Yesu Akuvwalikibwa Nkumbu za Mikele
19
1 Pilato akakizizie buno bakate Yesu nu bamulibule na tususu. 2 Bakoloboyo balukile nkumbu za mikele, nu bazibikile ku itoe lya Yesu. Bamuvwalikizie nsulu zakisimana, 3 kusila bamuvwilaga mambizi meingi bamulibulaga, nu bamubulaga bunee: “Samba, Mukota wa baYuda!” Nu bamulibwide ngizi. 4 Pilato abasile lingo kumbuga, nu atendile ku baYuda bunee: “Lolazi, nkumuvwila nage kumbuga buno mumenye buno nsikumona muntu wono buno eli na kitondo kyampa kya kumusungia kukyo.” 5 Yesu abasile kumbuga, abezaga avwala zezo nkumbu za mikele nu nsulu zakisimana. Nu Pilato ababwide bunee: “Lolazi muntu wono!” 6 Tondo basankoga banene nu balangi ba numba za kukumbamina gabamumonineko, balalukile bunee: “Mumutake ku musalaba! Mumutake ku musalaba!” Pilato abakwide bunee: “Mukatazi mubenyene nu mumutake ku musalaba; kubuno nsikumona mu muntu wono buno eli na kitondo kyampa kya kumusungia kukyo.” 7 BaYuda bamwakwide bunee: “Tuli na mulembe, nu kuyangana na wozo mulembe, atunganana kukua, kubuno eibwide buno eli Mwana wa Kalaga.”
8 Gongule Pilato ku bubo, itide kuba na boba, 9 nu eingide lingo mu numba za bwangato, abuzizie Yesu bunee: “Kuni kuwatukile?” Tondo Yesu ntamwakwide kampa. 10 Pilato amubwide bunee: “Ntukuziga kutenda na nne? Ndi ntwizi buno nili na bwangato bwa kukukandula, nu lingo nili na bwangato bwa kukutaka ku musalaba?” 11 Yesu amwakwide bunee: “Ntunabede na bwangato kundi, songo Kalaga ntakukasagebo kutuka mwigulu. Ku bubuno, wozo wankasenne kuguli eli mwagi nunse kukutinga.” 12 Kutukila nkungu zezo, Pilato alondile nzila za kukandula Yesu, tondo baYuda balalukile bunee: “Ndi wakandula muntu wono, nti ntuli kilemba kya Kaisari.”
13 Nu gongule Pilato ku bitondo bibino, abasizie Yesu kumbuga nu eikede ga kisumbi kya lusungio, ga kiziki kyamanagwa “Makozi” (nu ku kiEbrania “Gabata”). 14 Bubo busi bwabezaga busi bwa kuyamina Kisagulo ky'Isuluko, bwigi na nkungu mutuba. Pilato atendile baYuda bunee: “Lolazi mukota weinyu!” 15 Tondo balalukile bunee: “Mwitazi! Mwitazi! Mutakazi ku musalaba!” Pilato ababwide bunee: “Ndi nne nitake mukota weinyu ku musalaba?” Basankoga banene bakwide bunee: “Tatuli na ungo mukota, umpanga mukota Kaisari.” 16 Kumbusa Pilato abakasile Yesu buno bamutake ku musalaba, nu bamukatile nu bendile nage.
Yesu Akutakwa ku Musalaba
17 Yesu ekile musalaba wage wenyene, atukile mu mwino nu endile ku kiziki kyamanagwa “Lukungu” (Ku kiAramu “Golgota”). 18 Nu kuko, bakoloboyo batakile Yesu ku musalaba gamozi na bango bantu babili. Umozi ku seidume nu ungo ku seikazi, nu Yesu gabasamba.
19 Nu Pilato asanzile masanzo nu kumanika ku musalaba. Kwasanzilwe bunee: “YESU WA KU NAZARETI, MUKOTA WA BAYUDA.” 20 BaYuda beingi basomine masanzo mamo, kubuno kiziki kyatakilwe ku Yesu kyabezaga bwigi na mwino, nu masanzo masanzilwe mu kiAramu, mu kiLatini nu mu kiGriki. 21 Basankoga banene ba baYuda babwide Pilato bunee: “Ntusanze, Mukota wa baYuda, tondo sanza buno, Muntu wono abwide bunee: ‘Nili Mukota wa baYuda.’” 22 Pilato abakwide bunee: “Bubo bunasanzile, busigale bwasanzwa bubo.”
