Bakota Bakukala Lwango lwa Kwita Yesu
22
1 Gabede busi bwa kisagulo kya tumpampa tutagaga buse bwigi, bwamanagwa Kisagulo ky'Isuluko, 2 bakota ba basankoga nu basozi ba milembe balondile buni bubaneita Yesu, tondo bakule bantu boba. 3 Nu Satana eingide mu Yuda, wamanagwa Iskariota, nu we abezaga umozi wa babo ikumi nu babili. 4 Nu Yuda endile kutendana na basankoga banene nu bakota ba balangi ba numba za kukumbamina buno buni bwanavwama kubagabulila Yesu. 5 Babogilebogile nu beitabizanizie kumukasa bikulo. a 6 Yuda eitabizizie nu alondile nzila za kukasana Yesu nkungu ziteli musanganano.
Yesu Akulongeka Idia lya Kisagulo ky'Isuluko
7 Nu busi bwa tumpampa tutagaga bwabasile, bubatunganenne kusesa kyana kya mukoko kya Kisagulo ky'Isuluko kuba kayulo, 8 nu Yesu asingile Petro nu Yoana nu kutenda bunee: “Endazi mutulongekele idia lya Kisagulo ky'Isuluko buno tulilie.” 9 Bamubuzizie bunee: “Ukutunda tulilongekele kuni?” 10 Abakwide bunee: “Lola, gamwingile mu mwino, mwakulumane na wamulume umozi weeka idega lya mazi; muyangazi mu numba ziingile muzo, 11 nu nti mwasambalila nyene numba bunee: ‘Musozi akukubuzia buno, kuni kuli busio bwa bageni kunalie Kisagulo ky'Isuluko gamozi na beigisibwa bane?’ 12 Nu nti amulolesie busio bunene bwa kwigulu buli na bintu byatunganana ku Kisagulo nu kuko u kumwalongekele Kisagulo ky'Isuluko.” 13 Bendile nu basangile binsania kayikayika anga bwabatendaga Yesu, nu balongekile Kisagulo ky'Isuluko.
Meza ma Mukota
14 Gakukile nkungu, Yesu nu beigisibwa bage beikede kulia ku meza. 15 Ababwide bunee: “Niyaninaga nunse kulia Kisagulo ky'Isuluko gamozi na inyuwe lwabusio nsisungibwa! 16 Kubuno, nkumutenda buno, nsikakilia lingo aaba nu gakikazindilila mu bukota bwa Kalaga.” 17 Nu gatolile Yesu kituma nu kuganuna, abwide bunee: “Tolazi kituma kikino nu longaniazikyo gamusamba. 18 Kubuno nkumutenda buno, nsikanua lingo mazi makutuka ku biguma bya mizabibu, aaba nu gakavwa bukota bwa Kalaga.”
Kakengelezio ka Mubili wa Yesu nu Mikila Zage
19 Kusila atolile kampampa, nu gaasilile kuganuna, akabungwide nu abakasile ko nu kutenda bunee: “Wono guli mubili wane, wakasenwe ku kabamba keinyu; kitazi bubuno bumukankengelaga.” 20 Atolile kituma nu kyo kusila kwa kulia, nu abakasile kyo nu kutenda bunee: “Kituma kikino kili idagano ito mu mikila zane zakubulwa ku kabamba keinyu.”
21 “Tondo lolazi, kuboko kwa wozo ukunkasana, kuli gamozi na Nne ku meza mamano. 22 Mwana wa Muntu eiyendela anga bwalongekilwe. Tondo kabebe ku wozo muntu wamukasana!” 23 Nu balingile kubuzania bwabobwabo buno nazi wa mubeli unakita kitondo kikino?
Nazi uli Munene?
