Saulo nu Barnaba Basombolwa Kwenda Bakita Mulimo
13
1 Mu kanisa ka Antiokia mwabezaga balengania nu basozi: Barnaba, Simoni (wamanagwa wina), Lukio (wa Kurene), Manaeni (wakuzibagwa gamozi na mukota Herode), nu Saulo. 2 Busi bumozi gababezaga bakuganuna Mukota nu kutalia, Muuza Wasililila abatendile bunee: “Mbikilazi Barnaba nu Saulo ku mulimo wozo gunabamanine kugo.” 3 Nu gabasilile kusega nu kukanda idia bababikide maboko, babasingile buno bende. Barnaba nu Saulo Bakwenda ku Kipuro
4 Bubo Barnaba nu Saulo basingilwe na Muuza Wasililila, bakumbile ku Seleukia nu kutuka kuko bendile na bwato ku kisanga kya Kipuro. 5 Gababasile ku Salami beigisizie idagi lya Kalaga mu numba za misanganano za baYuda. Babezaga na Yoana kubakasia.
6 Gabasilile kutinga mu biziki binsania bya kisanga aaba nu kubasa ku Pafo, basangile mugila umozi wamanagwa Bara-Yesu, muYuda umozi mulengania wa buza, 7 wabezaga gamozi na mwangati wa kisanga, Sergio Paulo, muntu wa menge. We amanine Barnaba nu Saulo, buno bavwe kweli kubuno eiyaninaga kungwa ku idagi lya Kalaga. 8 Tondo Elema wozo mugila (kubuno u bwisulilwa bw'izina lyage) ababigenne, nu atundaga kugalukya bukatizio bwa wozo mwangati. 9 Tondo, Saulo, wamanagwa lingo Paulo eiyede na Muuza Wasililila, nu amulolile kisozi, 10 atendile bunee: “Uwe wiyala na menge mansania ma bubi, mwana wa Satana, musombi wa kwisanana kunsania, ndi ntukusiga kubigia nzila zisanana za Mukota? 11 Kano kaluma, ungwilila: Mukota akulibule, wabe kyuku nu ntwamone lingo ku kyengi kya musi ku bindi bimozi.” Kazanga kongo mwizi nu kapilo byamubaside nu ababatilebabatile kulonda muntu wa kumukata ku kuboko nu kumusondelezia. 12 Nu we mwangati, gaamonine ku bubo bwabede, akatizizie, nu aganineganine nunse na meigisia ma Mukota.
Paulo nu Barnaba ku Antiokia wa Pisidia
13 Paulo nu banyage batukile ku Pafo na bwato nu babasile ku Perga ku Pamfilia. Yoana abasigile gago nu asubizie ku Yerusalema. 14 Tondo babo, gabatukile ku Perga, bendile ku Antiokia wa Pisidia. Beingide mu numba za misanganano Busi bwa Kumunwa, u Sabato, nu beikede gansi. 15 Gabasilile kusoma mu mikanda za mulembe nu za balengania, bangati ba numba za misanganano bababuzizie bunee: “Mibuto zeitu, ndi muli na bitondo bya kutenda ku musanganano bya kubakasia munavwama kutenda kano kaluma.” 16 Paulo emanukile, nu abatengezizie kuboko nu atendile bunee:
“Bantu baIsraeli nu inyuwe bakukua Kalaga boba, mungwilile! 17 Kalaga wa bantu babano, Kalaga wa Israeli asombwede batateiswe, atanunizie bantu babano gababezaga bageni ku kisi kya Misri, nu abatikizye ku Misri na magala mage. 18 Abalangile bwigi na myaka makumi manazi mu kalula. 19 Nu gaasilile kwita bilongo mutubakamo bya kisi kya Kanana abakasile kisi kikyo buno kibe bupieni bwabo. 20 Bubo bwabede bwigi ku myaka nkama inazi makumi matano.
Kusila kwa bubo abakasile ngatu aaba nu kubasa ku nkiko za mulengania Samweli. 21 Kusila, basegile mukota, nu Kalaga abakasile Saulo, mwana wa Kisi, muntu wa kikanga kya Benjamina wabezaga mwangati ku myaka makumi manazi. 22 Nu gaamutikizye, asakikile Davidi buno abe mukota wabo. Nu bubo amulongekede nu atendile bunee: ‘Namona ku Davidi, mwana wa Yese, wamulume watananizia mutima wane, ukakita kusombola kwane kunsania.’ 23 Mu kikanga kya muntu wono, Kalaga asakikide baIsraeli Monia, u wono Yesu, anga bwalagile. 24 Lwabusio lwa kuvwa kwa Yesu, Yoana amanine bantu bansania ba Israeli, nu kubeigisia bitondo bya lututiko lwa kwiyania. 25 Nu gabezaga Yoana es'asililizia mulimo wage atendile bunee: ‘Mukukengela buno nili nazi? Nsili wozo u mukulindila. Tondo ungwililazi: kumbusa kwane kwavwe umozi nu nne nsinatananina kukandula bisalapata bya magulu mage.’
