Yesu nu Zakayo
19
1 Nu geingide Yesu mu Yeriko, atingile mu mwino. 2 Nu lola, kwabezaga muntu umozi mugumi, wamanagwa Zakayo, mukota wa basanzi ba kuligia kodi, 3 nu alondaga kumona ku Yesu buno eli nazi; tondo ntavwamine kumumonako, kubuno kwabezaga musanganano munene wa bantu, nu we abezaga muntu mwigi. 4 Ububo eitumine lubilo lwabusio, nu abakamine ku muti wa mukuyu buno amumoneko kubuno gago u gaatunganenne kutinga. 5 Nu gabasile Yesu gago, agalamine kwigulu nu amumonineko, nu amutendile bunee: “Zakayo, sasia kugela, kubuno natunganana kwikala mu numba zobe lelo.” 6 Nu Zakayo asasizie kugela, nu amusekede na mbogimbogi.
7 Nu gabamonine ku bubo, bakitile manungunungu nu kutenda bunee: “Enda kwikala kwa muntu wa bwagi.” 8 Tondo Zakayo emenne nu atendile ku Mukota bunee: “Ungwilila, Mukota. Nakase bazambi kibe kya bikulo byane nu ndi natolile kintu kya muntu ku bwengelezi, nti namusubiziekyo mambizi manazi.”
9 Yesu amutendile bunee: “Lelo, lonio lwabasa mu numba zeno, kubuno wono nu we eli mwana wa Abrahamu. 10 Kubuno Mwana wa Muntu avule kulonda nu konia wozo waziminne.”
Musumo wa Makuta Ikumi
11 Nu bo gababezaga bakumungwilila, Yesu abeisile lingo musumo kubuno abezaga bwigi na ku Yerusalema, nu bakengelaga buno, bukota bwa Kalaga bwasasie kumonekako. 12 Ububo umpanga abatendile bunee: “Muntu umozi munene endile ku kisi kya bulazi buno akaswe bukota bwage, nu kusubya lingo. 13 Nu amanine bakambi bage ikumi; nu abakasile bibombo ikumi bya feza, a nu abatendile bunee: ‘Kunziazi na bibyo bikulo, aaba nu ganikasubya.’ 14 Tondo bantu ba kisi kyage bamusombaga nu basingile migenzi kumbusa kwage kumutenda bunee: ‘Tatukuziga muntu wono kuba mukota weitu.’
15 Nu gaasubizie, eseli na bukota bwage, akakizizie bunee: ‘Bamane babo bakiti bakasile bikulo buno amenye mutali wamonine nawe nawe.’ 16 Mutangi avule nu abwide bunee: ‘Mukota, bikulo byobe byamonine mutali wa lingo ikumi.’ 17 Nu amubwide bunee: ‘Wakita busoga, mukiti musoga. Nu kubuno wabede mukatizia ku biteli byingi, ube na bwangato bwa miino ikumi.’ 18 Nu wa babili avule nu abwide bunee: ‘Mukota, bikulo byobe byamonine mutali wa bingo bitano.’ 19 Mukota wage amubwide bunee: ‘Uwe nu uwe, angata miino itano.’ 20 Nu ungo avule nu abwide bunee: ‘Lola, Mukota, bikulo byobe bibino, nabilangile mu kibe kya nsulu, 21 kubuno nakukuaga boba, kubuno uli muntu mukali: ukutikagia byutabikile nu ukutubulaga byutayikile.’
22 Mukota wage amubwide bunee: ‘Nkukusungia ku mamo moki mobe. Mukiti mubi! Wamenyaga buno nili muntu mukali, nkutolaga binsyabikile nu nkutubulaga binsyayikile. 23 Kubuni lino kutabikile bikulo byane ku babo beli n'isuku lya kulanga bikulo buno mu kusubya kwane nti nabitole na mutali?’
24 Kusila atendile ku babo babezaga bemana gago bunee: ‘Munyagazi bikulo nu mubikasane ku wozo uli na bikulo ikumi!’
25 Bamubwide bunee: ‘Mukota, eli na bibombo ikumi bya feza.’
26 Abatendile bunee: ‘Wozo uli na kena akakaswa, tondo wozo uteli na kena, akatikibwa aba nu kako keli nako. 27 Tondo babo beiti bane batakutunda nibangate, vwazi nabo gano, mubeite ku meiso mane!’”
Yesu Akwingila mu Yerusalema
28 Gaasilile kutenda bitondo bibino, Yesu endile lwabusio lwa musanganano kubakama ku Yerusalema. 29 Nu gaabede eseli bwigi na ku Betefage nu ku Betania, bwigi na mwiduko ukumanwa Mizeituni, Yesu asingile babili ba ku beigisibwa bage. 30 Nu ababwide bunee: “Mwende aaba ku mwino guli ku lwabusio lweinyu, nu gamwingile mugo, mwamone ku kyana kya mpunda kyaswikwa, utebakamagwa na muntu wampa gantata gage, nti mwakisula, nu nti mwavwa nakyo. 31 Nu ndi muntu amubuzia bunee: ‘Kubuni mwakisula?’ nti mwamwakula bunee: ‘Mukota akwiyanina kyo.’” 32 Nu babo basingilwe bendile nu basangile binsania anga bwabatendile Yesu. 33 Nu gababezaga bese basula kyana kya mpunda, beiyakyo bababuzizie bunee: “Kubuni kumwasula kikino kyana kya mpunda?” 34 Babakwide bunee: “Mukota akwiyanina kyo.” 35 Nu bavule nazo ku Yesu, nu babikile nsulu zabo gantata gakyo nu babakamizizie Yesu gakyo. 36 Nu gaabezaga mu lugendo, bantu banzile nsulu zabo mu nzila. 37 Nu gaabede ese bwigi na Yerusalema mu kugela mwiduko wa Mizeituni, musanganano unsania wa beigisibwa bage wabogilebogile nu kuganuna Kalaga n'iyuki inene ku kabamba ka migeleko mingi zibamonine kuzo. 38 Batendile bunee: “Akaswe mponga, Mukota ukuvwa mu izina lya Mukota, bubobelelo mwigulu nu lutanuno ku biziki bya mwigulu!”
39 BaFarisayo bamozi babezaga munkatini mwa musanganano babwide Yesu bunee: “Musozi, zugila beigisibwa bobe.” 40 Nu akwide bunee: “Nkumubula buno, ndi beikala kibibi, makozi nti malaluke!”
Yesu Akulilila Yerusalema
41 Nu gaabezaga eseli bwigi na mwino, Yesu gagumonineko, agulilide. 42 Nu abwide bunee: “Songo nu we wamenyaga busi bubuno, bitondo binakasia ku bubobelelo bwobe! Tondo kano kaluma byabiswa lwabusio lwa meiso mobe. 43 Aba kukavwa bindi kuguli gakakita beiti bobe mikolo nu kukutimba nazo nu kukukanda nazo ku ndenge insania. 44 Bakakukinda gansi, uwe gamozi na bana bobe beli munda mwobe, nu tabakasiga munda mwobe aba ikozi gantata ga lingo, kubuno ntwamenyininne nkungu zavule Kalaga kuguli.”
Yesu Akwimbya Bantu mu Numba za Kukumbamina Kalaga
45 Nu eingide mu numba za kukumbamina nu alingile kwimbya babo bakunzagia mumo. b 46 Nu abatendile bunee: “Bwasanzilwe bunee: ‘numba zane zabe numba za misanganano; tondo inyuwe mwazigalukya kuba numba za banyagi!’” c