Petro nu Kornelio
10
1 Mu Kaisaria mwabezaga muntu umozi wamanagwa Kornelio, wabezaga mukota wa bakoloboyo, wa kibombo kya bakoloboyo ba baRoma kyamanagwa buno, “Italia.” 2 Muntu wono abezaga musoga nu akuaga Kalaga boba nu kumwanza, we nu kikanga kyage kinsania. Akasagia bazambi bubibu nu asegaga Kalaga bindi binsania. 3 Busi bumozi, ku nkungu mubula, mwanzelo wa Kalaga amubaside mu kalolesio kumulolesia nu amutendile bunee: “Kornelio!” 4 Nu gaalolile mwanzelo, akule boba, amutendile bunee: “Buni Mukota?” Mwanzelo amwakwide bunee: “Kalaga eitabizizie masego mobe nu bukasia bwobe ku bazambi, nu akukengela. 5 Kano kaluma singa bantu ku Yopa kumana Simoni, ukumanwa Petro. 6 Akwikalaga mu numba za Simoni mukulumizi wa bikoba bya nyama, numba zage zili mu ntungo mwa kitatenge.” 7 Gasubizie wozo mwanzelo watendaga na Kornelio, amanine bakiti babili ba numba zage, nu mukoloboyo umozi wakuaga Kalaga boba, wa ku babo bamukitilaga bindi binsania. 8 Nu gaasilile kubasambalila bunsania bwabede, abasingile kwenda ku Yopa. 9 Gakede busi, gabendaga mu nzila bwigi na mwino, Petro abakamine gantata ga numba kusega, bwigi na nkungu mutuba. 10 Abezaga akungwa nzala nunse nu atundile kulia. Tondo nkungu zibabezaga bakumuyikila idia endile kalengwe nu amonine ku kalolesio. 11 Amonine ku igulu ligulwa nu kintu kimozi kyagelaga kyabezaga kyasusania nsulu za kukukila meza zakatwa ku ntungo inazi; zagelaga gansi. 12 Nu munda mwabezaga nkita insania za nyama zili na magulu manazi nu binsania bikugelegeta gansi nu tuzoni twa mu mpelela. 13 Nu iyuki lyamutendile bunee: “Petro, yuka, sesa nu ulie!” 14 Tondo Petro amwakwide bunee: “Kilo, Mukota, kubuno nsiliaga kinsania kili na nsese aba kyazugilwa na mulembe.” 15 Iyuki lyamutendile lingo bunee: “Kinsania kyaswagibwa na Kalaga ntukimane buno kili nsese.” 16 Kitondo kikyo kyabasile mambizi masatu, nu nsulu zezo zasubizie kwigulu. 17 Petro eibuzizie ku mutima wage buni bunavwama kuba bwisulilwa bwa kalolesio kaamonineko. Tondo mu nkungu zezo bantu basingagwa na Kornelio babuzizie numba za Simoni nu babezaga beseli lwabusio lwa mwingilo wa numba. 18 Bamanine mubila nu babuzizie bunee: “Ndi gano u gakwikalaga Simoni ukumanwa Petro?” 19 Gabezaga Petro akukengela bwisulilwa bwa kalolesio kako, Muuza amutendile bunee: “Ungwilila, gano geli bamulume basatu bakukulonda. 20 Emanuka, gela nu wende nabo geteli myango, kubuno nne u wabasingile.” 21 Petro agelile kubeli nu abatendile bunee: “Nne wono u mukulonda. Ku kitondo kikizi kimwamvwila kukyo?” 22 Bakwide bunee: “Kornelio, mukota wa kibombo kya bakoloboyo u watusinga kuguli. Muntu wozo eli wisanana nu akwanza Kalaga nu baYuda bansania bakumuganunaga. Mwanzelo wa Kalaga amwanine buno akumane kwage buno ongwe buwamutende.” 23 Petro abeingizizie mu numba nu abanzide biziki bya kwiyombeka. Gakede busi, endile gamozi nabo. Nu bamozi ku mibuto za ku Yopa bendile gamozi nage. 24 Gabede busi bwakya, babasile ku Kaisaria. Kornelio abalindide gamozi na ba kikanga kyage nu bilemba byage byamanine. 25 Gabasile Petro, Kornelio endile kukulumana nage, akomine mazu mage gansi lwabusio lwage nu amukumbaminne. 26 Tondo Petro amwemanukizie nu amutendile bunee: “Emanuka, nili muntu anga uwe.” 27 Kusila kwa kutenda na Kornelio eingide mu numba, mumo asangile bantu beingi bakundamana. 28 Abatendile bunee: “Mwizi buno muYuda umozi nteli na bwangato kugomia na muntu wa baBilongo aba kwingila mu numba zage. Tondo Kalaga antendile bunee: ‘Ntumane muntu wampa buno nteisanana lwabusio lwa Kalaga aba eli na nsese.’ 29 Ububo gamwammanine, nasasizie kuvwa. Tondo nkutunda kumenya kimwammaninaga.”
