Yesu eingila mu Yerusalema
11
1 Gababasile bwigi na Yerusalema, nu kubasa bwigi na Betefage nu Betania, ku mwiduko wa Mizeituni, Yesu asingile beigisibwa bage babili: 2 abatendile bunee: “Endazi ku mwino guli lwabusio lweinyu, kazanga kongo gamwabase mugo, mwamone ku kyana kya mpunda kyaswikwa, muntu wampa ntebakama gantata gakyo, nti mwakisula nu nti mwavwa nakyo. 3 Ndi muntu amubuzia bunee: ‘Kimukukitila bubo?’ nti mwamwakula bunee: ‘Mukota akwiyanina kyo.’ Nu kazanga kongo akisinge kuno.” 4 Beigisibwa bendile bamonine ku kikyo kyana kya mpunda, kyaswikwa ga mwingilo, kumbuga kwa numba. Nu bakisulile. 5 Bantu bamozi babezaga kuko babatendile bunee: “Kikizi kimukukita? Kubuni mukusula zezo mpunda?” 6 Babakwide anga bwabatendile Yesu, nu babasigile buno bende. 7 Bavule na kikyo kyana kya mpunda ku Yesu, babikile nsulu zabo gantata gakyo, nu Yesu eikede gantata gakyo. 8 Bantu beingi banzile nsulu zabo mu nzila, nu bango banzile ntabi za miti zibasesaga mu masoa. 9 Babo bendaga lwabusio nu babo bayangaga Yesu balalukile n'iyuki bunee: “Hosana! Akaswe mponga wozo ukuvwa mu izina lya Mukota! 10 Bukaswe mponga bukota bukuvwa, ku bwangato bwa tateiswe Davidi! Hosana mu meigulu!” a 11 Yesu eingide ku Yerusalema mu numba za kukumbamina. Nu gaasilile kulola binsania ku ndenge insania, ku kitondo kya buno zabezaga nkungu z'igolo, endile ku Betania gamozi n'ikumi nu babili.
Yesu Akuswilila Muti wa Mutini
12 Gabede nindunindu, gabatukile mu Betania, Yesu akule na nzala. 13 Amonine ku muti wa mutini bulazi guli na nsamba, endile kulola buno embe anamona biguma kugo; nu gaabasile gago, ntamonine kampa tugu nsamba, kubuno tazabezaga nkungu za kukolama biguma. 14 Nu agutendile bunee: “Kutukila lelo aaba nu ku nkiko zitanakuzinda, muntu ntakalia ku biguma byobe!” Nu beigisibwa bage bongule ku bubo.
Yesu mu Numba za Kukumbamina
15 Gababasile ku Yerusalema, Yesu eingide mu numba za kukumbamina, nu alingile kwimbya babo bakunzagia nu bakunzaga mu numba zezo; eidukizie meza ma babo bagalukagia bikulo nu bisumbi bya babo bakunzagia nkulimba, 16 nu ntazigile muntu kuvwa na kena mu numba za kukumbamina. 17 Nu abeigisizie bunee: “Ndi tabwasanzilwe bunee: ‘Numba zane zikamanwa numba za kukumbamina ku baBilongo bansania? Tondo inyuwe, mwazigalukya anga numba za banyagi!’” b
18 Basankoga banene nu basanzi gabongule ku bubo balondile bubamwita; kubuno bamukule boba, kubuno musanganano unsania wangamine na meigisia mage.
19 Gedile busi, Yesu atukile mu mwino.
20 Gababezaga bese batinga nindunindu; beigisibwa bamonine ku wozo muti wa mutini: woma kutukila ku mizi aaba nu ku ntabi. 21 Petro akengede bubo bwabede nu atendile ku Yesu: “Musozi, lola wozo muti wa mutini u waswilide woma.” 22 Yesu akwide bunee: “Mube na bukatizio ku Kalaga, 23 lebelebe nkumubula bunee: ‘Ndi unsania ukatendaga mwiduko wono bunee: “Tutumuka nu wiyise mu kitatenge.” Nu ndi ntakwakania ku mutima wage tondo akatizia buno bubo bwatendaga bwakitwe, nu amone ku bubo bwatendaga. 24 Ku kabamba kakano, nkumubula bunee: “Binsania bimukubuzia mu masego, mukatizie buno mwabimone, nubyo byabe byeinyu. 25 Nu gamukwemana ku masego, sigililanazi, ndi uli na kitondo ku munyobe, bubo Soinyuwe uli mwigulu amusigilile misako za bwagi bweinyu. 26 (Tondo ndi tamukusigililana, Soinyuwe uli mwigulu ntamusigilile misako za bwagi bweinyu.)”’”
Bwangato bwa Yesu Bukutuka Kuni?
27 Babasile lingo ku Yerusalema, nu nkungu zatabangaga Yesu mu numba za kukumbamina, basankoga banene nu basozi ba milembe nu bakulu bamuvwilide. 28 Nu bamutendile bunee: “Ku bwangato bukizi buukukitila ku bubuno? Nu nazi wakukasile bwangato bwa kukita bitondo bibino?” 29 Yesu abakwide bunee: “Nkumubuzia lubuzio lumozi: ndi mwanakulalo, nti namubula nu nne bwangato bunkukitila ku bubo. 30 Lututiko lwa Yoana lwatukile Mwigulu aba ku bantu? Nnakulazi.” 31 Tondo babuzanizie bwabobwabo batendile bunee: “Ndi twakula bunee: ‘lwatukile kwigulu,’ nti atubuzie bunee: ‘Umpanga kubuni tamwamukatizizie?’ 32 Nu ndi twakula bunee: ‘Ku bantu...’ (Bakule bantu boba, kubuno bansania bakukatizia buno Yoana eli mulengania.)” 33 Nu bakwide Yesu bunee: “Tatwizi.” Nu Yesu abatendile bunee: “Nu nne lingo, nsikumubula ku bwangato bukizi bunkukitila ku bubuno.”