Musumo wa Musigala nu Ngatu
18
1 Yesu abeisile musumo umozi kulolesia buno bwatunganana kusega bindi binsania geteli kukutwa. 2 Atendile bunee: “Kwabezaga ngatu mu mwino umozi, utakuaga Kalaga boba, nu utanzaga muntu wampa. 3 Nu mu wozo mwino musigala umozi wavwaga kumutenda buno, nsesele mulondo wane ganisamba na musombi wane. 4 Nu ku nkungu ndazi, wozo ngatu ananine, tondo eibuzizie mu mutima wage bunee: ‘Aba ndi nsikukuaga Kalaga boba, nu nsikwanzaga muntu wampa, 5 tondo kubuno wono musigala ankutia, nkumusesela mulondo wage busoga buno anavwa kumvwila lingo bindi binsania, nu kunkutia.’” 6 Nu Mukota atendile lingo bunee: “Ungwililazi bukutenda wono ngatu mubi! 7 Nu Kalaga ndi ntanabingia basombolwa bage, babo bakumusegaga musi nu kindi, nu ndi aneizizia na kubakasia? 8 Nkumubula buno, asasie kubabingia, tondo gavwe Mwana wa Muntu, ndi nti akamona bukatizio mu kisi?” Musumo wa muFarisayo nu Musanzi ka Kuligia Kodi
9 Nu eisile lingo wono musumo ku bantu bamozi bakwikengela buno beli beisanana nu kubenga bango bunee: 10 “Bantu babili bendile kusega mu numba za kukumbamina; umozi abezaga muFarisayo nu ungo abezaga musanzi wa kuligia kodi. 11 Wozo muFarisayo azanzukile nu kwisegela we wenyene mu mutima wage bunee: ‘Ee, Kalaga, nakuganuna kubuno nsili anga bango bantu banyagi, bateisanana, bitazi, aba nsyasusania wono muligia wa kodi. 12 Nkukanda kulia idia mambizi mabili izinga n'izinga, nkutikagia kyindi ky'ikumi ku bikulo byane.’ 13 Tondo wozo muligia wa kodi emanine bulazi, nu ntatundile kulola kwigulu, tondo agwede bukukama, nu kutenda buno, ‘Kalaga nkwile kyombo, nne mwiya bwagi.’ 14 Nkumutenda buno, muntu wono akumbile ku numba zage nu aganzilwe wisanana kutinga wozo ungo, kubuno unsania ukwisakika akagezibwa, nu wozo ukwisigulizia akasakikwa.”
Yesu Akukasa Bana Bakeke Mponga
15 Nu bamuvwilide lingo na bana bato buno eitubye kubeli;
tondo gamonine beigisibwa bage ku bubuno, babazugide. 16 Tondo Yesu abamanine, buno bavwe kweli nu atendile bunee: “Sigazi bana bato bavwe kundi nu tamubazugile, kubuno bukota bwa Kalaga buli ku bantu beli anga babano. 17 Lebelebe nkumutenda buno, na unsania uteitabizia bukota bwa Kalaga anga mwana muto, ntakeingila nunse mubo.”
Mugumi Umozi
18 Nu mukota umozi abuzizie Yesu bunee: “Musozi musoga, buni bunikita buno nipiene kalamo katanakuzinda?” 19 Nu Yesu amutendile bunee: “Ku buni ukummana musoga? Takuli uli musoga, umpanga Kalaga wenyene. 20 Uwe wizi milembe bunee: ‘Ntukite butazi, ntwite, ntwibe, ntweke buza, anza so nu nyoko.’” 21 Nu wozo muntu amwakwide bunee: “Nasilile kwanza zezo milembe insania, kutukila bwana buto.” 22 Nu gongule Yesu ku bubuno, amwakwide bunee: “Wida kitondo kimozi tugu: kunzia binsania biguli nabyo nu ubibeganie ku bazambi, nu uwe nti wabe n'isuku mwigulu. Kusila nti wavwa nu nti wanyange.”
23 Nu gongule wozo muntu ku bubuno, abede na kabebe nunse; kubuno abezaga na bikulo byingi. 24 Nu gamonine Yesu ku bubuno, atendile bunee: “Buli bubibu ku mugumi kwingila mu bukota bwa Kalaga! 25 Kubuno buli neibineibi ku ngamia kwingila mu itengu lya nsinge, kutinga mugumi kwingila mu bukota bwa Kalaga.”
26 Nu babo bongule ku bubo, batendile bunee: “Umpanga nazi unavwama konibwa?”
27 Yesu akwide bunee: “Bubo butakukulungana ku bantu, bunakulungana ku Kalaga.”
28 Nu Petro atendile bunee: “Lola tanga, iswe twasigile byeitu binsania, nu twakuyangile.” 29 Nu Yesu abatendile bunee: “Lebelebe nkumubula bunee: ‘Takuli muntu wampa wasigile numba zage aba mukikulu wage aba mubuto wage aba babuti bage, aba bana bage, ku kabamba ka bukota bwa Kalaga, 30 utatalikilwe byingi nunse mu zeno nkungu, nu mu nkiko zavwe, kalamo katanakuzinda.’”
Yesu Akusambala Lingo Lukuo Lwage nu Kuyuka Kwage
Kutuka ku Bakuzi
31 Ububo Yesu atolile babo ikumi nu babili gamozi nage abatendile bunee: “Ungwililazi, tukubakama kwenda ku Yerusalema. Nu bitondo binsania byazindilile byasanzilwe na balengania ku kabamba ka Mwana wa Kalaga. 32 Kubuno agabulwe ku baBilongo nu bamwililike nu kumubenga nu kumuswilila matazi. 33 Nu bamususule na kasusu, nu kumwita; nu kusila kwa bindi bisatu, nti ayuke kutuka ku bakuzi.”
34 Tondo beigisibwa tabamenyininne kampa ku bubo. Kubuno bitondo bibino byabezaga byabiswa kubeli aba tabasongolwede bwisulilwa bwa bibyo bitondo byatendagwa.
Yesu Akonia Kyuku
35 Gabezaga Yesu eseli bwigi na Yeriko, muntu umozi wabezaga kyuku eikalaga bwigi na nzila nu asegaga. 36 Nu gongule bantu beingi bakutinga, abuzizie bunee: “Kikizi kikino?” 37 Nu bamusambalide bunee: “Yesu muNazareti U, ukutinga.” 38 Nu alalukile n'iyuki inene bunee: “Yesu, Mwana wa Davidi, nkue kyombo!” 39 Babo babezaga bakwenda lwabusio lwage bamuzugide buno bamwikazie kibibi; tondo we itide kulaluka bubibu nunse bunee: “Mwana wa Davidi nkue kyombo!”
40 Nu Yesu emanine nu akakizizie buno bavwe nage kweli. Nu gaabezaga ese bwigi nage, Yesu amubuzizie bunee: 41 “Ukutunda nikukitile kikizi?” Nu we akwide bunee: “Mukota, nkutunda namona lingo.” 42 Nu Yesu amutendile bunee: “Mona! Bukatizio bwobe bwakwonia.” 43 Kazanga kongo amonine, nu ayangile Yesu nu aganwine Kalaga. Nu bantu bansania, gabamonine ku bubo, baganwine Kalaga nu bo.