Kugalukibwa kwa Paulo wozo wamanagwa Saulo
9
1 Tondo Saulo itide kwitia beigisibwa ba Mukota boba kubuno alondaga kubeita nu endede sankoga munene. 2 Nu amusegile mikanda za bwangato za kwenda ku Damasiki ku numba za misanganano embe anamona bantu bakuyanga meigisia mamano, bamulume nu bakikulu buno abalusie ku Yerusalema bakandwa. 3 Tondo mu lugendo, gaabezaga es'ayangilila kubasa ku Damasiki, kitangalabesi kyengi kyatukile kwigulu nu kyamusanine. 4 Nu agwede gansi, nu ongule ku iyuki lyamutendile bunee: “Saulo, Saulo, kubuni kuukumbabazia?” 5 Nu abuzizie bunee: “Uwe u nazi, Mukota?” Nu Mukota amwakwide bunee: “Nne u Yesu u gukubabazagia. Buli bubibu kuguli kulibula magulu ku mikele. 6 Tondo emanuka nu wende ku mwino, nu wasambalilwe bunsania buwakite.” 7 Nu babo bantu bendaga nabo bemenne, bazingalala; bongule ku iyuki tondo tabamonine ku muntu. 8 Nu Saulo emanukile nu aba gaalimbwide meiso, ntamonine ku kampa. Bamukatile ku kuboko nu bendile nage ku Damasiki. 9 Nu atingizie bindi bisatu ntakumona lingo, nu ntaliaga aba kunua mazi.
10 Ku Damasiki kwabezaga mwigisibwa umozi wamanagwa Anania. Nu Mukota amubaside mu ndozi kumulolesia nu amutendile bunee: “Anania!” Nu we akwide bunee: “Nili gano, Mukota.” 11 Mukota amubwide bunee: “Emanuka nu wende mu nzila zikumanwa buno, Zisa, ku numba za Yuda, buzia muntu umozi wa ku Tarso ukumanwa Saulo. Wamusange akusega, 12 nu we ku kalolesio amonine ku muntu umozi wamanagwa Anania eingila mu numba nu amubikide maboko buno avwame kumona lingo.” 13 Tondo Anania akwide Mukota bunee: “Nungule ku misagu za muntu wono ku bantu beingi ku bubi bunsania bwakitilagile basililila bobe ku Yerusalema. 14 Nu eli gano na bwangato bwa basankoga banene kukanda bansania bakusega ku izina lyobe.” 15 Tondo Mukota amutendile bunee: “Enda, kubuno nasombwede muntu wozo kwenda n'izina lyane ku baBilongo nu ku bakota nu ku bana ba Israeli. 16 Kubuno namulolesie mbabazio insania zakababazibwa ku kabamba k'izina lyane.”
17 Anania endile. Eingide mu numba, abikile maboko gantata ga Saulo nu amutendile bunee: “Saulo, mubuto wane, Mukota Yesu wakubaside gawavwaga mu nzila ansinga buno umone lingo nu wiyazibwe na Muuza Wasililila.” 18 Nu kazanga kongo bili anga magamba byakolokile kutuka mu meiso ma Saulo nu amonine lingo. Emanukile nu kututikwa. 19 Kusila alide idia nu abede na magala.
Saulo Akulinga Mulimo Wage ku Damasiki
Eikede bindi bikeke na beigisibwa babezaga ku Damasiki. 20 Kazanga kongo endile kwigisia ku numba za misanganano, kusambala buno Yesu eli Mwana wa Kalaga. 21 Nu bansania gabongule ku bubo bangamine nu batendile bunee: “Ta wono ukusungagia bubibu babo bakusegaga ku izina lya Yesu mu Yerusalema? Kuvwa kwage gano ndi takuli buno akande bantu nu kubabasia ku basankoga banene?”
22 Tondo Saulo itide nunse bindi binsania kwigisia na magala: angamizie baYuda beikalaga ku Damasiki akokomezizie buno Yesu eli Kristo.
23 Kusila kwa bindi bikeke, baYuda bakalile lwango lwa kwita Saulo, 24 tondo Saulo asasizie kumenya lwango lwabo. Balangile nibi musi nu kindi buno bamwite. 25 Beigisibwa ba Saulo bendile nage mu kindi nu bamugezizie mu luzi ku lisa na kitutu kyatimba mwino.
26 Gabasile Saulo ku Yerusalema agelekile kugomia na beigisibwa. 27 Tondo Barnaba amukatile nu endile nage ku basingwa. Nu abasambalide lukita lwamonine ku Mukota mu nzila nu bwamutendile nu asambede na lwatu geteli boba ku izina lya Yesu ku Damasiki. 28 Kutukila nkungu zezo Saulo abezaga gamozi nabo nu kutabanga gamozi nabo mu Yerusalema nu eigisagia na magala mu izina lya Mukota. 29 Eigisizie lingo baYuda batendaga kiGriki nu endile nabo myango, tondo babano balondaga kumwita. 30 Gongule bakatizia ku wozo musagu bamusindikizizie ku Kaisaria nu bamusingile buno ende ku Tarso.
31 Umpanga kanisa kabede na bubobelelo mu Yudea unsania, ku Galilaya nu ku Samaria; keikokomezizie nu kalamine mu lwanzo lwa Mukota, nu mu kubobelezibwa na Muuza Wasililila nu maganzo ma bakatizia mitide kuba meingi.
Konibwa kwa Ainea
32 Nu gabede Petro akutinga ku biziki binsania, agelile lingo ku basililila beikalaga ku Luda. 33 Nu kuko amonine ku muntu umozi wamanagwa Ainea, abezaga eiyombeka ga mugu ku myaka kinana, kubuno abezaga na lusambo lwa kukoloka biganza. 34 Petro amutendile bunee: “Ainea, Yesu Kristo akwonia! Emanuka nu longeka bya ga mugu wobe.” Kazanga kongo Ainea emanukile. 35 Bantu bansania ba Luda nu bansania beikalaga ku Saroni bamumonineko nu bagalukile ku Mukota.
Tabita Ayukibwa
36 Mu Yopa mwabezaga mwigisibwa umozi mukikulu wamanagwa Tabita, bwisulilwa bwalyo ku kiGriki u Dorika. Mukikulu wono akitaga misako mingi misoga nu bukasia bwingi ku bazambi. 37 Nu mu bindi bibyo akatilwe na lusambo nu akule. Gabasilile kumwogia, bamubikile ku busio bwa kwigulu. 38 Nu kukuba buno mwino wa Luda guli bwigi na Yopa, gongule beigisibwa buno Petro eli kuko, basingile bantu babili kweli kumumana buno asasie kuvwa kubeli. 39 Petro emanukile nu endile gamozi nabo. Nu gaabasile, bamusondelezizie ku busio bwa kwigulu. Misigala insania bemanine bwigi nage bakulila, nu bamulolesizie nkanzu nu nsulu zakitaga Dorika gaabezaga eikili na kalamo. 40 Petro abasizie bantu bansania mu numba nu akomine mazu mage gansi nu asegile. Kusila agalukile ku kitumba nu atendile bunee: “Tabita, yuka!” Alimbwide meiso mage nu gaamonine ku Petro ayukile. 41 Petro amulambizizie kuboko nu amwemanukizie. Kusila amanine basililila nu misigala, nu amubikile lwabusio lwabo eseli na kalamo. 42 Bubo bwamenyinwe kunsania mu mwino wa Yopa nu bantu beingi bakatizizie Mukota. 43 Petro asigede bindi byingi mu numba za muntu umozi wamanagwa Simoni, mukulumizi wa bikoba.