Bwagi nu Isigililo
17
1 Yesu abwide beigisibwa bage bunee: “Kwatunganana kuba bwakukikitania, tondo kabebe ku wozo muntu ukubukita! 2 Bunaswagile ku muntu wono akandwe ikozi lya kugoga mu ikosi lyage nu kwiswa mu kitatenge, ndi ntakolokya umozi wa ku babano bana mu bwagi. 3 Idangazi mubenyene! Ndi mubuto wobe aga, nti wamuzugila nu ndi eiyania nti wamusigilila. 4 Nu ndi akwagide mambizi mutubakamo mu busi bumozi; nu ndi asubya kuguli mambizi mutubakamo, nu kubula buno, niyania; nti wamusigilila.”
Bukatizio
5 Basingwa babwide Mukota bunee: “Tutalikile ku bukatizio bweitu.” 6 Nu Mukota akwide bunee: “Songo mwabezaga na bukatizio anga kaguma ka bunyonyo, munatendile ku wono muti wa kinsembe bunee: ‘Yuka gano nu kuyikwa mu kitatenge,’ nu nti unamwanzile.
Mulimo wa Mukiti
7 Tondo nazi wa kumuli, ndi eli na mukiti ukulima aba ukulanga mukoko, unamubula mu nkungu za kutuka ku masoa bunee: ‘Vwa lubilo ulie idia?’ 8 Ndi ntanamubula bwebwe bunee: ‘Ndongekele idia, ikande nsulu nu nkitile aaba nu ganasile kulia nu kunua. Kusila kwa bubo uwe nti walie nu wanue?’ 9 Ndi anaganuna wozo mukiti kubuno akitile bubo bwakakizizibwe? 10 Ububo, nu inyuwe, nkungu zimwasila kukita binsania bimwakakizizibwe, tendazi bunee: ‘Iswe tuli bakiti beteli na mutali, twakitile tugu bubo butwatunganana kukita.’”
Yesu Akonia Beiya Bibali Ikumi
11 Gendaga Yesu ku Yerusalema, atingile gasamba Samaria nu Galilaya. 12 Nu geingide mu mwino umozi, bantu ikumi beiya bibali bavule kumukulumania, bemenne bulazi. 13 Nu balalukile n'iyuki inene bunee: “Yesu, Mukota tukwile kyombo!” 14 Gaabamonineko, ababwide bunee: “Endazi mwidolesie ku Basankoga.” Nu gabendagako, bengezibwe. 15 Umozi wa kubeli, gaamonine buno asila kona, asubizie, akuganuna Kalaga n'iyuki inene. 16 Agwede bukukama lwabusio lwa magulu ma Yesu, nu amuganwine; nu we abezaga muntu wa ku Samaria. 17 Yesu abuzizie bunee: “Babo bantu ikumi ndi tabengezibwe? Nu babo bango mubula, kuni kubeli? 18 Ndi takuli ungo wa mubo wamonekile kusubya nu kuganuna Kalaga, umpanga wono mugeni?” 19 Kusila amubwide bunee: “Emanuka, wende, bukatizio bwobe bwakwonia.”
Kuvwa kwa bukota bwa Kalaga
20 BaFarisayo babuzizie Yesu bunee: “Nkungu nkizi zikavwa bukota bwa Kalaga?” Abakwide bunee: “Bukota bwa Kalaga tabukavwa ku lukita lukumonekako na meiso. 21 Aba, tabakatenda buno, buli gano, aba buli kuko, kubuno bukota bwa Kalaga buli mu mitima zeinyu.”
22 Nu abwide beigisibwa bage bunee: “Bindi byavwe, u gago gamwatunde kumona ku kindi kimozi ku bindi bibino bya Mwana wa Muntu, nu tamukakimonako. 23 Nu bakamubula buno, ‘Eli gago,’ aba ‘eli gano!’ Tamwende aba tamubayange. 24 Kubuno anga bukukelimaga mukenzi kutukila ku lulenge lumozi lw'igulu, aaba nu ku lungo lulenge, ububo bukaba kuvwa kwa Mwana wa Muntu ku busi bwage. 25 Tondo bwatunganana tanga buno asungibwe nunse nu kusombwa na kibuti kikino.
26 Nu anga bwabede mu bindi bya Noa, ububo bukaba lingo mu bindi bya Mwana wa Muntu. 27 Bantu baliaga, banuaga, basongaga, nu basongagwa, aaba nu busi bubo bwingide Noa mu safina nu mwiyalo munene nunse wavule, nu wazikizye bansania.
28 Lingo, anga bwabede mu bindi bya Loti, baliaga, banuaga, bakunzaga, bakunzagia, bayikaga mbuto, bobakaga; 29 tondo busi bubo, bwatukile Loti mu Sodoma, mbula za keiya nu kibiliti zatukile kwigulu, nu zabazikizye bansania. 30 Nu bubo u bukaba lingo busi bwa kumoneka kwa Mwana wa Muntu.
31 Mu bubo busi, wozo ukasangwa gantata ga mutondo wa numba nu ukaba na bintu byage mu numba, ntakumbe kubitola. Ububo nu bo, wozo ukaba mu isoa, ntasubye lingo kumbusa. 32 Kengelazi mukazi wa Loti. 33 Muntu unsania ukalondaga konia kalamo kage, akakazimizia: nu wozo ukakazimizagia akakamona lingo. 34 Nkumubula buno, mu kindi kikyo, bantu babili bakaba ga mugu umozi; umozi akatolwa nu ungo nti akasigala. 35 Bakikulu babili bakaba bakututa gamozi; umozi akatolwa nu ungo nti akasigwa. 36 Bamulume babili bakasangwa mu isoa, umozi akatolwa nu ungo nti akasigwa.” 37 Beigisibwa bamubuzizie bunee: “Kuni kwabe bubo Mukota?” Nu akwide bunee: “Gago geli kitumba, nti u gago gakakundamanina ndiu.”