Yesu Lwabusio lwa Pilato
23
1 Nu bemanukile bansania nu basondelezizie Yesu lwabusio lwa Pilato. 2 Nu balingile kumukandika bitondo nu kutenda bunee: “Twasanga wono muntu akugalukya kilongo kyeitu ku bubi, nu kunania kuliga kodi kwa Kaisari nu akwisambala wenyene buno eli Kristo Mukota.” 3 Pilato amubuzizie bunee: “Ndi uli Mukota wa baYuda?” Yesu amwakwide bunee: “Wabutenda.” 4 Nu Pilato abwide bakota ba basankoga, nu musanganano bunee: “Nsikumona ku bwagi bwampa mu wono muntu.” 5 Tondo bitide kutenda bunee: “Mu meigisia mage, akusindika bantu kukita mulubu kunsania mu Yudea, kutukila ku Galilaya kwalingide aaba nu gano.” Yesu Lwabusio lwa Herode
6 Gongule Pilato ku bubo, abuzizie bunee: “Ndi muntu wono eli muGalilaya?” 7 Nu gaamenyine buno Yesu abezaga muntu wa kunsi kwa bwangato bwa Herode, amusingile kwa Herode wabezaga nu we ku Yerusalema mu bindi bibyo. 8 Gamonine Herode ku Yesu, abede na mbogimbogi nunse, kubuno kutukila wakalazi, eiyaninaga kumumonako, ku kabamba ka buno ongwaga bubakutenda kweli, nu alemaninaga kumona kwakukita mugeleko umozi. 9 Amubuzizie mbuzio ningi; tondo Yesu ntamwakwide bwampa. 10 Bakota ba basankoga nu basozi ba milembe babezaga bemana gago nu kumukandika bitondo na magala. 11 Herode nu bakoloboyo bage, bamwililikile nu kumubenga; nu kusila kwa kumuvwalikya nsulu nsoga, amusubizie ku Pilato. 12 Ku bubo busi, Pilato nu Herode bagomezie, nu bo babezaga basombana wakalazi.
Yesu Alongekedwe Kukua
13 Pilato akundamanizie bakota ba basankoga, bangati nu bantu, 14 nu ababwide bunee: “Mwamvwilide na wono muntu buno akusindika bantu kukita mulubu nu namulondozizie lwabusio lweinyu, tondo nsyamumonine na bwagi bumozi ku bitondo bimwamukandikile kubyo; 15 aba Herode nu we, kubuno atusubizizie We, nu lola, muntu wono ntakitile kitondo kyampa kyatananina kukwila ku muntu. 16 Ububo umpanga, namususule, nu nti namukandula.” 17 (Kubuno na busi na busi bwa kisagulo, abezaga atunganana kubakandulila mukandwa umozi.) 18 Tondo balalukile bansania gamozi bubibu bunee: “Tikya wono muntu nu utukandulile Baraba!” 19 Nu Baraba abikilwe ku kikando ku kabamba ka mulubu wakitilwe mu mwino nu ku kabamba ka kwita muntu. 20 Ku kutunda kukandula Yesu, Pilato atendile nabo lingo. 21 Tondo balalukile bunee: “Mwitazi ku musalaba! Mwitazi ku musalaba!” 22 Pilato ababwide limbizi lya masatu bunee: “Kubuni? Bubi bukizi bwakitile? Mweli, nsyamonine ku kitondo kyampa kyatananina kukwila ku muntu. Umpanga namususule nu nti namukandule.” 23 Tondo bitide kulaluka bubibu nu kusega buno eitwe ku musalaba. Nu moki mabo makindile nunse. 24 Ububo Pilato akakizizie buno bubo bubasegaga bukitwe. 25 Akandwide wozo wabikilwe mu kikando ku kabamba ka mulubu nu ku kabamba ka kwita muntu, u wozo u basegaga; tondo akasenne Yesu kubeli buno bakite anga bubatundaga.
Bakwita Yesu ku Musalaba
26 Gababezaga bese benda nage, bakatile muntu umozi wamanagwa Simoni, wa ku Kurene, nu we atukaga ku masoa nu bamwekezie wozo musalaba buno aweke kumbusa kwa Yesu.
