Misagu za Petro Lwabusio lwa Kanisa ka Yerusalema
11
1 Basingwa nu mibuto zabezaga ku Yudea bongule buno baBilongo nu bo bakatizizie idagi lya Kalaga. 2 Gabasile Petro ku Yerusalema, baYuda babo babezaga bakatizia bendile nage myango. 3 Batendile bunee: “Wingide ku kiziki kya bantu batamonesibwa nu kulia gamozi nabo!” 4 Tondo Petro abasambalide bunsania bwabede. Abatendile bunee: 5 “Nabezaga ku mwino wa Yopa nkusega, nendile kalengwe nu namonine ku kalolesio. Namonine ku kintu kyatukile kwigulu nu kyagelaga; kyabezaga anga nsulu za kukukila meza, kyakatwa ku ntungo inazi, nu kyabasile kundi. 6 Nakilolile munda busoga nu namonine ku nyama zili na magulu manazi, nyama za mu lubanda, binsania bikugelegeta gansi na nda nu tuzoni twa mu mpelela. 7 nungule ku iyuki lyantendile bunee: ‘Yuka, Petro, sesa nu gulie!’ 8 Tondo nakwide bunee: ‘Kilo! Mukota! Kubuno nsiliaga kili nsese aba kikuzugilwa na mulembe.’ 9 Iyuki lyatukile lingo limbizi kwigulu bunee: ‘Kinsania kyaswagibwa na Kalaga ntukimane buno kili nsese.’ 10 Kitondo kikyo kyabasile mambizi masatu nu nsulu zezo zasubizie kwigulu. 11 Ku zezo nkungu, bantu babasile ku numba zinabezaga muzo: Basingilwe kundi kutuka ku Kaisaria. 12 Muuza Wasililila antendile kwenda nabo geteli myango. Mibuto zeno mutuba bavule nu iswe bansania twingide mu numba za Kornelio. 13 Atusambalide bunsania anga bwamonine ku mwanzelo wemenne mu numba zage nu amutendile bunee: ‘Singa bantu ku Yopa kumana Simoni, ukumanwa Petro. 14 Akusambalile bugunona uwe nu numba zobe insania.’ 15 Nabezaga nise nalinga kutenda, Muuza Wasililila agelile kubeli, anga bwalingile kutugelela nu iswe lwabusio. 16 Nu nakengede bwatendile Mukota bunee: ‘Yoana atutikile na mazi, tondo inyuwe mukatutikwa na Muuza Wasililila.’ 17 Ndi Kalaga abakasile lukaso anga bwatukasilelo gatwakatizizie Mukota Yesu Kristo, nne u nazi unavwamine kuzugila Kalaga?” 18 Nu gabongule ku bubo beikede kibibi nu baganwine Kalaga, batendile bunee: “Umpanga, Kalaga asila kukasa baBilongo nu bo kwiyania buno babe na kalamo.”
Kanisa ka Antiokia
19 Mbabazio zabezaga mu nkungu zitilwe Stefano zabalanganizie bakatizia. Bamozi bendile ku Foinike, ku Kipuro nu ku Antiokia, nu basambede musagu ku baYuda umpanga. 20 Tondo bakatizia bamozi babezaga ba ku Kipuro nu ba ku Kurene, bendile ku Antiokia nu babasile ku baGriki kubeigisia Musagu Musoga wa Mukota Yesu. 21 Magala ma Mukota mabezaga nabo nu bantu beingi bakatizizie nu bagalukide ku Mukota. 22 Babo ba kanisa ka Yerusalema gabongule ku musagu wozo, basingile Barnaba ku Antiokia.
23 Gaabasile nu gaamonine buni bwakasenne Kalaga mponga, abogilebogile nu abakokomezizie kulama mu Mukota na mutima wa komanizia. 24 Barnaba abezaga muntu musoga, wiyala na Muuza Wasililila nu bukatizio. Bantu beingi bakatizizie Mukota.
25 Barnaba endile lingo ku Tarso kulonda Saulo. 26 Gaamumonine asubizie nage ku Antiokia. Nu basigede mwaka umozi bakwigisia mu kako kanisa. Nu kuko ku Antiokia u kwalingile kumanwa beigisibwa limbizi litangi buno, baKristo.
27 Mu nkungu zezo, balengania batukile ku Yerusalema kwenda ku Antiokia. 28 Umozi wa kubeli wamanagwa Agabo, emanukile nu alolesizibwe na Muuza Wasililila buno kwabe nzala nnene mu kisi kinsania. (Bubo bwabede mu bindi bya Mukota Klaudio.) 29 Ububo beigisibwa bakalile lwango na muntu na muntu kutikya lukaso anga bwanavwama nu kusinga ku mibuto zikalaga ku Yudea. 30 Bakitile bubo nu basingile lulo lukaso ku bakulu ku maboko ma Barnaba nu Saulo.