Yesu Amonekileko na Beigisibwa Mutubakamo
21
1 Kumbusa kwa bubo, Yesu eidolesizie ku beigisibwa bage lingo ku mutili wa kitatenge kya Tiberia. Lolazi lukita lweidolesizie kubeli. 2 Simoni Petro nu Toma, wamanagwa Iyasa, nu Natanaeli wa ku mwino wa Kana, ku Galilaya, nu bana ba Zebedayo nu bango beigisibwa babili ba Yesu babezaga gamozi. 3 Simoni Petro abatendile bunee: “Nkwenda kuzuba byena.” Bamubwide bunee: “Nu iswe tukwenda gamozi nobe.” Bendile nu beingide mu bwato, tondo mu kindi kikyo tabeitile kango. 4 Nu gakede busi, Yesu emenne ku mutili wa kitatenge, tondo beigisibwa tabamenyine buno u Yesu. 5 Yesu ababuzizie bunee: “Bana bane, ndi tamuli n'idia?” Bamwakwide bunee: “Kilo.” 6 Ababwide bunee: “Mwise kakila ku lulenge lwa kwidume lwa bwato, nu nti mwite byena.” Ububo bakeisileko nu tabavwamine kukabuluta, kubuno kabezaga keiyala na byena. 7 Mwigisibwa watundagwa na Yesu atendile ku Petro bunee: “Wono u Mukota!” Gongule Simoni Petro buno We u Mukota, avwalile nsulu zage (kubuno abezaga eikungula) nu eidekede mu kitatenge. 8 Bango beigisibwa bavule na bwato kubuno tababezaga bulazi na mutili, tugu bwigi na metres lukama lumozi, nu babulutile kako kakila kabezaga keiyala na byena. 9 Gabatukile mu bwato, bamonine ku makangania ma keiya nu gantata gamo gokibwa byena nu kampampa. 10 Yesu ababwide bunee: “Vwazi na byena bimozi bimwitaga.” 11 Simoni Petro eingide mu bwato nu abulutile kakila ku muse keiyala na byena binene byakuka lukama nu makumi matano nu bisatu. Byena byabezaga byingi nunse, tondo kakila takatikile. 12 Yesu abatendile bunee: “Vwazi mulie.” Takwabezaga umozi wa ku beigisibwa bage wamubuzizie bunee: “Uli nazi?” Kubuno bamenyine buno We u Mukota. 13 Yesu asigelede bwigi, nu atolile kampampa nu byena ku keiya nu kubakasabyo.
14 Lilyo lyabezaga limbizi lya masatu Yesu akumonekako na beigisibwa bage kutukila kuyuka kwage kutuka ku bakuzi.
Yesu nu Petro
15 Gabasilile kulia, Yesu abwide Simoni Petro bunee: “Simoni, mwana wa Yona, ndi wantunda kutinga babano?” Amwakwide bunee: “Ee, Mukota, wizi buno nakutunda.” Yesu amubwide bunee: “Lisia byana byane bya mikoko.” 16 Yesu amubwide lingo limbizi lya mabili bunee: “Simoni, mwana wa Yona, ndi wantunda?” Petro amwakwide bunee: “Ee, Mukota, wizi buno nakutunda.” Yesu amubwide bunee: “Ulisie mikoko zane.” 17 Yesu amubuzizie limbizi lya masatu bunee: “Simoni, mwana wa Yona, ndi wantunda?” Petro abede na kabebe nunse kubuno Yesu amubuzizie limbizi lya masatu bunee: “Ndi wantunda?” Amubwide bunee: “Mukota wizi binsania, wizi buno nakutunda.” Yesu amubwide bunee: “Lisia mikoko zane. 18 Lebelebe nkukubula buno, gawabezaga musikila, wivwalikagia uwenyene mukoma wobe nu kwenda kuwatundaga, tondo gawabe mukungu walambye maboko mobe nu nti ungo muntu akuvwalikye mukoma nu kukwenzia kuko kuutatundaga kwenda.” 19 (Yesu atendile bitondo bibino kwa kulolesia buni bwabe lukita lwa kukua kwage, nu buni bwaganune Kalaga ku lukuo lwage.) Kusila kwa kutenda bubo; Yesu amubwide bunee: “Nyange.”
Yesu nu Mwigisibwa Waatundaga
20 Petro akebetukile nu amonine ku mwigisibwa watundagwa na Yesu akubayanga, wozo wabezaga wegamina ku bukuba bwa Yesu ku nkungu zibaliaga nu wamubuzizie bunee: “Mukota, nazi wozo wakugabule?” 21 Petro, gaamumonineko, abuzizie Yesu bunee: “Mukota, buni bwabe wono?” 22 Yesu amwakwide bunee: “Ndi natunda buno alame aaba nu kwika ku kusubya kwane, nti buli kikizi kuguli? Nyange tugu.” 23 Ububo musagu wono wabalangenne munkatini mwa beigisibwa buno mwigisibwa wono ntakue, tondo atendile bunee: “Ndi natunda buno alame aaba nu kwika ku kusubya kwane, nti buli kikizi kuguli?”
24 Wono u mwigisibwa ukulongeka bitondo bibino nu kubisanza, nu twizi buno bulongeki bwage buli bulili.
25 Kuli bingo bitondo byingi byakitile Yesu. Songo byasanzilwe kimozi kimozi, nkukengela buno songo kisi kinsania takinakukile mikanda zinasanzilwe.