Musanganano wa ku Yerusalema
15
1 Bantu bamozi batukile ku Yudea kwenda ku Antiokia nu balingile kwigisia mibuto zabo bunee: “Ndi tamwamonesibwa ku lukita lwa mulembe wa Musa nti tamunavwama konibwa.” 2 Paulo nu Barnaba bakananizanizie nabo nu kwabede myango minene ku kitondo kikyo. Nu balongekile buno Paulo nu Barnaba nu bango bantu bamozi ba ku Antiokia bende ku Yerusalema kubuzania na basingwa nu na bakulu ku kitondo kikyo. 3 Ububo bantu ba kanisa babasindikizizie ku lugendo lulo. Batingile mu Foinike, nu mu Samaria, basambede kugaluka kwa Babilongo ku Kalaga: musagu wozo wabogeziebogezie nunse mibuto insania. 4 Gababasile mu Yerusalema, basekedwe na kanisa, na basingwa nu na bakulu; nu babasolede bunsania bwabakitide Kalaga. 5 Tondo bamozi ba ku lulenge lwa baFarisayo babezaga bakatizia bemanukile nu kutenda bunee: “Bwatunganana kumonesia babo bakatizia ba baBilongo nu kubakakizia kwanza mulembe wa Musa.”
6 Basingwa nu bakulu bakundamenne kulongeka kikyo kitondo. 7 Gabasilile kwakanania nkungu ndazi, Petro emanukile nu atendile bunee: “Mibuto zane, mwizi buno mu bindi bya kulinga, Kalaga ansombwede mumuli buno ku kanua kane, baBilongo bongwe ku idagi lya Musagu Musoga nu kulikatizia. 8 Nu Kalaga wizi mitima za bantu abalongekede, nu abakasile Muuza Wasililila anga bwatukasile We nu iswe; 9 Nu ntengukanizie gatusamba nabo, engezie mitima zabo na bukatizio. 10 Kano kaluma kubuni kumukutunda kugeleka Kalaga nu kwekya bakatizia muzigo utavwamine kweka batateiswe aba iswe? 11 Tondo iswe twakatizia buno ku mponga za Mukota Yesu, tukonibwa mu lukita lumozi anga bo.”
12 Nu musanganano unsania wikede kibibi; nu bongwilide Barnaba nu Paulo bubabasambalilaga misagu za migeleko nu miganogano zabakitide Kalaga ku baBilongo. 13 Nu gabeikede kibibi, Yakobo abwide bunee: “Mibuto zane, munungwilile!” 14 Simoni asila kutusambalila lukita lwalingile Kalaga kulola ku baBilongo buno asombole bantu munkatini mwabo ku izina lyage. 15 Nu moki ma balengania meli bumozi na mamano anga bumasanzilwe bunee:
16 ‘Kusila kwa bubuno, nasubye numba za Davidi,
Nalongeke lingo byindi bibyo byagwede nu nazimike,
17 Nkakita bubo ku bana ba bantu basigede bakulonda Mukota,
Nu ku baBilongo bansania bakutekulwa ku izina lyane,
U bukutenda Mukota, ukukita bitondo bibino.
18 Nu Kalaga amenyine bitondo binsania kutukila wakalazi.’ a
19 Ku bubuno Yakobo abakakizizie bunee: “Tatuzangiezangie baBilongo bakugaluka ku Kalaga. 20 Tondo tubasanzile mukanda buno beibembukye na nsese za nkisi ga kisi, nu butazi, nu nyama zakamwa, nu na mikila. 21 Kubuno Musa kutukila wakalazi aaba nu kano kaluma, eli na basozi bakusambala musagu wage ku numba za misanganano mu mwino na mwino nu bakusomaga busi na busi bwa Kumunwa, u Sabato.”
22 Umpanga, basingwa, bakulu, nu kanisa kansania, bamonine buno buli busoga kusombola bamozi munkatini mwabo nu kubasinga ku Antiokia gamozi na Paulo nu Barnaba. Basombwede Yuda, wamanagwa Barisaba, nu Sila, bantu banene munkatini mwa mibuto. 23 Babasingile na mukanda u basanzile bunee:
“Basingwa nu bakulu nu mibuto zeitu, twasinga samba ku mibuto zeitu baBilongo bakwikalaga ku Antiokia, ku Suria nu ku Kilikia. 24 Kubuno tungule musagu buno bango bantu batukile kutuli, bamuzangiziezangizie na bitondo byabo nu iswe tatwabakakizizie bubo, tondo batundaga kugalukya makengelo meinyu, 25 twakalile lwango lumozi, twakengede buno, busoga tusombole bantu, tubasinge kumuli na batundwa beitu, Barnaba nu Paulo, 26 babo bakasenne kalamo kabo ku kabamba k'izina lya Mukota weitu, Yesu Kristo. 27 Umpanga, twasinga Yuda nu Sila, bamusambalile bibino bitondo bobenyene na tunua twabo. 28 Kubuno bwatananina Muuza Wasililila, nu iswe, buno tatubike ungo muzigo kumuli tondo wozo wakuka; 29 buno mwibembukye na binsania byakasanwa ku nkisi, nu mikila, nu nyama zakamwa, nu butazi, ndi mwizugile ku bibino nti mwakita busoga. Musigale busoga.”
30 Nu bo gabasilile kukaswa bwangato, bakumbile ku Antiokia: nu gabakundamanizie musanganano unsania kuko babakasile mukanda. 31 Nu bo gabasilile kugusoma, babogilebogile n'iyano lilyo. 32 Yuda nu Sila babezaga balengania nu bo bobenyene banine mibuto zabo bubibu bitondo byingi, nu babalindizie nunse. 33 Nu gabeikede kuko ku bindi bikeke, mibuto zabo babalagile bunee: “Endazi na bubobelelo ku babo bamusingile.” 34 Tondo Sila amonine buno buli busoga kwikala kuko.
35 Nu Paulo nu Barnaba beikede ku Antiokia, kwigisia nu kusambala musagu wa Mukota gamozi na bantu beingi.
Paulo nu Barnaba Bakulekanuka
36 Nu gatingile bindi bimozi, Paulo abwide Barnaba bunee: “Tusubye, twende kulola mibuto zeitu mu miino insania zitwasambede muzo idagi lya Mukota, nu tulole buni bubeli.” 37 Nu Barnaba atundile kwenda na Yoana wamanagwa buno Marko. 38 Tondo Paulo akengede buno, ta busoga kwenda na wozo wabasigile ku Pamfilia nu ntendile nabo mu mulimo. 39 Nu babezaga na myango minene nu balekanukile, nu Barnaba atolile Marko nu asokile nage ku Kipuro: 40 tondo Paulo asombwede Sila, nu endile nu asegedwe na mibuto buno akaswe mponga na Mukota. 41 Nu atingile ku Suria nu ku Kilikia, kulindia makanisa.