Musumo wa Balimi Babi
12
1 Yesu alingile kubeisa musumo: “Muntu umozi ayikile isoa lya mizabibu; alitimbile na mukolo, ombile itengu lya kansango ka kukambutula biguma bya mizabibu nu obakile numba zasakama nu endile mu kingo kisi. 2 Mu nkungu za matubulo, asingile mukiti ku balimi buno embe anamona ku biguma ku balimi b'isoa. 3 Bamukatile, bamulibwide nu bamusubizie nteli na kampa. 4 Asingile lingo ungo mukiti; bamulibwide ku itoe nu bamubabazizie nunse. 5 Asingile wa basatu, nu, bamwitile; nu bango beingi babalibwide: nu beitile bango. 6 Abezaga na ungo umozi tugu mwana wage watunda. Amusingile kubeli, atendile bunee: ‘Embe banaba na lwanzo ku mwana wane.’ 7 Tondo babo balimi batendenne bwabobwabo, bunee: ‘Wozo u mupieni wage. Vwazi, tumwitazi, nu tupiene bupieni bwage!’ 8 Nu bamukatile, bamwitile nu bamwisile kumbuga kw'isoa. 9 Nu buni bukakita wozo mukota w'isoa lya biguma? Akavwa, nu akazikya balimi nu akakasa bango lilyo isoa. 10 Ndi tamwasomine ku masanzo mamo?
‘Ikozi lyasombilwe na bobaki, u lyabede
ikozi inene lya kapindapinda.
11 Bubo bwatukile ku Mukota, nu bo bukutuganiagania!’” a
12 Balondile bubamukata, tondo bakule musanganano boba; kubuno bamenyine buno Yesu eisile musumo wono ku kabamba kabo nu bamusigile nu bendile.
Lubuzio ku Kitondo kya Kuliga Kodi
13 Basingile baFarisayo gamozi na baHerode kuli Yesu buno, bamutegele ku byakutenda. 14 Nu bavule kumutenda bunee: “Musozi, twizi buno uli wa bulili; nu ntukukua muntu wampa boba, kubuno ntukulola ku kilungi kya muntu, nu ukwigisia meigisia ma Kalaga mu bulili. Ndi bwakulungana ku mulembe kuliga kodi ku Kaisari aba kutaliga?” 15 Yesu amenyine bwengelezi bwabo; abakwide bunee: “Kubuni kumukundindika? Muvwe na kinkulumba kya feza z'idigo b buno nikimoneko.” 16 Bamuvwilide na kimozi, nu Yesu ababuzizie bunee: “Kikino kisusania nu mamano masanzo bili bya nazi?” Bamwakwide bunee: “Bili bya Kaisari.” c 17 Nu abatendile bunee: “Kasazi Kaisari bya Kaisari, nu ku Kalaga bya Kalaga.” Nu bangamine nage nunse.
Lubuzio ku Kitondo ky'Iyukilo lya Bakuzi
18 BaSadukayo bamuvwilide. (U babo bakutendaga buno takuli iyukilo lya bakuzi.) Bamubuzizie bunee: 19 “Musozi, Musa atusanzide bunee: ‘Ndi mubuto wa muntu, wamulume akua, nu asiga mukikulu nu ntasiga bana, nti mubuto wage eiyana wozo mukikulu buno abutile mubuto wage wakule bana.’ 20 Nu, kwabezaga mibuto mutubakamo ba nda emozi. Mutangi asongile mukikulu nu akule geteli kusiga bana. 21 Wa babili amwiyanine, nu akule geteli kusiga bana. Nu wozo wa basatu bubo nu we. 22 Nu babo bansania mutubakamo, takuli umozi wasigile bana. Kusila kwa babo bansania, nu we mukikulu akule. 23 Mu iyukilo, wozo mukikulu akaba wa nazi? Kubuno babo mutubakamo bamusongile!” 24 Yesu abakwide bunee: “Mwatingilwe, kubuno tamwizi masanzo, aba magala ma Kalaga? 25 Kubuno, mu iyukilo lya bakuzi, bamulume tabakasonga, aba bakikulu tabakasongwa, tondo babe anga banzelo ba Mwigulu. 26 Ku kitondo ky'iyukilo lya bakuzi, ndi tamwasomine mu mukanda wa Musa ku kitondo kya kiziki kyaguluminaga keiya mu muti, bwamutendile Kalaga bunee: ‘Nne nili Kalaga wa Abrahamu, Kalaga wa Isaka nu Kalaga wa Yakobo.’ 27 Kalaga nteli Kalaga wa bakuzi, tondo wa balami. Beinyuwe mukwibaga nunse.”
