23
1 Paulo alolile nunse bakazi ba nango kisozi nu atendile bunee: “Mibuto zane, nili na kalenganio kasoga nunse lwabusio lwa Kalaga aaba nu lelo.” 2 Nu sankoga munene Anania akakizizie babo babezaga bwigi na Paulo buno bamulibule ku busundo. 3 Ububo Paulo amutendile lingo bunee: “Kalaga nu We akakulibula, uwe uli anga kitutu kyabongibwa makese! Wikala gago kunsungia anga buli mulembe nu ukukagula mulembe ku kukakizia bantu buno nilibulwe.” 4 Babo babezaga bwigi na Paulo bamutendile bunee: “Walinga sankoga munene wa Kalaga!” 5 Paulo akwide bunee: “Mibuto zane, nsyabezaga nizi buno eli sankoga munene. Kubuno, masanzo makutenda bunee: ‘Ntutende bubi ku mwangati wa kilongo kyobe.’” 6 Paulo abezaga eizi buno bamozi ku bakazi ba nango babezaga ku lulenge lwa baFarisayo nu bango ku lulenge lwa baSadukayo, ukinsa alalukile lwabusio lwabo bunee: “Mibuto, nili muFarisayo, mwana wa baFarisayo; nu ku kabamba ka kilemanizio ky'iyukilo kutuka ku bakuzi, ububo bunkusungibwa.” 7 Gaatendile bubo, kwabede nsake gasamba baFarisayo nu baSadukayo, nu musanganano wibeganizie. 8 (Kubuno baSadukayo bakutenda buno takuli iyukilo kutuka ku bakuzi aba nu takuli mwanzelo aba Muuza, tondo baFarisayo bakwitabizia bubo bunsania). 9 Balalukile nunse nu basanzi bamozi ba milembe ba ku lulenge lwa baFarisayo, bemanukile nu bakanizie nunse nu kutenda bunee: “Tatukumona ku bubi bwampa ku wono muntu. Embe Muuza aba mwanzelo atendile nage!”
10 Nsake zabede nnene nunse nu mukota wa bakoloboyo akule boba buno banavwa kwata Paulo. Ku kabamba kako akakizizie bakoloboyo buno bagele ku musanganano nu kumutikya munkatini mwabo nu kumusubya mu numba nnene za bakoloboyo.
11 Mu kindi kikyo, Mukota abaside Paulo nu amubwide bunee: “Kokomezia mutima! Kubuno anga bubo buwandongekede ku Yerusalema, ububo buwatunganana lingo kundongekela mu Roma.”
Lwango lwa Kwita Paulo
12 Mu nindunindu, baYuda bakalile lwango. Balumbide buno tabalie aba tabanue kampa, umpanga gabe beita Paulo. 13 Babo bakalile lwango lulo babezaga batinga bantu makumi manazi. 14 Bendile kumana mukota wa basankoga nu bakulu, nu babatendile bunee: “Twakalile lwango nu twalumbide nunse buno tatwalie kampa ndi tatwita Paulo. 15 Umpanga inyuwe, gamozi na bakazi banene ba lwango, buziazi lino wozo mukota wa bakoloboyo buno amuvwile na Paulo, buno mukutunda kwengelesia kitondo kyage bulingilingi. Nu iswe tuli kayikayika kumwita, lwabusio ntebasa gano.”
16 Tondo mwigoa wa Paulo gongule ku lulo lwango lubi, endile ku numba nnene za bakoloboyo, eingidemo nu akengelezizie Paulo bubo. 17 Nu Paulo amanine umozi wa ku bakota ba bakoloboyo nu amutendile bunee: “Sondelezia musikila wono ku mukota wa kibombo kya bakoloboyo, kubuno eli n'iyuki limozi lya kumusambalila.” 18 Mukota wa bakoloboyo amukatile g'ikoko nu endile nage ku mukota wabo, nu atendile bunee: “Mukandwa Paulo ammanine nu antendile buno, nikuvwile na wono musikila eli na kitondo kimozi kya kukusambalila.” 19 Wozo mukota wa bakoloboyo akatile wozo musikila g'ikoko, nu eitundile nage; nu amubuzizie bunee: “Uli na musagu mukizi wa kunsambalila?” 20 Nu amwakwide bunee: “BaYuda bakalile lwango lwa kukusega Paulo lubi nindunindu, buno wende nage lwabusio lwa bakazi ba nango anga buno bakutunda kumubuzia nu kumenyinina nunse mulondo wage busoga. 21 Tondo uwe ntubeitabizie! Kubuno bantu kutinga makumi manazi bakumukobela buno bamukate. Bagomezie nu kulumbila buno tabalie nu tabanue, umpanga gabe bamwita. Kano kaluma beli kayikayika nu bakulindila tugu kwitabizia kwobe.” 22 Nu Mukota wa kibombo kya bakoloboyo asubizie wozo musikila kusila kwa kumukakizia buno ntasambalile ungo muntu bubo bwamusambalilaga.
Paulo Asingwa ku Mwangati Feliki
23 Mukota wa bakoloboyo amanine babili ba ku bakota ba bakoloboyo nu abatendile bunee: “Mukundamanie bakoloboyo nkama ibili, nu babo bakwendaga gantata ga farasi makumi mutubakamo nu bamulume nkama ibili beli na masumo, nu mube kayikayika inyuwe bansania kwenda ku Kaisaria ku nkungu isatu za kindi. 24 Bwatunganana kubika farasi kayikayika kweka Paulo buno bende nage bulonge bukata kuli mwangati Feliki.” 25 Nu asanzile mukanda ku lukita luluno:
26 “Nne Klaudio Lusia nakusambizia, uwe, ee mwangati musoga nunse Feliki. 27 BaYuda bakatile muntu wono na magala nu balondaga kumwita, ganungule buno eli muRoma, navule gamozi na bakoloboyo bane kubatikya we. 28 Nu natundile kumenya ku kitondo kikizi kibamusongede kukyo, ububo nabasile nage lwabusio lwa bakazi banene ba nango. 29 Nasongolwede buno bamusongede ku kabamba ka mbuzio za milembe zabo, tondo takuli bwagi bwampa bwakitile bwatananina kukwilako aba bwanakandilwa kubo. 30 Ganungule buno baYuda bamukalide lwango lwa kumwita, kazanga kongo nakusingide we nu nabuzizie babo bamusongede buno bende na bitondo byakitile lwabusio lwobe.”
31 Bakoloboyo bakitile anga bubabakakizizie: bakatile Paulo nu bendile nage mu kindi kikyo aaba ku Antipatiri. 32 Gabede busi bwakya, Bakoloboyo bendaga na magulu basubizie ku numba nnene za bakoloboyo nu basigile babo bendaga gantata ga farasi kwenda gamozi na Paulo. 33 Gababasile ku Kaisaria, bakasile mwangati mukanda nu bamulolesizie Paulo. 34 Mwangati, gaasilile kugusoma, abuzizie Paulo buno ndi eli muntu wa ku Kilikia. Nu gaasilile kumenya buno eli wa Kilikia, 35 amutendile bunee: “Nakubuzie gabe babo bakusongela babasa.” Nu akakizizie buno balange Paulo mu numba za Herode.