Yesu Alenganizie Kugoa kwa Numba za Kukumbamina
24
1 Yesu atukile mu numba za kukumbamina, nu gaabezaga akwenda mu nzila, beigisibwa bage bavule kumulolesia numba insania za kukumbamina. 2 Tondo ababwide bunee: “Ndi tamukumona bibino binsania? Lebelebe nkumubula bunee: Takukasigala ikozi limozi gantata ga lingo, litakeigulwa.” Mbuzio Isatu ga Mwiduko wa Mizeituni
3 Nu geikede gantata ga mwiduko wa Mizeituni beigisibwa bage bamuvwilide bobenyene, bamubuzizie bunee: “Tubule, buni bukaba bitondo bibino? Nu kalolesio kakizi kakamonekako kukuvwa kwobe, nu kuzinda kwa nkiko?”
Yesu Akubula Beigisibwa Bage Bitondo bya Nkiko Zeno
ku Mwiduko wa Mizeituni
4 Yesu abakwide bunee: “Idangazi muntu ntamwengelele. 5 Kubuno beingi bakavwa mu izina lyane, bakatenda bunee: ‘Nne nili Kristo;’ nu bakengelela bantu beingi. 6 Mukungwa ku bita, nu misagu za bita; tamuzangezange; kubuno bitondo bibyo byatunganana kuvwa; tondo kuzinda nti takwika. 7 Kilongo kikalwana na kingo kilongo, nu bukota bukalwana na bungo bukota, kukaba nzala nkali nu tuningini ku lulenge na lulenge. 8 Tondo bibino binsania bili bya kulinga kwa mbabazio.
9 Bakamugabula buno mubabazibwe, nu bamwite: nu inyuwe mukasombwa na baBilongo bansania ku kabamba k'izina lyane. 10 Nu beingi bakakindwa bakasiga bukatizio nu bakagabulana, nu bakasombana. 11 Nu balengania beingi ba buza bakavwa, nu bakengelela beingi. 12 Nu ku kwitila kwa mibi lutundo lwa beingi lukatamba. 13 Tondo wozo wakinda aaba nu kuzinda, nti akonibwa. 14 Nu musagu musoga wa Bukota ukasambalwa ku bansania ba kisi kinsania, kuba bulongeki bwa baBilongo bansania; nu kuzinda nti kwabase.
Kabebe Kanene Kako Katendagwa na Mulengania Danieli
15 Umpanga gamukamona ku wozo ukumanwa lusombo lukuzikya, lulo lwatendagwa na mulengania Danieli, lwemana mu kiziki kyaswagibwa (wozo ukusomaga bubuno amenyininebo), a 16 babo beli mu Yudea batine ku mwiduko: 17 nu wozo ukasangwa gantata ga numba ntagele kutikya bili mu numba zage: 18 nu wozo ukasangwa mu isoa ntasubanie kutola nsulu zage. 19 Kabebe kanene ku beimisu nu bakumomia mu busi bubo! 20 Nu segazi buno, kutina kweinyu takube mu bindi bya mpego, aba mu Busi bwa Kumunwa, u Sabato, 21 kubuno kukavwa mbabazio nnene, zitabezaga lingo kutukila ku kulinga kwa kisi aaba nu kano kaluma, aba tazikaba lingo. 22 Nu songo bindi bibyo tabyakegizibwe takunonine muntu wampa; tondo ku kabamba ka basombolwa ukinsa bindi bibyo byakegizibwe.
23 Ndi muntu amubula bunee: ‘Lolazi, Kristo eli gano,’ aba ‘kuko;’ tamumukatizie. 24 Kubuno kukavwa bango baKristo ba buza, nu balengania ba buza, nu bakakita migeleko minene nu miganogano, nu bakengelela bantu, nu bakageleka kwengelela aba nu basombolwa, tondo tabukakulungana. 25 Ungwililazi, nasila kumutonda.
