Kuyuka kwa Yesu Kutuka ku Bakuzi
20
1 Busi butangi bw'izinga mu mukelo, Maria wa Magadala endile ku nsinda, kwabezaga kukili kapilo; nu amonine buno ikozi lyatukizibwe ku mwingilo wa nsinda. 2 Nu endile lubilo kuli Simoni Petro nu ku wozo ungo mwigisibwa watundagwa na Yesu, nu abatendile bunee: “Batikizye Mukota mu nsinda, nu tatwizi kuni kubamubikile.” 3 Petro nu wozo ungo mwigisibwa batukile nu bendile ku nsinda. 4 Bo babili beitumine lubilo gamozi, tondo wozo ungo mwigisibwa asasizie kutinga Petro, nu abasile mutangi ku nsinda. 5 We akumbaminne nu kwinamina, nu amonine ku lilyo isanda lyatebagwa na muntu lili gago, tondo nteingide mo. 6 Kumbusa Simoni Petro wamuyangaga, abasile, eingide mu nsinda nu amonine ku lilyo isanda lili gago, 7 nu ku zezo zengo nsulu zabezaga zabikwa gantata g'itoe lya Yesu, tazabezaga gamozi n'engo nsulu, tondo zabezaga zagondwa bwagebwage ga kingo kiziki. 8 Nu wozo mwigisibwa walingile kubasa ku nsinda eingidemo nu we, nu amonine kuzo nu akatizizie. 9 (Kubuno beigisibwa babezaga tabemenyinina masanzo makutenda buno Yesu atunganana kuyuka kutuka ku bakuzi). 10 Kumbusa babo beigisibwa babili basubizie kwabo. Maria wa Magadala Amonine ku Yesu
11 Tondo Maria abezaga emana kumbuga bwigi na nsinda, nu alilaga. Nu gaabezaga akulila, akumbaminne buno einamine mu nsinda, 12 nu amonine ku banzelo babili bavwala nsulu zenga, beikala ga kiziki kyabezaga kiyombekibwa kitumba kya Yesu, umozi ku itoe nu ungo ku magulu. 13 Banzelo bamubuzizie bunee: “Mukikulu, kubuni kuukulila?” Abakwide bunee: “Kubuno batikizye Mukota wane, nu nsizi kuni kubamubikile.” 14 Gaabezaga eki atenda bubuno, akebetukile kumbusa nu amonine ku Yesu emenne gago, tondo ntamenyine buno wozo u Yesu. 15 Yesu amubwide bunee: “Mukikulu, kubuni kuukulila? Ukulonda nazi?” Nu we akengelaga buno eli mulangi w'isoa. Maria amubwide bunee: “Mukota, ndi uwe u wamutikizye, kasi ntende kuni kuwamubikile nu nti namutole.” 16 Yesu amubwide bunee: “Maria!” nu Maria agalukile kuli Yesu nu amutendile mu kiAramu bunee: “Rabboni,” (bwisulilwa buli bunee: “Musozi”). 17 Yesu amubwide bunee: “Ntunkateko, kubuno nsibakama kuli Tatane, tondo enda kuli mibuto zane nu ubatende bunee: ‘Nabakama kuli Tatane nu Soinyuwe, kuli Kalaga wane nu Kalaga weinyu.’” 18 Ububo Maria Magadala endile kusambalila beigisibwa buno amonine ku Mukota, nu buno amusambalide bitondo bibino.
Yesu Amonekileko na Beigisibwa Bage
19 Mwigolo lya bubo busi butangi bw'izinga, beigisibwa bakundamenne gamozi mu numba umozi, nu nibi zabezaga zigalwa, kubuno bakuaga baYuda boba. Yesu ababaside nu emenne munkatini mwabo, nu abatendile bunee: “Bubobelelo bube kumuli!” 20 Nu gaasilile kutenda bubo, abalolesizie maboko mage nu mpege zage, nu beigisibwa babede na mbogimbogi gabamonine ku Mukota. 21 Yesu ababwide lingo bunee: “Bobelelazi: anga bwansingile Tatane, u bubo nu nne bunkumusinga.” 22 Nu gaasilile kutenda bubo, abopide, nu Yesu ababwide lingo bunee: “Itabiziazi Muuza Wasililila. 23 Babo bamwasigilila bwagi bwabo, nti basigililwe, nu babo bamutasigilila bwagi, nti tabasigililwe.”
Yesu nu Toma
24 Toma, wamanagwa Iyasa, umozi wa ku babo beigisibwa ikumi nu babili, ntabezaga gamozi nabo nkungu zibamonine ku Yesu. 25 Bango beigisibwa bamubwide bunee: “Twamonine ku Mukota.” Tondo Toma abakwide bunee: “Ndi nsyamona ku mikolu za misumali mu makasa mage, nu ndi nsyabika munwe wane ku mikolu za misumali nu kubika ikasa lyane mu mpege zage, nne nti nsinakatizia nunse.”
26 Kumbusa kwa bindi kinana, beigisibwa ba Yesu bakundamenne lingo mu numba, nu Toma abezaga gamozi nabo. Nibi zabezaga zakandwa, tondo Yesu ababaside nu emanine munkatini mwabo nu abatendile bunee: “Bubobelelo bube kumuli!” 27 Nu abwide Toma bunee: “Bika munwe wobe gano, lola makasa mane nu lambya ikasa lyobe nu ulibike ku mpege zane. Ntube lingo muntu utakatizia, tondo katizia!” 28 Toma amwakwide bunee: “Mukota wane nu Kalaga wane!” 29 Yesu amubwide bunee: “Wankatizia kubuno wammonako? Mbogimbogi ku babo bakunkatizia geteli kummonako!”
Yoana Asanzile Mukanda Wono ku Kabamba Kakizi?