Saulo Akusungia Kanisa
8
1 Nu Saulo eitabizizie kukua kwa Stefano. Nu bubo busi u bwalingile kusungibwa kunene kwa kanisa ka Yerusalema. Bakatizia bansania batinine nu kubalangana mu biziki binsania bya Yudea nu bya Samaria. Tondo basingwa tabatinine. 2 Nu bakatizia bayikile Stefano nu bamulilide nunse ku kabamba ka lukuo lwage.
3 Saulo eikokomezizie ku kusungia kanisa; eingide mu numba na numba kubuluta bakatizia bamulume nu bakikulu nu kubabika ku kikando.
Filipo Akwigisia Musagu Musoga ku Samaria
4 Nu babo basilile kubalanganibwa, bendile ku kiziki na kiziki mu kisi kusambala Musagu Musoga. 5 Filipo nu we abasile ku mwino wa Samaria nu abezaga akusambalila bantu musagu wa Kristo. 6 Musanganano unsania wabongwilide na mutima umozi bubo bwatendaga Filipo, bongule nu bamonine ku miganogano zaakitaga. 7 Kubuno basumbu babi babezaga mu bantu beingi batukile mubeli, balalukile na moki manene nu bantu beingi babezaga boma biganza nu bitunga bonezibwe. 8 Ububo ku mwino wozo kwabezaga mbogimbogi nnene.
9 Tondo mu wozo mwino mwabezaga muntu umozi izina lyage, Simoni, abezaga akukita bugila nu angamagia bantu ba Samaria, eitendaga wenyene buno eli muntu munene, 10 nu bantu bansania bamungwililaga kutukila ku bana bato aaba nu ku bakulu banene, nu batendaga bunee: “Muntu wono eli na magala manene ma Kalaga.” 11 Nu bamungwilide kubuno abezaga akubangamia na bugila bwage. 12 Tondo gabakatizizie Musagu Musoga wigisagia Filipo, musagu wa Bukota bwa Kalaga nu bw'izina lya Yesu Kristo, batutikilwe mu mazi, bamulume nu bakikulu. 13 Simoni nu we akatizizie nu atutikilwe; asigede gamozi na Filipo nu angamine nunse ku kumona ku tulolesio tunene nu miganogano zakitagwa na Filipo.
14 Nu babo basingwa babezaga mu Yerusalema gabongule buno baSamaria beitabizizie idagi lya Kalaga; basingile Petro nu Yoana kubeli. 15 Nu bo gababasile ku Samaria, babasegede buno bakaswe Muuza Wasililila. 16 Kubuno Muuza Wasililila abezaga ntebagelela, tugu babezaga batutikilwe ku izina lya Mukota Yesu. 17 Ububo babikile maboko gantata ga matoe mabo nu bo bakasilwe Muuza Wasililila.
18 Wozo Simoni, gaamonine ku bubo buno bantu bakaswa Muuza Wasililila ku kubikwa maboko na basingwa, atundile kubakasa bikulo, 19 nu atendile bunee: “Nkasazi nu nne bwangato bubuno, buno na muntu na muntu u nabikage maboko mane g'itoe, nti akaswe Muuza Wasililila.” 20 Petro amwakwide bunee: “Zika gamozi na bikulo byobe, kubuno wakengede buno embe lukaso lwa Kalaga lunakunzwa na bikulo! 21 Ntuli na kampa kagunakita ku kitondo kikino, kubuno mutima wobe tawisanana ku Kalaga. 22 Kasi iyanie ku mibi zobe nu kusega Mukota buno akusigilile ku makengelo mobe mabi, 23 kubuno nkumona buno mutima wobe guli na bongoa bukali nu uli mu kikando kya bubi.” 24 Simoni abwide Petro nu Yoana bunee: “Nsegelazi ku Mukota, buno bubuno bumwatendaga bunakivwa kumbasila.”
25 Nu bo gabasilile kulongeka nu kwigisia idagi lya Mukota, basingwa babili basubizie ku Yerusalema. Nu beigisizie, nu kusambala musagu musoga mu miino mingi za baSamaria.
Filipo nu Muntu Munene wa Etiopia
26 Mwanzelo wa Mukota atendile Filipo bunee: “Emanuka nu enda mu nzila zatuka ku Yerusalema nu zenda ku Gaza. Nzila zezo zenda mu kalula.” 27 Filipo emanukile nu endile. Nu mu nzila amonine ku muntu umozi wa ku Etiopia wabezaga wakua muntembele, mukiti munene wa mulimo wa kulanga bikulo binsania bya mukota Kandake, mukikulu mukota, atukaga ku Yerusalema kukumbamina Kalaga. 28 Nu abezaga es'asubya kwage, eikede gantata ga ngondangonda, abezaga akusoma mukanda wa mulengania Isaya. 29 Muuza Wasililila atendile ku Filipo bunee: “Sigelela bwigi na zezo ngondangonda.” 30 Filipo eitumine lubilo kweli nu ungule wozo muEtiopia kwakusoma mukanda wa mulengania Isaya. Amubuzizie bunee: “Ndi ukumenyinina bubo bugukusoma?” 31 Muntu wozo amwakwide bunee: “Buni buninamenyinina ndi muntu ntakunisulila?” Nu amanine Filipo kubakama ga ngondangonda nu eikede bwigi nage. 32 Nu Masanzo maasomaga mabezaga bunee:
“Asondelezizibwe anga mukoko ukwenda kuseswa,
Nu anga mwana wa mukoko utakulaka lwabusio lwa
wozo ukumusesa myoza. Bubo nu we ntalimbwide kanua.
33 Mu kubota kwage asungizibwe mu nzila ziteisanana.
Nazi unavwama kusambala kibuti kyage?
Kubuno kalamo kage katukizibwe mu kisi.” a
34 Wozo wabezaga wakua muntembele abuzizie Filipo bunee: “Nkukubuzia buno, wozo mulengania atendaga musagu wa nazi? Ndi musagu wage wenyene aba wa ungo muntu?” 35 Nu Filipo amwisulide lilino isanzo, amusambalide Musagu Musoga wa Yesu. 36 Nu gabendaga mu nzila babasile gabezaga mazi nu wozo muntu abuzizie Filipo bunee: “Kikizi lingo kinkulindila buno nsinatutikwa mu mazi mamano meli gano?” 37 Filipo amutendile bunee: “Ndi wakatizia na mutima wobe unsania unavwama kututikwa.” Akwide bunee: “Nkukatizia buno Yesu Kristo eli Mwana wa Kalaga.” 38 Kusila eimikile ngondangunda, Filipo nu wozo muntu bagelile bobabili mu mazi nu Filipo amututikile. 39 Nu gabatukile mu mazi, Muuza wa Mukota ekile Filipo nu wozo wakua muntembele ntamumonineko lingo. Nu wozo muntu eiyendede na mbogimbogi. 40 Tondo Filipo amonekileko ku Azoto, atingile ku mwino na mwino kusambala kunsania Musagu Musoga aaba nu gaabasile ku Kaisaria.