Kusongelwa kwa Paulo na BaYuda
24
1 Kumbusa kwa bindi bitano, Anania, Sankoga munene, abasile ku Kaisaria gamozi na bakulu bamozi nu ntenzi emozi zamanagwa Tertulo. Babasile lwabusio lwa mwangati Feliki kwikya masongelo kwabo ku kabamba ka Paulo. 2 Paulo amaninwe nu Tertulo amusongede bunee: “Ee, mukota wakaswa nunse lwanzo, Feliki, ku kabamba kobe tuli na bubobelelo nunse nu ku kabamba ka busoga bwa bulongeki bwobe, kilongo kikino kyakitilwe busoga bwingi. 3 Ku binsania bitukumona kunsania, nu ku nkungu insania, tukukuganuna nunsania. 4 Tondo geteli kukata nkungu ndazi, ububo ku kyombo kyobe, nkukusega nunse buno utungwilile ku bitondo byeitu bikeke bituli nabyo. 5 Twamona buno wono muntu eli nunse na milondo mingi: akubasia mulubu munkatini mwa baYuda bansania ba kisi kinsania nu eli mukota wa meigisia ma bantu ba ku lulenge lwa baNazareti. 6 Aba nu agelile kubigia numba za kukumbamina nu bubo twamukatile. (Twatundaga kumusungia kuyangana na mulembe weitu, 7 tondo Lusia, mukota wa bakoloboyo, abasile nu amutikizye ku maboko meitu na magala nunse. 8 Nu akakizizie babo bamusongela buno babase lwabusio lwobe.) Ndi wabuzia muntu wono nti kweli unavwama uwenyene kumenya bulili bwa butwamusongede.” 9 BaYuda beitabizizie kusongelwa kwage nu batendile buno bubo buligo.
Paulo Akwidondolela Lwabusio lwa Feliki
10 Nu mwangati atengezizie Paulo kuboko atende nu Paulo akwide bunee: “Nizi buno uli ngatu za kilongo kikino kutukila myaka mingi, ububo nili na mutima wa mbogimbogi nu nkutenda bitondo byane buno nidondolele lwabusio lwobe. 11 Anga bugunasongolola uwenyene, buno takutinga bindi ikumi nu bibili na ganibakamina kwane ku Yerusalema kukumbamina Kalaga. 12 Tabansangile nkukita myango na muntu wampa aba mu numba za kukumbamina aba nkusindika bantu kukita mulubu mu numba za misanganano aba ku kingo kiziki mu mwino. 13 Nu bantu babano tabanavwama kulolesia bwasibwasi bitondo bibakunsongela kubyo kano kaluma. 14 Tondo nitabizia bubuno lwabusio lwobe: nkukitila Kalaga wa batateiswe mu kuyanga nzila zibakutenda buno zili za meigisia meteligo nu nkukatizia binsania byasanzilwe mu mikanda za milembe nu mu mikanda za balengania. 15 Nu nili na kikyo kilemanizio ku Kalaga anga bubeli nakyo bobenyene, kili buno kukaba iyukilo kutuka ku bakuzi, ku bantu beisanana nu bateisanana. 16 Ku kabamba kako nkwikokomezia kuba na kalenganio kasoga bindi binsania lwabusio lwa Kalaga nu lwabusio lwa bantu.
17 Kumbusa kwa kutaba ku Yerusalema myaka mingi, nasubizie lingo kuko kuvwa na bukasia bwa bikulo ku kilongo kyane nu kukasana mitebe ku Kalaga. 18 Ububo baYuda bamozi kutuka ku Asia bansangile nise nengibwa mu numba za kukumbamina takwabezaga musanganano wa bantu aba mulubu. 19 Ububo bwatunganana babano kubasa lwabusio lwobe nu kunsongela, gabanaba na bitondo bimozi kundi. 20 Aba, bantu babano bobenyene, batende bubi bukizi bubammonine nabo ganabezaga lwabusio lwa lusu lwa bakazi ba nango. 21 Umpanga ku kabamba k'iyuki limozi linalalukile nalyo bubibu munkatini mwabo bunee: ‘Kuli iyukilo lya bakuzi ukinsa nkusungibwa lelo lwabusio lweinyu.’”
22 Tondo Feliki, bwamenyine Nzila za bibyo bitondo abeikazizie gansi nu abatendile bunee: “Gavwe Lusia, mukota wa bakoloboyo, u ganatule mulondo weinyu.” 23 Akakizizie mukota wa bakoloboyo buno alange Paulo, tondo ntamukande aba ntazugile beida bage kumukitila.
Paulo Lwabusio lwa Feliki nu Drusila
24 Kumbusa kwa bindi bikeke, Feliki avule gamozi na mukikulu wage Drusila, wabezaga muYuda, nu amanine Paulo nu ongwilide bwatendaga ku kabamba ka bukatizio mu Kristo Yesu. 25 Tondo anga bweigisagia Paulo ku kabamba ka kwisanana, nu ka kwizugila nu ka lusungio lukavwa, Feliki abede na boba nu amwakwide bunee: “Enda kano kaluma. Ganamone nkungu, nakumane lingo.” 26 Abezaga na kilemanizio buno embe Paulo amukase bikulo; buno amukandule ukinsa amumanaga mambizi meingi kusambala nage.
27 Myaka ibili zatingile, kusila Porkio Festo apienine Feliki kuba mwangati. Nu ku kuba buno Feliki atundaga kubogiabogia baYuda, asigile Paulo mu kikando.