Kugabulwa kwa Yesu nu Kukatwa Kwage
18
1 Gasilile Yesu kutenda bubo, endile na beigisibwa bage ku lisilya lya luuzi lwa Kiduroni. Kuko kwabezaga isoa nu eingide mulyo na beigisibwa bage. 2 Yuda wozo wamugabwide, amenyaga ku kikyo kiziki, kubuno Yesu nu beigisibwa bage bakundamanaga kukyo mambizi meingi. 3 Yuda atolile kibombo kya bakoloboyo nu bangati basingagwa na basankoga banene nu baFarisayo, nu endile kuko na tusuku, tumekemeke nu ngabo za bita. 4 Yesu, amenyine binsania byamubasile, endile kubeli nu ababuzizie bunee: “Nazi u mukulonda?” 5 Bamwakwide bunee: “Yesu wa ku Nazareti.” Yesu abakwide bunee: “U nne wono.” Yuda wozo wamugabwide, abezaga emana gamozi nabo. 6 Gabakwide Yesu bunee: “U nne wono,” basubizie lumbusambusa nu bagwede gansi. 7 Yesu ababuzizie lingo bunee: “Nazi u mukulonda?” Batendile bunee: “Yesu wa ku Nazareti.” 8 Yesu abakwide bunee: “Namutendile buno u nne wono. Umpanga ndi nne u u mukulonda, sigazi bantu babano beiyendele.” 9 Atendile bubo buno buzindilile bwatendilwe bunee: ‘Nsyazimizizie wampa ku babo bawankasile.’ 10 Simoni Petro, wabezaga na mwene, agubasizie mu musagi, nu asesile kutuzi kwa seidume kwa mukiti umozi wa sankoga munene. Izina lya wozo mukiti lyabezaga Malko. 11 Tondo Yesu abwide Petro bunee: “Ingizia mwene wobe mu musagi. Ndi nsikanua kituma kyankasile Tatane?” Yesu Lwabusio lwa Ana
12 Kibombo kya bakoloboyo nu mukota wabo gamozi na balangi ba baYuda bakatile Yesu nu bamukandile. 13 Bendile nage tanga kwa Ana, kubuno we abezaga isibyala wa Kayafa wabezaga sankoga munene mu wozo mwaka. 14 Nu wozo Kayafa u wakasenne lwango luluno ku baYuda bunee: “Bunaswaga buno muntu umozi akwile kilongo kinsania.”
Petro Akutuna Yesu
15 Tondo Simoni Petro nu ungo mwigisibwa bayangile Yesu. Wozo mwigisibwa amenyinwe na sankoga munene, nu eingide na Yesu ku lukumbo lwa numba za sankoga munene. 16 Tondo Petro abezaga emana kumbuga, bwigi na lwibi. Wozo mwigisibwa wamenyagwa na sankoga munene, abasile nu atendile na mukikulu wabezaga mulangi wa lwibi, kusila eingizizie Petro. 17 Nu mukikulu walangaga lwibi atendile Petro bunee: “Uwe nu uwe ndi ntuli umozi wa ku beigisibwa ba wozo muntu?” Akwide bunee: “Kilo, nne nsili mwigisibwa wage.”
18 Nu babo bakiti nu balangi babezaga bemana gago, gabakongezie keiya, kubuno kwabezaga mpego, nu bongwaga keiya. Petro nu we emenne gamozi nabo nu ongwaga keiya.
Sankoga Munene Akubuzia Yesu
19 Sankoga munene abuzizie Yesu musagu wa beigisibwa bage nu wa meigisia mage. 20 Yesu amwakwide bunee: “Natendile bwasibwasi ku kisi; nigisizie busi na busi mu numba za misanganano nu mu numba za kukumbamina mukukundamanaga baYuda bansania, nu nsyatendile kampa mu lumbisombiso. 21 Kubuni kuukumbuzia? Buzia babo bongule bunatendile. Lola, bo beizi binsania binabasambalide.” 22 Gatendaga Yesu bitondo bibino, umozi wa ku balangi wabezaga gago, amulibwide lugizi nu amubwide bunee: “Bubuno ndi u buukwakula sankoga munene?” 23 Yesu amwakwide bunee: “Ndi natendile bubi, lolesia bubi bukizi bunatendile nu ndi natendile busoga, kubuni kuukundibula?”