23 Gasilile bakoloboyo kutaka Yesu ku musalaba, batolile nsulu zage, nu bazatenne ku bibe binazi, nawe nawe na kyage. Batolile lingo nsulu zage zabezaga emozi nu tazabezaga zasonwa kutukila kuntata nu kubasa kunsi. 24 Bakoloboyo batendenne bwabobwabo bunee: “Tatuzate, tondo tuzeselazi mbale nu tumenye nazi wazilase.” Bubo bwabezaga buno masanzo mazindilile makutenda bunee:
“Babegenne nsulu zane bwabobwabo,
Nu beside nkanzu zane mbale.” a
Bubo u bwakitile bakoloboyo.
25 Bwigi na musalaba wa Yesu, kwabezaga kwemana nina nu nina mwana muto, Maria mukikulu wa Kleopa nu Maria wa mwino wa Magadala. 26 Gamonine Yesu ku nina nu mwigisibwa waatundaga nunse bemana bwigi nage, atendile ku nina bunee: “Mukikulu, lola mwana wobe!” 27 Nu abwide wozo mwigisibwa bunee: “Lola nyoko.” Nu mu zezo nkungu, mwigisibwa wozo endile nage kwage.
Kukua kwa Yesu
28 Kusila kwa bubo, Yesu amenyine buno bitondo binsania byasila, buno masanzo mazindilile, atendile bunee: “Nili na mpusia.” b 29 Ga kiziki kikyo gabezaga nyungu ziyala na mazi ma ngigi. Bakoloboyo baswikile lwata lwizile na mazi mamo ku kati nu bamukominelo ku busundo. 30 Gaasilile kusonda ku mazi ma ngigi, Yesu atendile bunee: “Bwasila!” nu akolobwede itoe gansi nu eidekanizie.
Mukoloboyo Asumitile Yesu mu Mpege
31 Bwabezaga busi bwa kuyamina Busi bwa Kumunwa, u bwa Sabato, nu ku bubo tabwakulungenne ku baYuda kusiga bitumba ku misalaba Busi bwa Kumunwa, kubuno busi bubo bwabezaga bunene. Ububo bakoloboyo basegile Pilato buno babungule makwa ma ku magulu ma bantu batakwa ku misalaba, nu kutikya mibili zabo. 32 Ububo bakoloboyo bavule nu babungwide makwa ma ku magulu ma muntu mutangi, kusila ma muntu wa babili, babo batakilwe gamozi na Yesu. 33 Tondo gababasile kuli Yesu, bamonine buno alekenne kalazi, nu tababungwide makwa ma ku magulu mage. 34 Tondo umozi wa ku bakoloboyo amusumitile n'isumo mu mpege, nu kazanga kongo mikila nu mazi byabasile. 35 Nu wozo wamonine ku bitondo bibino abilongekile nu bulongeki bwage buli bulili, nu we eizi buno akutenda bulili buno nu inyuwe mukatizie. 36 Bubuno bwakitilwe buno masanzo mazindilile bunee:
“Takuli limozi ku makwa mage likabungulwa.” c
37 Nu kuli mango masanzo makutenda bunee:
“Bakalola wozo u basumitile.” d
Kuyikwa kwa Yesu mu Nsinda
38 Kusila kwa bubo, Yosefu, muntu wa ku Arimatea, we abezaga mwigisibwa wa Yesu ku lumbisombiso, kubuno abezaga na boba ku baYuda, asegile Pilato bwangato bwa kutola kitumba kya Yesu. Nu Pilato amukasile bwangato. Ububo endile nu atolile kitumba kya Yesu. 39 Nu Nikodemo, wozo walingile kwenda kumonana na Yesu mu kindi, avule nu we, nu avule eka bwigi na kilo makumi manazi kya bulago kyasambikibwa na aliga lya nsunu nsoga. 40 Bo babili batolile mubili wa Yesu, bagugondile n'isanda gamozi, nu kugubongia bubo bulago anga bwabezaga lukita lwa baYuda nkungu zibakuyika muntu. 41 Nu ga kikyo kiziki gabatakile Yesu, gabezaga isoa, nu mu lilyo isoa mwabezaga nsinda nto, nu zabezaga taziyikwa mu muntu wampa. 42 Babikile Yesu mu nsinda zezo, kubuno bwabezaga busi bwa kulongeka Busi bwa Sabato bwa baYuda, nu zezo nsinda zabezaga bwigi.