Lukaso lwa Mukikulu Musigala
21
1 Nu Yesu alambwide meiso, nu amonine ku bagumi bakubika nkaso zabo mu sanduku z'isuku. 2 Nu amonine lingo ku musigala umozi muzambi wabezaga akubika binkulumba bya sengi ibili muzo. 3 Nu atendile bunee: “Lebelebe nkumubula bunee: ‘Wono musigala muzambi abikile byingi kutinga bango bansania: 4 kubuno babano bansania batikizye nkindi nkeke ku bikulo byabo byingi kubika mu sanduku z'isuku; tondo we, ku meiyanino mage, abikile binsania byabezaga nabyo.’” Yesu Akusambala Kusambulwa kwa Numba za Kukumbamina
5 Anga bwatendaga bantu bamozi musagu wa numba za kukumbamina, buno zalebibwa na makozi masoga nu nkaso ku Kalaga, Yesu abwide bunee: 6 “Mu bindi byavwe ku bibino bimukumona kubyo, takwasigale ikozi gantata ga lingo, litakendulwa.”
Yesu Akutenda na Beigisibwa Bage ga Mwiduko wa Mizeituni
7 Bamubuzizie bunee: “Musozi, bitondo bibino, nkungu nkizi zibikabasa? Nu ku kalolesio kakizi kakamenyininwa buno bitondo bibino bise bwigi kubasa?”
8 Yesu akwide bunee: “Idangazi buno tamwengelelwe. Kubuno beingi bakavwa mu izina lyane nu bakatenda bunee: ‘Nne u We,’ nu ‘Nkungu zise bwigi;’ tamubayange. 9 Nkungu zimukungwa ku misagu za bita nu za mulubu, tamukue boba. Kubuno, bitondo bibino byatunganana tanga kulinga kubasa lwabusio, tondo nti kuzinda kwa kisi takwika.”
10 Kumbusa, abatendile bunee: “Kilongo kimozi kikalwana bita na kingo kilongo, nu bukota bumozi bukalwana bita na bungo bukota; 11 nu kukaba tuningini tunene twa kisi nu nsambo nnene nu munganda ku biziki na biziki; nu kukaba miganogano zikeitia boba nunse nu tulolesio tunene kutuka kwigulu.
12 Tondo lwabusio lwa bitondo bibino binsania, bakamukata nu kumusungia; nu bakamukasana ku numba za musanganano, nu bakamubika mu kikando nu bakamubasia ku bakota banene nu ku bangati ku kabamba k'izina lyane. 13 Nu bubo bukamubasila buno mube balongeki kubeli. 14 Umpanga, kengelazi mu mitima zeinyu buno tamube tanga na mpipi za buni bumwakule. 15 Kubuno nnenyene namukase bitondo nu menge aba nu basombi beinyu tabavwame kubwakula aba kubwakania. 16 Mukakasanwa aba nu na babuti beinyu, na mibuto zeinyu, na ba bikanga byeinyu nu na bilemba byeinyu, nu bakeitia bamozi mu muli. 17 Nu mukasombwa na bantu bansania ku kabamba k'izina lyane. 18 Tondo aba luzwili lumozi lw'itoe lyeinyu talukazimina. 19 Ku nkiki zeinyu mukonia tulamo tweinyu.
Yesu Akusambala Musagu wa Kusambulwa kwa Yerusalema
20 Nkungu zimukamona Yerusalema atimbwa na mayombo, menyazi buno kusambulwa kwage kuse bwigi. 21 Ububo babo bakaba mu Yudea batine ku miduko, nu babo bakasangwa munkatini mwa Yerusalema batukemo, nu babo bakasangwa mu masoa, tabeingile lingo mu mwino. 22 Kubuno bindi bibyo bikaba bindi bya musubo buno binsania byasanzilwe bizindilile. 23 Kabebe ku bakikulu bakaba beimisu nu ku babo bakamomia mu bindi bibyo! Kubuno kukaba kabebe kanene mu kisi, nu bongoa ku bantu babano. 24 Nu bo bakeitwa na mwene mukali, nu bakekwa bakandwa munkatini mwa baBilongo, nu Yerusalema akanyantwa na baBilongo aaba nu nkungu za baBilongo zazindilila.
Kuvwa kwa Mwana wa Muntu
25 Kukaba tukengelezio ku kisongo kya busi, ku mwezi nu ku nkeninkeni. Nu ga kisi gakaba boba bunene ku baBilongo batakamenya bwa kukita ku kubila kwa kitatenge nu bimpumi byakyo. 26 Bantu bakakua boba bukali nu kwenda kalengwe mu kulindila bitondo byabase mu kisi; kubuno magala m'igulu makatengibwatengibwa. 27 Nu mu nkungu zezo bakamona Mwana wa Muntu akuvwa mu kimpa gamozi na magala nunse nu lutanuno lunene. 28 Nu gakalinga kubasa bitondo bibino, emanukazi nu sakikazi matoe meinyu, kubuno bukuluzi bweinyu buseli bwigi.”
Musumo wa Muti wa Mutini
29 Nu Yesu abeisile musumo wono bunee: “Lolazi ku muti wa mutini nu ku miti insania. 30 Nkungu zimwamone ku nsamba zazo zise zatempula, nti mwamenya buno nkungu za nzogo zise bwigi. 31 Ububo nu bo, gamukamona ku bitondo bibino byabasa, menyazi buno bukota bwa Kalaga buse bwigi. 32 Lebelebe nkumubula buno, kikino kibuti takyatinge aaba nu gakazindilila bitondo bibino binsania. 33 Igulu nu kisi bikatinga, tondo malagi mane tamakatinga nunse.
Mube Kayikayika
34 Idangazi mubenyene buno mitima zeinyu tazembuke na buliagundu nu kukatwa na maku, nu kwikutia na makengelo ma kalamo kakano, nu busi bubo bunavwa kumubasila kitangalabesi, 35 anga itega. Kubuno busi bubo bukabasila bantu bansania beli mu kisi kinsania. 36 Tondo kesiazi ntende segazi nkungu insania buno mube na magala ma kwibembukya na bitondo binsania byabase nu kwemana lwabusio lwa Mwana wa Muntu.”