24 Kwabede myango gasamba beigisibwa buno, nazi wa kubeli unavwama kukengelwa kuba munene nunse? 25 Yesu ababwide bunee: “Bakota ba baBilongo babangata, nu babo beli na bwangato kubatinga bakumanwa bunee: ‘Bakiti ba busoga.’ 26 Tondo bubo tabube kumuli, tondo wozo munene munkatini mweinyu, abe anga mwana muto, nu wozo ukwangata, abe anga mukiti. 27 Kubuno nazi uli munene nunse, ndi wozo uli ku meza aba wozo ukukita? Ndi ta wozo uli ku meza? Tondo nu nne nili munkatini mweinyu anga wozo ukukita!
28 Inyuwe u babo babezaga gamozi na nne mu malindiko mane mansania. 29 Ku bubo, namubikila bukota anga bubo bwambikide Tatane bukota, 30 buno mulie nu munwe ku meza mane mu bukota bwane, nu mwikale ga bisumbi bya bukota nu kusungia bilongo ikumi nu bibili bya baIsraeli.”
Yesu Akusambala Buno Petro Amutune
31 Mukota atendile bunee: “Simoni, Simoni ungwilila, Satana atundaga kumupepa anga ngano. 32 Tondo nakusegede buno bukatizio bwobe tabukokoke; nu uwe, gawasubye, nti walindia mibuto zobe.” 33 Petro amubwide bunee: “Mukota, nili kayikayika kwenda gamozi nobe, nu ku kikando nu ku lukuo.” 34 Nu Yesu amwakwide bunee: “Petro, nkukubula buno, lelo, gabe nkoko tazibika, wantune mambizi masatu buno ntunizi.”
Bikulo, Nsago nu Mwene
35 Ababwide lingo bunee: “Nkungu zinamusingaga kuteli bikulo aba nsago, aba bisalapata, ndi mwidile kena?” Bakwide bunee: “Ta kampa.” 36 Nu ababwide bunee: “Tondo kano kaluma, nyene bikulo abitole, nu wozo uli na nsago azitole lingo, nu wozo uteli na mwene wampa nti akunzie nsulu zage nu nti akunze mwene. 37 Kubuno nkumubula buno kitondo kikino kyasanzilwe kyatunganana kuzindilila mundi: ‘Nu We aganzilwe gamozi na bagi.’ Kubuno binsania byane byatunganana kuzindilila.” b 38 Beigisibwa bage babwide bunee: “Mukota, lola, gano geli myene ibili,” nu abakwide bunee: “zezo zakuka.”
Yesu Akusega ku Mwiduko wa Mizeituni
39 Yesu atukile, nu endile ku mwiduko wa mizeituni anga bwabezaga agomia kukita, nu beigisibwa bage bamuyangile. 40 Gaabasile ku kikyo kiziki, ababwide bunee: “Segazi buno munavwa kwingila mu malindiko.” 41 Kusila, eitikizye mubo anga bulazi bwa ganiswa ikozi, nu gaakomine mazu, asegile. 42 Atendile bunee: “Tatane, ndi watunda, ntikizye kituma kikino, tondo ta kusombola kwane ukukitwa, tondo kusombola kwobe.” 43 Nu mwanzelo wa mwigulu amubaside, nu amulindizie. 44 Nu We abede na kabebe kanene nunse, u buno itide nunse kusega bubibu; nu kilungu kyage kyabezaga kise kyasusania anga matogi ma mikila kyakolokaga gansi.
45 Gaasilile kusega, asubizie kwabezaga beigisibwa bage nu abasangile beiyombeka ku kitondo kya kabebe. 46 Nu ababuzizie bunee: “Kubuni kumwiyombeka? Yukazi nu segazi, buno munavwa kwingila mu malindiko.”