24 Nu Ana amusingile akandwa kuli Kayafa sankoga munene.
Petro Akutuna Yesu Lingo
25 Simoni Petro abezaga emana gago nu ongwaga keiya. Bamubwide bunee: “Uwe nu uwe, ndi ntuli umozi wa ku beigisibwa bage?” Tondo Petro atunine nu atendile bunee: “Kilo, nne nsili mwigisibwa wage.” 26 Umozi wa ku bakiti ba sankoga munene wabezaga mubuto wa wozo wasesagwa kutuzi na Petro amubuzizie bunee: “Ndi nsyakumonineko gamozi nage mu isoa?” 27 Petro atunine lingo, nu atendile bunee: “Kilo, tabuligo,” nu kazanga kongo mulume wa nkoko abikile.
Yesu Lwabusio lwa Pilato
28 Gabatukile ku numba za Kayafa, bendile na Yesu ku numba za mwangati (Praitorio), a mu nindunindu. Tondo baYuda bobenyene tabeingide mu zezo numba za mwangati buno banavwa kubigibwa nu kutalia ku Kisagulo ky'Isuluko. 29 Ububo Pilato abasile kubeli nu ababuzizie bunee: “Kubuni kumukusongela muntu wono?” 30 Bamwakwide bunee: “Songo muntu wono ta mubi, songo tatwamugabwide kuguli.” 31 Ku bubo, Pilato ababwide bunee: “Mumutole inyuwe mubenyene, nu mumusungie anga buli milembe zeinyu.” BaYuda bamwakwide bunee: “Tatwakasilwe bwangato bwa kwita muntu.” 32 Bubo bwabede buno bwatendaga Yesu buzindilile, ku kulolesia lukita lwa lukuo lwakakua. 33 Pilato asubizie mu numba za bwangato nu amanine Yesu nu amubuzizie bunee: “Ndi uwe uli mukota wa baYuda?” 34 Yesu amwakwide bunee: “Ndi ukutenda bubo ku makengelo mobe uwenyene, aba ndi bango bantu u bakusambalide bitondo byane?” 35 Pilato akwide bunee: “Ndi nne nili muYuda? Bantu ba kilongo kyobe nu basankoga banene bakugabwide kundi. Kitondo kikizi kiwakitile?” 36 Yesu amwakwide bunee: “Bukota bwane tabuli bwa kisi kikino. Songo bukota bwane bwabezaga bwa kino kisi, songo bakiti bane baneitenne bita ku kabamba kane buno ninavwa kugabulwa ku baYuda; tondo kano kaluma, bukota bwane tabuli bwa gano ga kisi.” 37 Pilato amubwide bunee: “Ndi uwe uli mukota?” Yesu akwide bunee: “Uwe u ukubutenda: nili mukota. Lola, ku kabamba kakano nabutilwe nu navule mu kisi ku kitondo kikino buno nilongekele bulili. Nu na muntu unsania wa bulili akungwilila iyuki lyane.” 38 Pilato amubuzizie bunee: “Kikizi u bulili?”
Pilato Asungizie Yesu Buno Akue
Kusila kwa kutenda bubo, Pilato atukile lingo nu endile kwabezaga baYuda, nu ababwide bunee: “Nsikumona mu muntu wono buno eli na kitondo kyampa kya kumusungia kukyo. 39 Tondo ku kabamba ka buno buli lukita lweinyu, buno nne nimukandulile muntu umozi mu nkungu za Kisagulo ky'Isuluko; umpanga ndi mukutunda nimukandulile mukota wa baYuda?” 40 Nu balalukile lingo bunee: “Kilo, ta wozo; tondo Baraba.” Nu Baraba abezaga munyagi.