Ikakizio Lili Inene
28 Umozi wa ku basanzi ba milembe abasile, ongule kubakutenda, nu amenyine buno Yesu akwide baSadukayo busoga, asigelede nu amubuzizie bunee: “Kukakizia kukizi kutangi?”
29 Yesu akwide bunee: “Lola ikakizio lili itangi ‘Ungwilila, Israeli! Mukota Kalaga weitu eli Mukota umozi tugu. 30 Nu tunda Mukota Kalaga wobe na mutima wobe unsania, na makengelo mobe mansania nu na magala mobe mansania.’ d 31 Lola ikakizio lya mabili: ‘Tunda munyobe anga buwitunda uwenyene.’ e Takuli kungo kukakizia kwatinga mamo.” 32 Musanzi wa milembe amutendile bunee: “Bulili, Musozi! Watenda buligo: buno Kalaga eli umozi tugu, nu takuli ungo tugu We. 33 Nu nti wamutunda mu mutima wobe unsania, mu makengelo mobe mansania, mu menge mobe mansania, nu mu magala mobe mansania; nu tunda munyobe anga buwitunda uwenyene bwatinga kayulo kakugisibwa nu bisansa binsania.” 34 Gamonine Yesu buno atendile na menge; amutendile bunee: “Ntuli bulazi na Bukota bwa Kalaga.” Nu takuli muntu wagelekile kumubuzia lingo.
Lubuzio ku Kabamba ka Mwana wa Davidi
35 Yesu atendile geigisagia mu numba za kukumbamina bunee: “Kubuni basanzi ba milembe bakutenda buno Kristo eli mwana wa Davidi? 36 Davidi wenyene atendile mu magala ma Muuza Wasililila bunee:
‘Mukota atendile ku Mukota wane:
Ikala ku kuboko kwane kwa seidume
Aaba nu ganangate beiti bobe.’ f
37 Davidi wenyene amumanine ‘Mukota’: buni bunavwama Kristo kuba mwana wage?”
Yesu Atendile Bantu Lukita lwa Basozi ba Milembe
Nu bantu beingi ba wozo musanganano munene bamungwilide na mbogimbogi. 38 Nu meigisia mage abatendile bunee: “Idangazi na basanzi nu babo bakwelama kuvwala nsulu ndazi nu kusambizibwa mu masoko; 39 nu bakulonda kwikala ga bisumbi bitangi mu numba za misanganano nu biziki bitangi mu bisagulo. 40 Bakunyaga numba za misigala, nu ku bwengelezi bakusega masego nkungu ndazi. Bakasungibwa lusungio lunene nunse!”
Mutebe wa Musigala Muzambi
41 Yesu eikede bwigi na sanduku za mitebe alolile musanganano bugukwisa feza muzo. Bagumi beingi beisile ningi. 42 Nu kwavule musigala muzambi nu eisile binkulumba bya sengi ibili, anga likuta limozi. 43 Nu Yesu amanine beigisibwa bage abatendile bunee: “Lebelebe nkumubula buno: wono musigala abikile ningi kutinga bansania babikile bikulo mu sanduku zeno. 44 Kubuno babikile bya bugumi bwabo; tondo we ku buzambi bwage eisile binsania byabezaga nabyo, aba bikulo byage binsania byabezaga nabyo mu kalamo kage.”