Paulo ku Efeso
19
1 Gabezaga Apolo ku Korinto, Paulo atingile kuntata kwa kikyo kisi nu abasile ku Efeso. Asangile beigisibwa bamozi: 2 nu ababuzizie bunee: “Ndi mwakasilwe Muuza Wasililila gamwakatizizie?” Nu bamwakwide bunee: “Kilo, tatungule buno Muuza Wasililila eliko.” 3 Nu ababuzizie bunee: “Mwatutikilwe ku lututiko lukizi?” Nu bamwakwide bunee: “Ku lututiko lwa Yoana.” 4 Nu Paulo ababwide bunee: “Yoana atutikile lututiko lwa kwiyania, kubuno atendile bantu buno bakatizie wozo ukavwa kumbusa kwage, u Yesu.” 5 Nu bo gabongule ku bubo, batutikilwe mu izina lya Mukota Yesu. 6 Nu gasilile Paulo kubabika maboko, Muuza Wasililila avule gantata gabo, nu balingile kutenda mu ingo mitendezi, nu kulengania. 7 Nu babezaga bakuka bamulume ikumi nu babili. 8 Paulo eingide mu numba za misanganano nu ku myezi isatu, eigisizie na bupuka. Eigisagia bitondo bya bukota bwa Kalaga nu alondile kuluta bamungwililaga. 9 Tondo bango babede na mitima mibibu nu tabakatizizie, nu balingaga zezo Nzila za Kalaga lwabusio lwa bantu beingi, nu atukile kubeli, nu alekanukizye babo beigisibwa, nu abeigisizie busi na busi mu kigilo kya Tirano. 10 Nu akitile bubo ku myaka ibili; nu bansania beikalaga mu Asia, baYuda nu baGriki, bongule ku idagi lya Mukota.
Paulo Akukita Miganogano
11 Nu Kalaga akitile migeleko mingi, ku maboko ma Paulo. 12 Ububo bavwilide basambi na nsulu nu tube twa nsulu twitubagia ku mubili wage nu nsambo zonine nu basumbu babi batukile mubeli. 13 Nu bantu bamozi ba baYuda babezaga bagila bakutikya basumbu, nu nako nako kubendaga, bagelekile kutekula izina lya Mukota Yesu ku babo babezaga na basumbu babi, nu batendaga bunee: “Tukukulumbizia mu izina lya Yesu, wozo ukusambalwa na Paulo.” 14 (Nu babo bakitaga bubo, babezaga bana mutubakamo ba muntu umozi muYuda, wamanagwa Sikewa, nu we abezaga sankoga munene.) 15 Nu wozo musumbu ababwide bunee: “Yesu nimwizi, nu Paulo nimwizi; tondo inyuwe muli banazi?” 16 Nu wozo muntu wabezaga na musumbu eidekede kubeli, nu abasolobokede bansania, nu abakindile, nu babasile mu zezo numba lubilo, nu bavule bese mundulu nu byulu. 17 Nu musagu wono wamenyinwe na baYuda nu baGriki, babezaga ku Efeso; nu bansania babede na boba bunene, nu izina lya Mukota Yesu lyaganwinwe. 18 Nu beingi bakatizizie bavule kwigonga nu kulolesia misako zabo mibi. 19 Nu beingi ba ku babo babezaga bagila bakungikile bigondi bya mikanda byabo, nu bavule nabyo ku meiso ma bantu bansania, nu babigisizie; gabaganzile bukunza bwabyo, bamonine buno buli tununu makumi matano twa feza. 20 Bubo idagi lya Mukota lyitide nu lyabede nunse na magala.
Paulo Akutunda Kwenda ku Roma
21 Nu kusila kwa bubo, Paulo akengede buno atinge ku Makedonia nu ku Akaya, bubo nti enda lingo ku Yerusalema, atendile bunee: “Ganabe nabasa kuko, natunganana kubasa nu ku Roma.” 22 Nu gaasingile bantu babili kwenda ku Makedonia, ku babo bamukambilaga, Timoteo nu Erasto, we wenyene asigede bindi bimozi ku Asia.
Bantu ba ku Efeso Bakusakya Paulo
23 Ku nkungu zezo, kwabede myango minene ku kitondo kya nzila za Kalaga. 24 Kubuno kwabezaga muntu umozi, izina lyage Demetrio, abezaga mutumbi wa feza, we akitaga twamasio twa feza twa Artemi, amonenne bango batumbi mutali mwingi. 25 Akundamanizie bango bakitaga mulimo anga wono nu abatendile bunee: “Bamulume, mwizi buno bikulo byeitu bikumoneka mu mulimo wono. 26 Nu lingo mukungwa nu mukumona buno, ta gano kankanka ku Efeso, tondo bwigi kisi kinsania kya Asia, wono Paulo alubikania bantu beingi nu abagalukya, nu atendile bunee: ‘Bibyo bikukitwa na maboko ma bantu tabili tulaga.’ 27 Ububo tuli gabibu buno ta milimo zeitu tugu kankanka u zabengwe, tondo nu numba za kukumbamina za mukikulu munene Artemi, zabengwe nu lutanuno lwage nti lwabe buliabulia, nu we u ukukumbaminagwa kunsania mu Asia, nu mu kisi kinsania.”
28 Nu gabongule ku bubo, bobansania bongilwe, nu balalukile nunse bunee: “Artemi wa baEfeso eli munene!” 29 Nu mwino unsania walubikenne; nu beitumine lubilo ku numba za meiya na mutima umozi, babezaga bese basila kukata Gayo nu Aristarko, babo ba ku Makedonia bendaga gamozi na Paulo. 30 Nu Paulo atundaga kwingila munkatini mwa bantu, tondo beigisibwa tabazigile buno eingile. 31 Nu bantu bamozi banene ba ku Asia babezaga beida bage, bamusingide musagu buno ntende ku numba za meiya. 32 Umpanga bamozi balalukaga bumozi nu bango bungo, kubuno musanganano walubikenne nunse; nu beingi tabamenyininne bubakundamaninaga, 33 nu batikizye Alesanduro munkatini mwa musanganano, nu baYuda bamusindikile lwabusio lwa bantu, nu Alesanduro atengezie kuboko, kubuno atundaga kutenda ku bantu. 34 Tondo gabamenyininne buno eli muYuda, bansania balalukile bwigi ku nkungu ibili, batendaga bunee: “Artemi wa baEfeso u munene!”
35 Nu wozo wabezaga musanzi wa mu mwino wozo abotezie musanganano, nu atendile bunee: “Inyuwe bamulume baEfeso, nazi muntu uteizi buno mwino wa Efeso u gukulangaga numba za kukumbamina za Artemi munene, nu nkisi zeno zakolokile kwigulu. 36 Kubuno bubuno tabunavwama kwakanibwa, ikalazi kibibi, tamunayangilila bubuno. 37 Kubuno mwavule na bamulume babano tabeibile bya mu numba za kukumbamina, aba tabalingile kalaga keitu ka mukikulu. 38 Umpanga ndi Demetrio nu batumbi banyage, ndi beli na mulondo na muntu, nti bindi bya milondo biliko nu ngatu ziligo; kasi basongelane. 39 Tondo ndi mwalonda ingo milondo, kasi nti zikalondolwa ku ungo musanganano wa lusungio. 40 Tuli na boba buno tunavwa kusongelwa ku wono mulondo wa lelo kubuno takuli bwampa bunamenywa kwisula bitondo bibino.”
41 Nu gaasilile kutenda bubo, abalanganizie musanganano unsania.