26 Ndi bamubula bunee: ‘Ungwililazi, eli ku lubanda;’ tamwendeko; aba bunee: ‘Eli mu numba nkeke;’ tamukatizie.
Kusubya Kwa Yesu kwa Mabili
27 Anga bukukelimaga mukenzi wa nkuba kwigulu kutuka kuntata aba nu kunsi ububo bukaba kuvwa kwa Mwana wa Bantu. 28 Gago geli kitumba, nti u gakundamanine ndiu.
29 Nu kazanga kongo gakasila lubabazio lwa bindi bibyo kisongo kya busi kikaba kapilo, nu mwezi tagukasana, nu nkeninkeni zikakoloka mwigulu, nu magala ma meigulu makatengatenga. 30 Nu kakengelezio ka Mwana wa Bantu kakamonekako mwigulu: nu baBilongo bansania ba kisi bakalila, nu bakamona ku Mwana wa Bantu akavwa mu bimpa by'igulu mu magala mage nu lutanuno lwage lunene. 31 Nu akasinga banzelo bage, n'iyuki inene lya monze, nu bakakundamania basombolwa bage ku ndenge inazi, kutukila kuzinda kwigulu aba nu kuko kungo.
Musumo wa Muti wa Mutini
32 Mukengele musumo wa muti wa mutini: gakutitulaga nsamba, nu nti zise zalinga kwasa ingo nsamba, nti mwamenya buno nkungu za nzogo zise bwigi; 33 bubo nu inyuwe lingo, gamukamona ku bubuno bunsania, mumenye buno, eseli bwigi, nu nti es'emana ku lwibi. 34 Lebelebe nkumubula bunee: ‘Bantu ba kibuti kikyo tabakatinga, aaba nu gakasila bubo bunsania. 35 Igulu nu kisi bikatinga, tondo malagi mane tamakatinga nunse.’
36 Tondo ku busi bubo aba nkungu zezo, takuli muntu umozi wizi aba banzelo ba mwigulu tabeizi, aba Mwana nteizi, umpanga Isi wenyene u wizi. 37 Nu anga bwabezaga mu bindi bya Noa, u bukaba kuvwa kwa Mwana wa Bantu.
38 Kubuno mu bindi bibyo lwabusio lwa mwiyalo, bantu baliaga nu banuaga, basongaga nu basongagwa, aaba nu busi bubo bwingide Noa mu bwato, 39 nu bo tabamenyine bwampa aaba nu mwiyalo munene wavule nu kwita bansania. U bubo bukaba gakavwa Mwana wa Bantu. 40 Mu busi bubo, bamulume babili bakaba mu isoa; umozi akatolwa, nu ungo akasigala: 41 bakikulu babili bakasangwa bakututa mu kilunga, umozi akatolwa, nu ungo akasigala. 42 Kesiazi ntende: kubuno tamwizi busi bwavwe Mukota weinyu. 43 Tondo menyazi buno: songo nyene numba amenyaga nkungu zavwe mwibi, anakesezie ntende, nu ntanazigile numba zage zangulwe. 44 Bubo nu inyuwe mube kayikayika; kubuno Mwana wa Bantu akavwa mu nkungu zimutakukengela.
45 Nazi mukiti mukatizia uli na menge, ndi mukota wage amubikile mwangati wa numba zage, buno abeganie idia mu nkungu nsoga? 46 Mbogimbogi ku wozo mukiti, mu kusubania kwa mukota wage akamusanga akukita bubo. 47 Lebelebe, nkumubula buno akamubika mwangati wa byage binsania. 48 Tondo ndi wozo mukiti eli mubi anakengela mu mutima wage buno, mukota wane eizizia, 49 nu kulinga kulibula banyage, nu kulia nu kunua na banuzi. 50 Mukota wa wozo mukiti akavwa mu busi bwatakukengela, nu mu nkungu zatakumenya, 51 nu we akamuketula byindi bibili, nu kumubika gamozi na bengelezi: ububo kukaba idilo nu kubuga meinyo.”