Paulo nu Sila ku Tesalonika
17
1 Umpanga batingile ku Amfipoli, nu ku Apolonia, nu babasile ku Tesalonika kwabezaga numba za misanganano za baYuda. 2 Anga lukita lwage, Paulo eingide mu numba za misanganano nu ku bindi bisatu bya Sabato, asambede gamozi nabo mu masanzo, 3 asambede nu alongekile buno bwatananina Kristo kubabazibwa, nu kuyuka kutuka ku bakuzi; nu “Wono Yesu, u nkumusambalila musagu wage, u Kristo.” 4 Nu bamozi bakatizizie nu bagomezie na Paulo nu Sila; nu baGriki beingi nu bakikulu beingi banzagwa. 5 Tondo baYuda babede na lugi, batolile bantu babi ba nkita mbi nunse, nu bakundamanizie musanganano, nu bakitile kazege mu mwino unsania; nu bakindukile ku numba za Yasoni, kubuno batundile kubuluta Paulo nu Sila buno babalusie ku bantu. 6 Tondo gabatabasangilemo, babulutile Yasoni nu ingo mibuto zage lwabusio lwa bakota ba mwino, nu balalukile bunee: “Bantu babano balubikania kisi kinsania beseli gano, nu Yasoni abasekede. 7 Nu babano bansania bakukagula milembe za Kaisari, nu bakutenda buno kuli ungo Mukota ukumanwa Yesu.” 8 Nu musanganano nu bakota ba mwino gabongule ku bubuno bongilwe. 9 Nu bo gabasilile kuligia Yasoni nu bango bikulo, babamenkile.
Paulo nu Sila ku Beroya
10 Kazanga kongo, mibuto zabo basingile Paulo nu Sila munkatini mwa kindi ku Beroya; nu bo gababasile kuko beingide mu numba za misanganano za baYuda. 11 Bantu babano babezaga basoga kutinga baTesalonika, kubuno bakatizizie musagu wa Kalaga na lutundo lusoga nunse, nu na busi na busi, bagelenzulaga mu Masanzo, kulola buno ndi bubuno buligo. 12 Ku bubuno bantu beingi kubeli bakatizizie; nu bakikulu baGriki banzagwa, nu bamulume beingi. 13 Tondo gongule baYuda ba ku Tesalonika ku misagu za buno Paulo akusambala idagi lya Kalaga ku Beroya, bendile kuko kubalangania musanganano. 14 Nu kazanga kongo mibuto basingile Paulo kwenda ku kitatenge: tondo Sila nu Timoteo basigede gago. 15 Babo basondelezagia Paulo bendile nage ku Atene. Basubizie ku Beroya n'ikakizio lya Paulo ku Sila nu ku Timoteo, buno basasie kumuyanga.
Paulo ku Atene
16 Umpanga Paulo, gaabalindide ku Atene, mutima wage winine nunse gaamonine ku lukita lwiyala wozo mwino na nkisi ningi. 17 Umpanga akanizanizie na baYuda nu bo banzaga Kalaga mu numba za misanganano, nu mu isoko bindi binsania na babo bakulumenne nage. 18 Nu beiya menge bamozi baEpikurio nu baStoiko bakulumenne nage. Nu bamozi batendile bunee: “Muntu wono eizi bwingi, buni bwakutunda kutenda?” Bango batendile bunee: “Akumoneka anga musambazi wa misagu za tungo tulaga tututeizi.” Kubuno abezaga akusambala musagu wa Yesu nu iyukilo. 19 Batendile bubo bamukatile nu bendile nage lwabusio lwa lusu lwa Areopago nu bamutendile bunee: “Tukutunda kumenya buno meigisia mamano mato mokusambala meli buni? 20 Kubuno walusia bungo bututeungwaga ku matuzi meitu, ukinsa tukutunda kumenya bwisulilwa bwa bubuno.” 21 (Kubuno baAtene nu bageni babezaga kuko, tababezaga na bungo, umpanga kusambala aba kungwa ku ingo misagu.)
Paulo Akusambalila Bantu ba Atene Musagu wa Yesu
22 Nu Paulo emenne mu Areopago nu atendile bunee: “Inyuwe bamulume ba Atene, mu bunsania nkumona buno, muli na mpala ningi. 23 Kubuno ganatingile namonine ku bibyo bimukukumbaminaga, nu namonine ku kiziki kya kayulo kyasanzwa buno, ‘KU KALAGA UTAKUMENYWA.’ Umpanga wozo u mukukumbamina nu tamukumumenya, u wozo u nkumusambalila musagu wage. 24 Kalaga wozo wakitile kisi nu igulu, nu binsania bilimo, eli Mukota wa mwigulu nu kisi nu ntaneikala mu numba zakitilwe na maboko ma bantu; 25 aba ntakukitilagwa na maboko ma bantu, anga buno akwiyaninaga kampa, kubuno wenyene ukukasaga bansania kalamo, nu muuza, nu binsania; 26 nu We mu muntu umozi akitile kilongo na kilongo kya bantu, buno beikale ga kisi kinsania, nu asilile kubika nkiko zakakizizie kutukila wakalazi, nu myaga za biziki byabo; 27 buno balonde Kalaga, nu kubabatababata buno embe banamumonako nu We nteli bulazi ku muntu na muntu mutuli: 28 Kubuno
‘Mweli tukulama, nu tukutabanga, nu tuli na
kalamo keitu;’ anga bwasanzile basanzi beitu bunee:
‘Kubuno iswe bansania tuli kikanga kyage.’
29 Umpanga ndi tuli kikanga kya Kalaga, ta busoga kukengela buno Kalaga eli anga olo, aba feza, aba ikozi lyabazilwe na menge ma makengelo ma bantu. 30 Nkungu zezo za bukongolo Kalaga ntazilolaga; tondo kano kaluma akakizia bantu bansania ku biziki binsania beiyanie: 31 kubuno abikile busi bwakasungia kisi mu kwisanana, ku Muntu waabikile ku mulimo wono; nu akasile bantu kilemanizio, kubuno amuyukizie kutuka munkatini mwa bakuzi.”
32 Umpanga gabongule ku musagu w'iyukilo lya bakuzi, bamozi basekile; nu bango batendile bunee: “Twakungwilile lingo ku wono musagu.” 33 Bubo Paulo abasigile. 34 Tondo bantu bamozi bamuyangile, nu bakatizizie, munkatini mwabo mwabezaga wozo Dionisio wa Areopago, nu mukikulu umozi izina lyage Damari, nu bango bantu gamozi nabo.