Yakobo Eitilwe nu Petro Eli mu Kikando
12
1 Mu bindi bibyo, mukota Herode alingile kusungia bantu bamozi ba kanisa. 2 Eitile Yakobo, iselenzi wa Yoana, na mwene. 3 Kusila, gaamonine bubo bukubogiabogia baYuda, akatile lingo Petro. (Bwabezaga mu bindi bya musanganano wa kampampa katagaga). 4 Nu gaakatile Petro, amubikile mu kikando nu abikile bibombo binazi bya bakoloboyo banazi banazi kumulanga. Akengede kumubasia ku bantu kumbusa kwa Kisagulo ky'Isuluko. 5 Petro alangilwe mu kikando, tondo bantu ba kanisa bamusegede ku Kalaga na komanizia. Petro Akandulwa
6 Mu kindi kya lwabusio lwa busi bwalondaga Herode kumubasia ku bantu, Petro abezaga eiyombeka gasamba bakoloboyo babili. Abezaga akandwa na miyololo ibili nu bakoloboyo balangi babezaga bakulanga lwabusio lwa lwibi lwa kikando. 7 Kitangalabesi mwanzelo wa Mukota amubaside nu kyengi kyasanine kunsania mu numba. Mwanzelo amulibwide ku mpege nu amuyukizie, nu amutendile bunee: “Sasia kwemanuka!” Nu miyololo zakolokile kutuka ku maboko mage. 8 Mwanzelo amutendile lingo bunee: “Iswike mukaba nu uvwale bisalapata byobe.” Petro akitile bubo, nu mwanzelo amutendile bunee: “Vwala ikoti lyobe nu unyange.” 9 Petro abasile mu kikando nu amuyangile tondo akengede buno amona tugu ku kalolesio. 10 Nu gabatingile mukoloboyo mutangi nu wa babili, babasile ku lwibi lwa kyuma lwa mwingilo wa mu mwino nu lwibi lwabeigukide lolwenyene; babasile kumbuga nu batingile ku nzila emozi; nu kazanga kongo mwanzelo amusigile. 11 Gabede Petro wenyene amenyinina, atendile bunee: “Kano kaluma namenya lebelebe buno Mukota asingile mwanzelo wage nu antikizye mu maboko ma Herode nu ku bunsania bwandindilaga kilongo kya baYuda.”
12 Gaasilile kukengela bubo, endile ku numba za Maria, nina wa Yoana wamanagwa Marko. Nu bantu beingi babezaga bakundamana nu bakusega. 13 Petro akokomwenne ku lwibi lwa mwingilo nu mukiti umozi mukinga, wamanagwa Roda, avule kungwilila. 14 Gaamenyine buno u iyuki lya Petro, nteigwide lwibi ku kitondo kya mbogimbogi, tondo asubizie lubilo nu abatendile buno Petro u wemana ku lwibi. 15 Nu bamubwide bunee: “Uli musile!” Tondo eidangizie bubibu bunee: “Buligo!” Batendile lingo bunee: “Kasi nti mwanzelo wage tugu.” 16 Tondo Petro itide kukokomona: nu gabeigwide lwibi, bamumonineko, bangamine nunse. 17 Tondo we abatengezizie kuboko buno beikale kibibi nu abasolede lukita lwamutikizye Mukota mu kikando. Atendile lingo bunee: “Endazi musambalile Yakobo misagu zeno, nu mibuto zeitu.” Nu atukile nu endile ku kingo kiziki. 18 Nu gabede busi bwakya bakoloboyo bazangilezangile nunse nu babuzanizie bunee: “Kuni kuli Petro?” 19 Herode, gaamulondile, nu gatamumonineko, abuzizie balangi nu akakizizie nunse buno beitwe. Kusila atukile ku Yudea nu agelile ku Kaisaria nu eikede kuko.
Kukua kwa Herode
20 Nu Herode ongedwe nunse bantu ba Tiro nu Sidoni. Nu bamuvwilide na mutima umozi. Kusila kwa kugomia na Balasto, mulangi wa busio bwa mukota, basegile kube bubobelelo, kubuno kisi kyabo kyalisizibagwa na kisi kya mukota. 21 Nu ku busi bumozi bwasombwedwe, Herode avwalile nsulu zage za bukota, eikede ga kisumbi kya bukota nu abasambalide bitondo bwasibwasi. 22 Bantu balalukile n'iyuki bunee: “Iyuki lya kalaga kamozi u likutenda tondo ta lya muntu!” 23 Kazanga kongo mwanzelo wa Mukota amulibwide, kubuno ntakasile Kalaga lutanuno: alibilwe na minsobobo nu akule.
24 Tondo idagi lya Kalaga lyabalangenne nu lyitide nunse.
25 Gabezaga Barnaba nu Saulo basila mulimo wabo, basubizie kutuka ku Yerusalema nu bavule na Yoana wamanagwa Marko.