Paulo ku Korinto
18
1 Kusila kwa bubo Paulo atukile ku Atene, nu endile ku Korinto. 2 Nu asangile muYuda umozi izina lyage Akila, abutidwe ku Ponto, nu we atukilaga ku kisi kya Italia nu mukikulu wage Prisila, kubuno Mukota Klaudio akakizizie baYuda bansania buno batuke ku Roma: nu Paulo abendede; 3 nu kubuno mulimo wabo wa kuluka wabezaga wasusanania, eikede nabo, nu bakitile mulimo gamozi, kubuno babezaga baluki ba numba za hema. 4 Nu eigisizie mu numba za misanganano ku busi na busi bwa Kumunwa, u Sabato, nu agelekile kugalukya baYuda nu baGriki. 5 Tondo gabasile Sila nu Timoteo batukaga ku Makedonia, Paulo eikasenne na mutima umozi ku idagi, nu alongekede baYuda buno, Yesu u Kristo, 6 Nu gabamwendezie myango nu kulinga Kalaga, atitwide nsulu zage nu abatendile bunee: “Mikila zeinyu zibe gantata ga matoe meinyu; kubuno nne nenga; kutukila kano kaluma nkwenda ku baBilongo.” 7 Nu atukile kuko, nu eingide mu numba za muntu umozi, izina lyage Tito Yusto, akumbaminaga Kalaga, numba zage zabezaga zalandikana na numba za musanganano. 8 Nu Krispo abezaga mwangati wa numba za misanganano akatizizie Mukota gamozi na ba numba zage bansania; nu baKorinto beingi gabongule ku bubuno bakatizizie nu bo, nu batutikilwe.
9 Nu Mukota atendile ku Paulo mu kindi ku kalolesio bunee: “Ntukue boba, tondo tendaga tugu, nu ntwikale kibibi: 10 kubuno nili nobe, nu takuli muntu wakulibule aba kukwita: kubuno nili na bantu beingi mu wono mwino.” 11 Nu Paulo eikede kuko mwaka umozi nu myezi mutuba gamozi nabo nu abeigisizie idagi lya Kalaga.
12 Tondo gabezaga Galio mukota wa Akaya, baYuda bakatile Paulo nu bavule nage ku lusu lwa milondo, 13 Batendile bunee: “Muntu wono asila kwigisia bantu bayange Kalaga buteli bulingilingi na mulembe.”
14 Nu Paulo atundaga kutenda tondo Galio atendile baYuda bunee: “Gabunabede mibi aba bwagi, songo ninamungwilide inyuwe baYuda; 15 tondo ndi buli mbuzio za moki nu meina nu mulembe weinyu, kasi longekazibo inyuwe mubenyene; kubuno nsili ngatu za bitondo bibino!” 16 Nu abeimbizie buno batuke bwigi na lusu lwa milondo. 17 Nu bansania bakatile wozo Sositeni, mwangati wa numba za musanganano, nu bamulibwide bwigi na lusu lwa milondo nu wozo Galio ntangile bubo.
Paulo Akusubya ku Antiokia
18 Nu Paulo, eizizizie kuko, kusila alagenne na mibuto zage, nu endile na bwato ku Suria; nu Prisila nu Akila bendile gamozi nage, lwabusio lwa kwenda asilile kwibega mumpugu kuko ku Kenkurea kubuno abezaga akita kilumbilo. 19 Nu gababasile ku Efeso, abasigile kuko: nu we wenyene eingide mu numba za misanganano nu eigisizie baYuda. 20 Nu bo batundaga buno eizizie nabo, tondo we ntazigile; 21 tondo alagenne nabo bunee: “Natunganana kubasa ku kisagulo ku Yerusalema tondo nasubye lingo kumuli ndi Kalaga atunda.” Nu atukile na bwato ku Efeso.
22 Gaabasile ku Kaisaria, abakamine ku Yerusalema, asekede kanisa, nu agelile ku Antiokia. 23 Nu geizizizie kuko, atukile nu atingile mu kisi kya Galatia, nu ku Furigia, ku mwino na mwino kulindia beigisibwa.
24 MuYuda umozi izina lyage Apolo, abutidwe ku Alesanduria, muntu wabezaga na lwatu, abasile ku Efeso; nu we amenyaga nunse masanzo. 25 Wozo muntu eigisizibwe nzila za Mukota; nu kubuno abezaga n'iyilili, alingile kutenda nu kwigisia nunse musagu wa Yesu, abezaga eizi tugu lututiko lwa Yoana; 26 nu alingile kutenda geteli boba mu numba za misanganano. Tondo Prisila nu Akila gabamungule, bendile gamozi nage ku numba zabo, bamusambalide nzila za bulili za Kalaga, 27 Lingo, gatundile Apolo kusoka ku Akaya, mibuto zamugugumanizie nu basanzile mukanda ku beigisibwa ba kiziki kikyo buno bamusekele busoga. Gaabasile kuko, abede mukasia musoga ku babo babezaga bakatizia mu mponga za Kalaga. 28 Kubuno akindile nunse baYuda lwabusio lwa bantu bansania, abalolesagia mu Masanzo Masililila buno Yesu u Kristo.