Musumo wa Mulangi Mubi wa Bikulo
16
1 Yesu abwide lingo beigisibwa bage bunee: “Muntu umozi mugumi abezaga na mulangi umozi wa bikulo, wasongelwa kweli buno azimizia bikulo byage. 2 Amumanine, nu amubwide bunee: ‘Musagu mukizi wono u nkungwa kugo, ku kabamba kobe? Ganza bikulo byane biguli nabyo, kubuno ntunavwama lingo kuba mulangi wa bikulo byane.’ 3 Wozo mulangi wa bikulo atendile mwage mu mutima bunee: ‘Buni bunikita? Kubuno mukota wane antikya ku bulangi bikulo byage? Nsili na magala ma kulima masoa. Nu nkukua nsoni kusega. 4 Nizi bunakite buno ganatikibwe ku mulimo wane, kube bantu bansekele ku numba zabo.’ 5 Nu amanine umozi umozi ku babo babezaga na nsombi za mukota wage. Atendile ku wozo mutangi bunee: ‘Uli na nsombi zigezye gani ku mukota wane?’ 6 Amwakwide bunee: ‘Bilindiko lukama bya makiti.’ Nu amubwide bunee: ‘Tola mukanda wobe, usasie kwikala gansi, nu nti wasanza: makumi matano.’ 7 Kusila atendile ku wozo ungo bunee: ‘Nu uwe, uli na nsombi zigezye gani?’ Amwakwide bunee: ‘Bilindiko lukama bya ngano.’ Nu amutendile bunee: ‘Tola mukanda wobe, nu nti wasanza buno, makumi kinana.’ 8 Mukota aganwine mulangi mubi, kubuno akitile anga muntu uli na menge. Kubuno bana ba kisi kikino beli na menge nunse ma kulongeka bitondo byabo kutinga bana ba kyengi. 9 Nu nne nkukubula buno, mube na bilemba gamukukita na bikulo bya kisi, buno geide bikulo, bakamusekela mu biziki bitanakuzinda. 10 Wozo uli mukatizia mu bintu bikeke nunse, nti eli mukatizia lingo mu bibyo binene, nu wozo uteisanana mu bintu bikeke nti nteisanane tondo mu bibyo binene; 11 Umpanga ndi tamwabezaga bakatizia ku bikulo biteisanana, nazi nti wamukase bibyo bya lebelebe? 12 Nu ndi tamwabezaga bakatizia mu bikulo bya ungo muntu, nazi ukamukasa byeinyu mubenyene?
13 Takuli mukiti wampa unavwama kukitila bakota babili, kubuno nti asombe umozi nu kutunda ungo; aba nti agomie nunse na umozi nu nti abenga ungo. Tamunavwama kukitila Kalaga nu bikulo.”
Meigisia ma Yesu ma Nkita na Nkita
14 BaFarisayo, babo babezaga nunse bakutunda bikulo, bongule ku bibyo bitondo binsania nu beililikile Yesu. 15 Nu Yesu abatendile bunee: “Inyuwe bantu bakwiganza mubenyene buno mwisanana lwabusio lwa bantu, tondo Kalaga eizi mitima zeinyu, kubuno kikyo kikutanunwa munkatini mwa bantu kikusombwa na Kalaga.
16 Mulembe nu balengania byabezaga aaba nu kwika ku Yoana; kutukila nkungu zezo, bukota bwa Kalaga bwasambedwe, nu na muntu na muntu na ukukita magala buno eingile mubo. 17 Tondo buli neibineibi nunse igulu nu kisi bitinge, kutinga isanzo limozi ikeke lya mulembe kukoloka.
18 Na muntu unsania watikya mukazi wage, nu kusonga ungo, nti akita butazi, nu na muntu unsania wasonga mukikulu, watikibwa na iba wage, nti akita butazi.
Muntu Mugumi nu Lazaro
19 Kwabezaga muntu umozi mugumi, wabezaga wavwala nsulu nsoga zakisimana nu zenga nunse, nu na busi na busi alamaga kalamo kasoga. 20 Muzambi umozi wamanagwa Lazaro, abezaga na byulu byingi, eiyombekaga ga mwingilo wa numba za wozo mugumi; 21 nu atundaga kwembuka na mbobu zakolokaga ku meza ma wozo mugumi; nu aba mboa zavwaga kulamba ku byulu byage. 22 Nu gabede wozo muzambi akua, ekilwe na banzelo ku bukuba bwa Abrahamu. Nu wozo mugumi akule nu we, nu ayikilwe. 23 Nu mu kiziki kya bakuzi, mugumi alambwide meiso bulazi nu amonine ku Abrahamu nu Lazaro eli ku bukuba bwage. 24 Nu alalukile n'iyuki bunee: ‘Tatane Abrahamu, nkwile kyombo nu singa Lazaro buno eingizie ntonga za munwe wage mu mazi nu nti ozie lulami lwane, kubuno nkubabalwa nunse mu keiya kakano.’ 25 Tondo Abrahamu akwide bunee: ‘Mwana wane, kengela tanga buno wakatile bintu byingi bisoga mu kalamo kobe, nu Lazaro nu we akatile bibi mu kalamo kage, tondo kano kaluma es'abobelezibwa gano, nu uwe use wasungibwa. 26 Nu kwitila nunse ku bitondo bibino binsania, kuli muzinga munene gatusamba na inyuwe buno aba babo bakutunda kutuka gano nu kutinga kuko kumuli, tabanavwama, aba ba kuko kumuli kubasa kutuli tabanavwama kubukita.’ 27 Mugumi abwide bunee: ‘Tatane Abrahamu, nkukusega tanga buno, usinge Lazaro ku numba za tatane: 28 Kubuno nili na mibuto zane itano. Ende kubatonda, buno nu bo banavwa kubabazibwa ku kikino kiziki kya lusungio.’ 29 Nu Abrahamu akwide bunee: ‘Beli na Musa nu na balengania; babongwilile.’ 30 Nu atendile bunee: ‘Ta bubo, Tatane Abrahamu, tondo ndi umozi wa ku bakuzi enda kubeli nti baneiyania!’ 31 Abrahamu amubwide bunee: ‘Ndi tabakungwilila Musa nu balengania, tabanakatizia aba ndi umozi wa ku bakuzi anayuka.’”