27 Nu musanganano munene wa bantu nu bakikulu babezaga bakwidibula ku bukuba nu bakulabaza ku kabamba kage, bamuyangile. 28 Yesu akebetukile kubeli; nu abwide bunee: “Bakinga ba Yerusalema, tamulile ku kabamba kane; tondo idililazi mubenyene nu lilazi ku kabamba ka bana beinyu. 29 Kubuno bindi byavwe, bantu batende bunee: ‘Mbogimbogi ku bakikulu bagumba, mbogimbogi ku nda zitabuta, nu ku mabele matamomezie!’ 30 Nu bakalinga kutenda miduko minene bunee: ‘Guazi gantata geitu!’ Nu ku miduko mikeke bunee: ‘Tulimbazi!’ 31 Kubuno, ndi bakukita bitondo bibino ku muti mubisi, buni bunaba ku muti woma?”
32 Mu nkungu zezo, basondelezizie bakiti babili ba mibi buno batunganana kwitwa gamozi na Yesu. 33 Gababasile ga kiziki kyamanagwa bunee: “Lukungu” batakile Yesu ku musalaba, nu babo bakiti babili ba mibi nu bo, umozi ku seidume nu ungo ku seikazi. 34 Yesu abwide bunee: “Tatane, basigilile, kubuno tabeizi bubakukita.” Nu beidonganizizie nsulu zage ku kuzesa mbale. 35 Bantu babezaga bemana gago nu bengelesagia. Nu bangati beililikile Yesu nu kutenda bunee: “Onezie bango; kasi eiyonie wenyene ndi eli Kristo, Musombolwa wa Kalaga!” 36 Bakoloboyo nu bo bamwililikile nu basigelede bwigi nage nu bamukasile mazi meli ngigi, 37 nu babwide bunee: “Ndi uli mukota wa baYuda, iyonie uwenyene!” 38 Nu kwabezaga isanzo lilino gantata gage: “WONO ELI MUKOTA WA BAYUDA.”
Babo Bakuaga Gamozi na Yesu
39 Umozi wa ku babo bakiti ba mibi batakilwe ku musalaba amulingile, nu atendile bunee: “Ndi ta uwe u Kristo? Iyonie uwenyene nu utonie nu iswe!” 40 Tondo wozo ungo amuzugide, nu abwide bunee: “Ndi ntukukua tugu Kalaga boba, nu uwe ukusungibwa bumozi nage? 41 Tondo beiswe, tukusungibwa bwisanana, kubuno tukukata nsungio zatunganana na mibi zeitu; tondo wono ntakitile bwagi bwampa.” 42 Nu atendile Yesu bunee: “Nti wankengela nkungu ziukeingila mu bukota bwobe!” 43 Yesu amwakwide bunee: “Lebelebe nkukubula buno, lelo wabe gamozi na nne mu Paradizo.”
Kukua kwa Yesu
44 Zabezaga bwigi na nkungu mutuba za mu musi, nu kwabede kapilo mu kisi kinsania aaba nu kubasa ku nkungu za mubula. 45 Nu kisongo kya busi kyabede kapilo, nu nsulu za mu numba za kukumbamina zatikile munkatini. 46 Yesu alalukile n'iyuki inene bunee: “Tatane, nabika kalamo kane mu maboko mobe.” Nu gaasilile kutenda bitondo bibino, eidekanizie. 47 Mukota wa bakoloboyo, gaamonine ku bubo bwaba, aganwine Kalaga, nu abwide bunee: “Lebelebe wono muntu abezaga wisanana!” 48 Nu bantu bansania babezaga bavwa kulola ku bitondo bibino, gabasilile kumona ku bubo bwabede, basubizie kwabo bakwidibula ku bukuba. 49 Nu bansania babezaga bemana bulazi nu balolaga ku bubo bwatingaga.
Bese Babika Yesu mu Nsinda
50 Kwabezaga muntu umozi wamanagwa Yosefu, wabezaga umozi wa ku lusu lwa basunguzi, muntu musoga nu wisanana, 51 nteitabizizie lwango lwabo aba nu kukita kwabo. Abezaga muntu wa ku Arimatea, mwino umozi wa baYuda, nu alindilaga bukota bwa Kalaga. 52 Wono muntu endile ku Pilato nu asegile kitumba kya Yesu. 53 Nu akigezizie ku musalaba, nu akigondile na nsulu zabota, nu akibikile mu nsinda zabazilwe mu lwanda, mumo mwabezaga tamubikwa ungo muntu. 54 Bwabezaga busi bwa kulongeka, nu Sabato zabezaga zise bwigi na kulinga.