30 Kornelio akwide bunee: “U kindi kya binazi na ganisegela aaba nu lelo mu nkungu za mubula mwigolo nabezaga nkusega mu numba zane. Kitangalabesi muntu umozi wabezaga wavwala nsulu zikukelima emanine lwabusio lwane. 31 Nu antendile bunee: ‘Kornelio, Kalaga ongule ku masego mobe nu akengede bukasia buwakitide bazambi. 32 Ububo, singa bantu ku Yopa kutola Simoni, ukumanwa Petro. Akwikalaga mu numba za Simoni, mukulumizi wa bikoba bya nyama ukwikalaga mu ntungo mwa kitatenge.’ 33 Nasingile bantu lubilo kwenda kukulonda nu witabizizie kuvwa. Kano kaluma tuli gano beiswe bansania lwabusio lwa Kalaga kungwilila bunsania bwakukakizie Mukota kutenda.”
Meigisia ma Petro ku Kornelio
34 Petro alingile kutenda bunee: “Kano kaluma namenya lebelebe buno Kalaga ntakukutya bantu bamozi; 35 tondo muntu unsania aba wa kilongo kinsania ukukua Kalaga boba nu kukita kwisanana eitabizibwe na Kalaga. 36 Wizi idagi lyasingilwe na Kalaga ku baIsraeli kwigisia Musagu Musoga wa bubobelelo mu Yesu Kristo, uli Mukota wa bantu bansania? 37 Mwizi idagi lyasambedwe ku Yudea unsania, kulinga ku Galilaya, kumbusa kwa lututiko lwigisagia Yoana. 38 Mwizi musagu unsania wa Yesu wa ku Nazareti, anga bwamubongezie Kalaga na Muuza Wasililila nu magala. Lingo bwatabangile mu kisi kukita busoga nu konia bansania babezaga bakandwa na magala ma Satana, kubuno Kalaga abezaga gamozi nage. 39 Tuli balongeki ba binsania byakitaga mu kisi kya baYuda nu ku Yerusalema. Bamwitile ku musalaba. 40 Tondo Kalaga amuyukizie kutuka ku bakuzi kusila kwa bindi bisatu, nu amulolesizie bwasibwasi, 41 ta ku bantu bansania tondo ku beiswe basombwedwe lwabusio na Kalaga anga balongeki, iswe twaliaga nage nu kunua mazi nage gaabede es'ayuka kutuka ku bakuzi. 42 Atulagile kwigisia bantu nu kubalangania musagu buno We eli wozo wabikilwe na Kalaga kulongeka bitondo bya beli na kalamo nu bakuzi. 43 Balengania bansania balenganizie ku kabamba kage, kutenda buno muntu unsania wakatizia izina lyage asigililwe misako za bwagi.”
Bantu BaBilongo Bakasilwe Muuza Wasililila
44 Mu nkungu zabezaga Petro ek'igisia, Muuza Wasililila agelile ku bansania bongwaga ku meigisia mage. 45 Bakatizia babezaga ku baYuda bavule na Petro bangamine nunse buno lukaso lwa Muuza Wasililila lukubalangana aaba nu ku baBilongo. 46 Kubuno bongwaga bakutenda ku ingo mitendezi nu kuganuna Kalaga: Petro atendile bunee: 47 “Nazi unabazugila kututikwa na mazi, bantu bakaswa Muuza Wasililila na Kalaga anga iswe?” 48 Nu akasenne bwangato buno batutikwe ku izina lya Yesu Kristo. Bamubuzizie buno asigale nabo bindi bikeke.