba, 21 nalongekelaga baYuda nu baGriki kwiyania ku Kalaga, nu kuba na bukatizio ku Mukota weitu Yesu Kristo. 22 Nu kano kaluma nenda ku Yerusalema, anga bukunkakizia Muuza Wasililila, tondo nsikumenya kyambasileko. 23 Tondo nizi buno Muuza Wasililila akundongekela ku mwino na mwino, nu akumbula buno bikando nu mbabazio bikundindila kuko. 24 Tondo nsikukengela buno kalamo kane keli kena, nu takeli bukunza kundi kutinga kuzindilizia lugendo lwane nu mulimo u nakasilwe na Mukota Yesu, u kusambala Musagu Musoga wa mponga za Kalaga.
25 Kano kaluma, ungwililazi, nizi buno inyuwe bansania banasambalilaga musagu wa bukota bwa Kalaga munkatini mweinyu, tamukammonako lingo. 26 Kubuno nkumulongekela mu busi bwa lelo buno, nenga kubuno nsili na kabamba ku mikila za bantu bansania. 27 Kubuno nsyakutilwe na kumusambalila kusombola kunsania kwa Kalaga. 28 Idangazi, nu langazi kikyo kibombo kinsania kyamukasile Muuza Wasililila kulanga, nu kulisia kanisa ka Mukota, kaakunzile na mikila zage. 29 Nizi buno ganabe nenda kwane, mboa nkali zikavwa munkatini mweinyu zabalanganie kibombo; 30 aaba nu kumuli kukaba bakatenda bantu buteligo, buno balute beigisibwa kubayanga. 31 Ku bubuno, kesiazi ntende, nu mukengele buno nsyamenkile kumwana ku myaka isatu nu kumukengelezia muntu na muntu mu kindi nu mu musi na bisozi.
32 Kano kaluma nkumusiga mu maboko ma Kalaga, nu mu idagi lya mponga zage, linavwama kumukuzia, nu kumukasa bupieni na basililila bansania. 33 Nsyatonezie muntu wampa feza, aba olo, aba nsulu zage. 34 Inyuwe mwizi buno maboko mamano makitile buniyaninaga, nu ku bansania banabezaga nabo. 35 Ku bubo bunsania namulolesia kisusania kya kukokomezia mulimo, bwatunganana kukasia batamba, nu kukengela malagi ma Mukota Yesu anga bwatendile We wenyene bunee: ‘Kukasana kukubogiabogia kutinga kukaswa.’”