Yesu Akubula Beigisibwa Bage nu Bantu Misako za baFarisayo
23
1 Yesu abwide musanganano nu beigisibwa bage bunee: 2 “Basozi ba mulembe nu baFarisayo bakwikalaga mu kisumbi kya Musa. 3 Kitazi bunsania bubakumubula, tondo tamukite anga bubakukita. Kubuno bakutenda nu tabakukita. 4 Lebelebe, bakukanda mizigo mizitu zitanavwamwa kwekwa, nu bakuzibika ga bituli bya bango bantu; tondo tabakutunda kuzyeka aba na munwe wabo umozi. 5 Bakukita misako zabo insania buno bamenywe na bantu. Bakukita masanzo mabo mabe manene nu bakutanuna mipimbo za nsulu zabo. 6 Nu bakutunda kiziki kitangi mu bisagulo, nu bisumbi bitangi mu numba za musanganano, 7 nu bakutunda kusekelwa mu biziki bya masoko, nu kumanwa na bantu buno, Musozi. 8 Tondo inyuwe tamumanwe buno, ‘Musozi:’ kubuno muli na musozi umozi tugu, nu inyuwe bansania muli mibuto. 9 Nu tamumane muntu ga kisi buno soinyuwe, kubuno muli na Soinyuwe umozi tugu uli mwigulu. 10 Nu tamumanwe buno, ‘Basondelezia;’ kubuno muli na Musondelezia weinyu umozi tugu, u Kristo. 11 Tondo wozo uli munene kumuli abe mukiti weinyu. 12 Nu unsania wisakika nti akasigulizibwa, nu wisigulizia nti akasakikwa. Yesu Akutenda ku baFarisayo
13 Kabebe kanene kumuli Basozi ba mulembe nu Bafarisayo, bengelezi! Kubuno mukukandila bantu Bukota bwa meigulu. Inyuwe tamukwingila mubo, nu tamukuziga bantu kwiyingila mubo.
14 Kabebe kanene kumuli Basozi ba mulembe nu baFarisayo, bengelezi! Kubuno mukutukula numba za misigala, nu kwengelela bantu gamukusega masego malazi. Ku bubo mukasungibwa nunse.
15 Kabebe kanene kumuli, Basozi ba mulembe nu baFarisayo, bengelezi! Mukutimba kitatenge nu kisi kinsania kulonda muntu umozi buno abe mwigisibwa weinyu; kungwa akatizia meigisia meinyu nti amutinga ku bubi mambizi mabili nu abe mwana wa kiziba kya keiya kumutinga.
16 Kabebe kanene kumuli, basondelezia byuku, mukubulaga bunee: ‘Ndi muntu alumbila ku numba nnene za kukumbamina nti takena: tondo ndi alumbila ku olo za mu numba nnene za kukumbamina nti akandwe.’ 17 Inyuwe byuku nu bikongolo: kikizi kyatinga kinene, olo, aba numba nnene za kukumbamina u zaswagizie zezo olo? 18 Mukubulaga lingo bunee: ‘Ndi muntu alumbila ku kasenga nti takena;’ tondo ‘ndi alumbila ku kisansa kya kasenga, nti akandwe.’ 19 Inyuwe byuku: kikizi kyatinga kinene, kisansa aba kasenga u kaswagizie kikyo kisansa? 20 Wozo ukulumbila ku kasenga nti akulumbila kuko nu binsania bili ga kako kasenga. 21 Nu we ukulumbila ku numba za kukumbamina, nti akuzilumbila, nu ku wozo ukwikalaga muzo. 22 Nu wozo ukulumbila mwigulu akulumbila ku kisumbi kya Kalaga nu akulumbila ku wozo wikile gakyo.
23 Kabebe kanene kumuli, Basozi ba Mulembe nu baFarisayo, bengelezi! Mukukasana kyindi ky'ikumi kya nsyogo, nu kinzani, nu lusolo, nu mukusiga misako minene za mulembe, u bwisanana, nu kyombo, nu bukatizio; tondo zezo u zatananina kukitwa, nu zezo zengo tamuzisige. 24 Inyuwe basondelezia byuku, mukuswila mendu nu mukumena nzogu!
25 Kabebe kanene kumuli, basozi ba mulembe nu baFarisayo, bengelezi! Kubuno mukusuga kituma nu lupepe gantata, tondo munda mwiyala na nsese, nu bwengelezi. 26 Uwe muFarisayo kyuku, linga tanga kusuga munda mwa kituma nu lupepe, ububo gantata nti genga.
27 Kabebe kanene kumuli, basozi ba mulembe nu baFarisayo, bengelezi! Kubuno mwalingimana na nsinda zasingulwa na mpemba, gantata zikumoneka nsoga, tondo munda mwiyala makwa ma bantu, nu nsese insania. 28 Ububo inyuwe mukumonekako na bantu buno muli beisanana, tondo munda mweinyu mwiyala na bwengelezi, nu mibi.
29 Kabebe kanene kumuli, basozi ba mulembe nu baFarisayo, bengelezi! Kubuno mukobaka nsinda za balengania, nu mukulebya nsinda za beisanana, 30 nu mukutenda bunee: ‘Songo twabezaga mu nkungu za batateiswe, songo tatunagomezie nabo ku mikila za balengania.’ 31 Mukwidongekela buno muli bana ba babo beitaga balengania. 32 Izaziazi kilindiko kya basoinyuwe. 33 Inyuwe nzoka, kikanga kya mpoma, buni bumukatina lusungio lwa kiziba kya keiya? 34 Ububo ungwililazi; namusingila balengania, nu bantu ba menge, nu basozi: mukwita bamozi nu mukutaka bango ku misalaba; nu bango bamozi mukubalibula mu numba za misanganano, nu mukubasungia mu mwino na mwino: 35 Ububo mikila zeisanana zikumukubukila mu kisi, kutukila mikila za Abeli wozo wisanana aaba nu ku mikila za Zekaria, mwana wa Barakia, u mwitile gasamba kasenga nu numba zaswagibwa. 36 Lebelebe nkumubula bunee: ‘Bitondo binsania bikavwa ku kikino kibuti!’
Yesu Akulilila Yerusalema
37 Yerusalema, Yerusalema, ukwitaga balengania, nu ukulibulaga banakusingide makozi! Mambizi manga natundile kukundamania bana bobe, anga bukugubatilaga nkoko bana bazo mu byupi, tondo ntwazigile! 38 Mu numba zeinyu mukaba mulali. 39 Kubuno nkumubula buno, tamukammonako lingo, kutukila kano kaluma aaba nu gamukaba muse mwatenda bunee: ‘Mbogimbogi ku wozo ukuvwa mu izina lya Mukota.’” a