Kutakwa kwa Yesu ku Musalaba
47 Mu nkungu zabezaga akutenda, lola, musanganano munene wabasile, nu wozo wamanagwa Yuda, umozi wa ku babo ikumi nu babili, agusondelezagia, nu avule bwigi na Yesu buno amumume. 48 Tondo Yesu amubwide bunee: “Yuda, ndi ukukasana Mwana wa Muntu ku kumumuma?” 49 Babo babezaga gamozi na Yesu, gabamonine ku bibyo byabasa, babwide bunee: “Mukota, ndi tubabange na mwene?” 50 Nu umozi wa kubeli abangile mukiti wa Sankoga munene, nu amusesile kutuzi kwa seidume. 51 Tondo Yesu abwide bunee: “Sigazi, bubo bwakuka.” Nu eitubizie ku kutuzi kwa wozo muntu nu amwonezie.
52 Yesu atendile lingo ku bakota ba basankoga, ku bakota ba balangi ba numba za kukumbamina, nu ku bakulu bavwaga kweli bunee: “Buni bumwavwa anga bakuvwa ku mwibi na myene nu nkoma? 53 Nabezaga gamozi n'inyuwe bindi binsania mu numba za kukumbamina nu tamwagelekile kunkata; tondo zeno u nkungu zeinyu nu magala ma kapilo.”
Petro Akutuna Yesu
54 Bakatile Yesu nu bendile nage, nu bamusondelezizie ku numba za Sankoga munene. Petro abayangaga bulazibulazi. 55 Nu gabakongezie keiya munkatini mwa mulungu, nu kwikala gansi, Petro eikede gansi munkatini mwabo. 56 Nu mukiti umozi mukikulu amonine ku Petro eikala bwigi na keiya, amulolile kisozi nunse nu amubwide bunee: “Wono muntu nu we abezaga gamozi nage.” 57 Tondo Petro atunine, nu atendile bunee: “Uwe mukikulu, nsizi wozo!” 58 Kumbusa kakeke, ungo muntu amumonineko, nu abwide bunee: “Uwe nu uwe uli umozi wa ku babo!” Nu Petro akwide buno, uwe wamulume, nsili wa mubo. 59 Nu gatingile bwigi na nkungu emozi, ungo muntu alindikile nunse kutenda bunee: “Lebelebe wono muntu abezagile nu we gamozi nage, kubuno eli muGalilaya.” 60 Tondo Petro akwide bunee: “Uwe wamulume, nsizi buukutenda.” Nu kazanga kongo, gaabezaga eki atenda, mulume wa nkoko wabikile. 61 Mukota akebetukile kumbusa kwabezaga Petro, nu Petro akengede kitondo kyamubwide Mukota bunee: “Lelo, gabe nkoko tazibika, wantune mambizi masatu.” 62 Nu abasile kumbuga, nu alilile na kabebe nunse.
Yesu Akulingwa nu Kulibulwa
63 Babo bantu bakatile Yesu, bamwililikile nu bamulibwide. 64 Bamuzibile ku meiso nu bamubuzizie bunee: “Lengania! Nazi wakulibwide?” 65 Nu bamutendile lingo bingo bitondo byingi bya kumulinga.
Yesu Lwabusio lwa Lusu lwa Balongeki Banene
66 Gakede busi, musanganano wa bakulu ba baYuda nu basankoga banene nu basozi ba milembe, bakundamenne; nu bavule na Yesu ku lusu lwabo, nu babwide bunee: 67 “Tubule ndi uwe uli Kristo?” Tondo Yesu abakwide bunee: “Ganinamubulabo, tamunankatizia, 68 nu ndi namubuzia, tamunannakula. 69 Tondo, kutukila kano kaluma, Mwana wa muntu eikale ku kuboko kwa seidume kwa magala ma Kalaga.” 70 Bansania bamubuzizie bunee: “Umpanga, ndi uli Mwana wa Kalaga?” Nu abakwide bunee: “Anga bumwatenda, nili We.” 71 Nu babwide bunee: “Bulongeki bukizi lingo butukutunda? Kubuno twiyungwila tubenyene bwakutenda bubo na kanua kage!”