Timoteo Akwenda na Paulo nu Sila
16
1 Paulo abasile ku Derbe nu ku Listra: nu kwabezaga mwigisibwa umozi wamanagwa Timoteo, mwana wa mukikulu umozi muYuda mukatizia; tondo isi abezaga muGriki. 2 Muntu wozo abezaga akulumbibwa busoga na mibuto zage zikalaga ku Listra nu ku Ikonio. 3 Paulo atundile kwenda gamozi nage; nu amukatile nu amumonesizie ku kabamba ka baYuda babezaga mu kikyo kiziki kubuno bansania babezaga beizi buno isi abezaga muGriki. 4 Nu gababezaga bakutinga mu miino babasambalide mamo makakizio makakizizibwe na basingwa nu bakulu babezaga ku Yerusalema. 5 Makanisa meidindikile mu bukatizio nu mitide kuba meingi busi na busi. Ku Troa Paulo Akumona ku Kalolesio
6 Batingile mu kisi kya Furigia, nu kya Galatia kubuno bazugidwe na Muuza Wasililila kusambala musagu musoga mu Asia; 7 gababasile bwigi na Misia, bagelekile kwenda ku Bitinia, tondo Muuza wa Yesu tawabakasile bwangato; 8 nu batingile ku Misia, bendile ku Troa. 9 Mu kindi, Paulo amonine ku kalolesio kumulolesia muntu wa ku Makedonia emana nu amusegile nunse bunee: “Soka, uvwe ku Makedonia kutukasia.” 10 Nu gaasilile kumona ku kalolesio kakano, kazanga kongo twatundile kwenda ku Makedonia, kubuno twamenyine buno Kalaga atumana buno twende kubasambalila Musagu Musoga.
Ludia Akukatizia Mukota ku Filipi
11 Twatukile ku Troa nu twendelede nunse mu bwato nu kubasa ku kisanga kya Samotirake nu gakede busi, twabasile ku Neapoli. 12 Kutuka kuko, twendile ku Filipi, u mwino mutangi wa lulenge lwa ku Makedonia nu kikyo kisi kyabezaga kunsi kwa bwangato bwa baRoma, nu twizizizie mu mwino wozo. 13 Busi bwa Kumunwa, u Sabato, twatukile kumbuga kwa lwibi lwa mwino wozo nu kwenda ku mutili wa luuzi kutwakengelaga buno kwabezaga kiziki kya kusega. Twikede gansi nu twatendile na bakikulu babezaga bakundamana kuko. 14 Umozi wa mu babo bakikulu batungwililaga amanagwa Ludia, atukile ku mwino wa Tuatera, abezaga mukunzia wa nsulu nsoga zakisimana nu akumbaminaga Kalaga. Mukota akandwide mutima wage kungwilila bunsania bwatendaga Paulo. 15 Nu gaasilile kututikwa we gamozi na ba numba zage, atubuzizie bunee: “Ndi mwamona buno niseli mukatizia wa Mukota, kasi ingilazi mu numba zane, nu nti mwikala muzo.” Nu atulutile nunse.
Paulo nu Sila Bakandwa ku Filipi
16 Gatwabezaga tuse twenda ku kiziki kya kusega mukikulu mukiti umozi atuyangile, abezaga na musumbu wa kulagula bitondo, avwilaga bakota bage na mutali mwingi mu bulengania bwage. 17 Wozo atuyangile, iswe nu Paulo, alalukile bunee: “Bantu babano beli bakiti ba Kalaga, Wozo Wasakama Nunse, bakumusambalila nzila za lonio.” 18 Nu akitaga bubuno bindi byingi. Ku kuzinda, Paulo akutilwe nage, agalukile kumbusa nu atendile wozo musumbu bunee: “Nakukakizia ku izina lya Yesu Kristo, tuka mweli!” Nu amutukile mu nkungu zezo. 19 Tondo bakota bage, gabamonine buno kilemanizio kya mutali wabo kyabazimina, bakatile Paulo nu Sila, nu bababulutile ku isoko ku bakota ba mu wozo mwino. 20 Nu babalusizie ku bangati, batendile bunee: “Bantu babano bakulubikania mwino, nu bo beli baYuda, 21 nu lingo bakwigisia lukita luteli lwa bumba bweitu buno tulukate nu kuluyanga, tondo beiswe tuli baRoma.” 22 Nu musanganano unsania wabemanukide; nu bangati babakungwide nsulu zabo nu bakakizizie basusulwe na tususu. 23 Nu gabasilile kubalibula bubibu, bababikile mu kikando, bakakizizie mulangi wa kikando buno abalange nunse busoga. 24 Nu gakakizizibwe bubuno, ababikile ku busio bwa kuzinda bwa kikando nu abakandile magulu mu mbavu.
25 Munkatini mwa kindi, Paulo nu Sila basegaga nu beimbaga nimbo za kuganuna Kalaga, nu bango bakandwa babongwilide. 26 Kitangalabesi, kwabezaga kaningini kanene katengezietengezie kisi aba nu bibanza bya kikando byatengiletengile, nu kazanga kongo nibi insania zigukile; nu miyololo za bantu bansania zakandukile. 27 Nu mulangi wa kikando, gaayukile nu kumona buno nibi za kikando ziguka, atolile mwene wage nu atundaga kwiyita, akengelaga buno bakandwa basila kutina. 28 Tondo Paulo alalukile n'iyuki inene bunee: “Ntwiyite; kubuno iswe bansania tuli gano!” 29 Mulangi wa kikando asegile kasuku nu eingide mu numba na boba nu kugilimina, agwede ku magulu ma Paulo nu Sila, 30 nu ababasizie kumbuga nu atendile bunee: “Bakota, nikite buni buno nonibwe?” 31 Nu batendile bunee: “Katizia Mukota Yesu nu uwe nti wonibwe, uwe nu ba numba zobe.” 32 Nu bamusambalide idagi lya Mukota gamozi na bansania babezaga ku numba zage. 33 Nu endile nabo mu kindi ku nkungu zezo, nu asugile byulu byabo; nu atutikilwe, we nu ba numba zage insania. 34 Nu avule nabo mu numba zage, nu abayikide idia, nu abogilebogile nunse, we nu bansania ba numba zage, kubuno es'akatizia Kalaga.
35 Tondo gakede busi, ngatu basingile bakoloboyo banene, batendile bunee: “Sigazi bantu babo beiyendele.” 36 Nu wozo mulangi wa kikando asambalide Paulo bubuno, atendile bunee: “Ngatu batenda buno tumusige mwiyendele; umpanga kano kaluma tukazi, nu mwiyendele na bubobelelo.” 37 Tondo Paulo abatendile bunee: “Batulibwide nu bantu bansania bakumona geteli kutulondozia, nu iswe tuli baRoma, nu batubikile mu kikando; nu kano kaluma bakututikya ku lumbisombiso? Kilo, tondo bobenyene bavwe tugu kututikya.” 38 Bakoloboyo banene babwide ngatu bubo; nu bakule boba gabongule buno beli baRoma; 39 nu bavule na moki mabota kubeli; gabababasizie, babasegile batuke mu mwino wozo. 40 Nu gabatukile mu numba za kikando, beingide mu numba za Ludia, nu gabamonine ku mibuto zabo, babalindizie nu kusila, bendile.