26 Mibuto zane, inyuwe ba kikanga kya Abrahamu nu inyuwe bakukua Kalaga boba: musagu wa lonio luluno wasingilwe kutuli! 27 Kubuno bantu beikalaga mu Yerusalema nu bakota babo, tabamenyininne Yesu, tondo mu kumusungia bazindilizizie bitondo bya balengania bikusomagwa busi na busi bwa Sabato, u bwa Kumunwa; 28 aba tabamonine mweli kitondo kimozi kyanakwilako, tondo basegile ku Pilato buno eitwe. 29 Nu kusila kwa kuzindilizia bunsania bwasanzilwe mu masanzo ku kabamba kage, bamugezizie ku musalaba nu bamuyikile mu nsinda. 30 Tondo Kalaga amuyukizie kutuka ku bakuzi. 31 Nu Yesu amonekileko bindi byingi na babo babakamine nabo kutuka ku Galilaya kwenda ku Yerusalema nu beli kano kaluma balongeki bage lwabusio lwa bantu. 32 Nu iswe tubenyene, tukumusambalila wozo Musagu Musoga w'idagano lyalagilwe ku batateiswe, 33 kano kaluma Kalaga azindilizizie ku beiswe bana babo idagano lilino ku kuyukya Yesu kutuka ku bakuzi, anga bwasanzilwe mu mukanda wa Nimbo, ku lwimbo lw'ibili bunee:
‘Uli mwana wane,
Nakubuta lelo.’ a
34 Lingo Kalaga abwide buno, amuyukizie kutuka ku bakuzi nu ntasubye lingo buno abole, atendile bunee:
‘Nkamukasa mponga zasililila nunse
zinalagile ku Davidi.’ b
35 Kubuno atendile mu lungo lwimbo bunee:
‘Ntukaziga Wasililila wobe kubola.’ c
36 Kubuno Davidi, gaasilile kukitila ba ku nkiko zage mu kusombola kwa Kalaga, akule nu ayikilwe bwigi na beisi nu abolile. 37 Tondo wozo wayukizibwe na Kalaga kutuka ku bakuzi ntabolile. 38 Umpanga, mibuto, mwatunganana kubumenya buno, ku kabamba ka Yesu isigililo lya bwagi lyasambedwe kumuli; 39 ku kabamba kage muntu unsania wamukatizia, nti asila kukandulwa ku bwagi bunsania butanavwama mulembe wa Musa kumukandula. 40 Umpanga, idangazi buno bubo bwatendile balengania tabumubasile,
41 ‘Ungwililazi, inyuwe babengi,
Nu muganegane nu muzimine,
Kubuno nkukita mulimo mu bindi byeinyu,
Ndi muntu akumusambalila nti tamunabukatizia.’” d
42 Gatukile Paulo nu Barnaba mu numba za misanganano, babasegile buno batunganana kuvwa lingo limbizi ku Busi bwa Kumunwa kubasambalila ku kitondo kikino. 43 Kusila kwa musanganano, baYuda beingi nu bango beingi ku babo bagalukile kuyanga meigisia ma baYuda nu bakule Kalaga boba bayangile Paulo nu Barnaba. Babalindizie kusigala na komanizia mu mponga za Kalaga.
44 Gabezaga bungo Busi bwa Kumunwa, u Sabato, bwigi na bantu bansania ba mu mwino bakundamenne kuvwa kungwilila ku idagi lya Mukota. 45 Tondo baYuda gabamonine ku musanganano, beiyede na lugi nu bakanizie bwatendaga Paulo nu balengania. 46 Paulo nu Barnaba babasambalide geteli boba bunee: “Bwabezaga bwatunganana buno idagi lya Mukota lisambalwe kumuli tanga. Tondo kubuno mukulisomba, tamukukengela kutananina kalamo katanakuzinda ungwililazi! Twagaluke ku baBilongo. 47 Kubuno ububo butwakakizizibwe na Mukota bunee:
‘Nakubikile buno ube kyengi kya baBilongo,
Buno weeke lonio aaba nu kuzinda kwa kisi.’” e
48 Gongule babo baBilongo ku bitondo bibyo, babogilebogile nu baganwine idagi lya Mukota. Nu bansania babezaga basombolwa kuba na kalamo keteli na kuzinda bakatizizie.
49 Idagi lya Mukota lyakukile mu kikyo kisi kinsania. 50 Tondo baYuda balutile bakikulu banzagwa nu bantu banene, ba wozo mwino, nu balingile kusungia Paulo nu Barnaba nu babatukizie mu myaga zabo. 51 Tondo babatitulide mukungu wa magulu mabo, nu bendile ku Ikonio. 52 Nu beigisibwa beiyazizibwe na mbogimbogi nu na Muuza Wasililila.