Meigisia ma ku Mwiduko
5
1 Gamonine Yesu ku misanganano, abakamine ku mwiduko nu eikede gansi. Beigisibwa bage bamuvwilide. 2 Nu alingile kubeigisia bunee: 3 “Mbogimbogi ku babo bakwikengela beli bazambi,
kubuno Bukota bwa Kalaga buli bwabo!
4 Mbogimbogi ku babo beli na kabebe,
kubuno Kalaga ababobelezie!
5 Mbogimbogi ku babo babota,
kubuno bapiene kisi!
6 Mbogimbogi ku babo bakukua na nzala nu mpusia za kwisanana,
kubuno Kalaga abakase meiyanino mabo!
7 Mbogimbogi ku babo bakukwila bango kyombo,
kubuno babo bakwilwe kyombo!
8 Mbogimbogi ku babo beli na mitima zaswaga,
kubuno babo bamone ku Kalaga!
9 Mbogimbogi ku basunguzi ba bantu,
kubuno bamanwe bana ba Kalaga!
10 Mbogimbogi ku babo bakubabazibwa ku kabamba ka kwisanana,
kubuno Bukota bwa meigulu buli bwabo!
11 Mbogimbogi kumuli inyuwe bakulingwa, nu kubabazibwa, nu kwekwa buza ku kitondo na kitondo kibi ku kabamba kane. 12 Bogazibogazi nu mube na kyelele, kubuno lukalilo lweinyu lwabe lusoga nu lunene mwigulu: kubuno ububo bubababazagia balengania babezaga nti tamubutwa.”
Bantu ba Kalaga Beli Munkange nu Kyengi kya Kisi
13 “Inyuwe muli munkange wa kisi; tondo ndi munkange taguli na nse, unaswagibwa na kikizi? Tagunaswaga lingo nunse, umpanga nti watebwa kumbuga nu kunyantwa na magulu ma bantu.
14 Inyuwe muli kyengi kya kisi. Mwino tagunabisama ndi wobakwa gantata ga mwiduko. 15 Aba bantu tabanagulumizia kasuku, nu kukabika kunsi kwa luzi, tondo gantata ga kyanikilo kya kasuku; nu ko nti kakusania bansania beli mu numba. 16 Bubo kyengi kyeinyu kisane ku bantu, bamone ku makitilo meinyu masoga, nu nti baganune Soinyuwe uli mwigulu.”
Mulembe wa Musa
17 “Tamukengele buno, navule kwita mulembe wa Musa aba bulengania: nsyavule kubita, tondo kubizindilizia. 18 Lebelebe, nkumubula bunee: ‘Igulu nu kisi bikatinga tondo keisanzo kamozi kakeke ka masanzo ma mulembe wa Musa takakazimina aaba mansania makazindilizibwa. 19 Muntu unsania ukwita ikakizio limozi ku mamano nu kwigisia bango bantu bubo, akaba mukeke mu Bukota bwa meigulu: tondo ukumanzaga nu kwigisia bango bantu bubo, wozo akaba munene mu Bukota bwa meigulu. 20 Kubuno nkumubula nunse, ndi kwisanana kweinyu takwatinga kwisanana kwa basanzi nu baFarisayo, nti tamukeingila mu bukota bwa meigulu.’
21 Mungule bwatendagwa ku bantu ba wakalazi bunee: ‘Ntwite muntu; ukeitaga muntu nti akaba na katati ka kusungibwa:’ 22 tondo nne nkumubula bunee: ‘Muntu unsania ukongelwa mubuto wage akaba na katati ka kusungibwa; nu muntu unsania ukabula mubuto wage bunee: “Kyoto!” akaba na katati mu lusu lwa milondo; nu muntu unsania ukabulaga mubuto wage bunee: “Uwe u kikongolo!” akaba na katati mu kiziba kya keiya.’ 23 Umpanga, ndi use wakasana lukaso lwobe ku kayulo, nu ndi wakengela buno uli na mulondo na mubuto wobe, 24 siga tanga lukaso ku kayulo, nu nti wenda ku mubuto wobe buno ugomie nage, nu nti wasubya kukasana lukaso lwobe.
25 Sasia kugomania na wakusomba nkungu ziguli nage mu nzila; wozo wakusomba anavwa kukubasia ku ngatu nu ngatu nti akubasia ku balangi ba kikando, nu nti wakandwa. 26 Lebelebe, nkumubula bunee: ‘Ntukatuka nunse kuko ndi ntusila kuliga nsombi zobe insania.’
27 Mungule bwatendagwa bunee: ‘Ntwite meiga:’ 28 Tondo Nne nkumubula bunee: ‘Muntu unsania ukulola mukikulu na lutundo lwa kumulimbia, nti asila kalazi kukita butazi mu mutima wage.’ 29 Nu ndi ku kabamba ka liso lyobe ukinsa waga, nti walitikya, nu nti walyisa bulazi nobe. Busoga kuzimizia kiganza kimozi, kuteli mubili wobe unsania kwingila mu kiziba kya keiya katanakuzinda. 30 Nu ndi ku kabamba ka kuboko kwobe kwa seidume ukinsa waga, nti wakusesa, nu nti wakwisa bulazi nobe. Busoga kuzimizia kiganza kimozi, kuteli mubili wobe unsania kwingila mu kiziba kya keiya katanakuzinda.
31 Bwatendilwe lingo bunee: ‘Muntu unsania ukatikagia mukikulu wage nti amukasa mukanda wa kwita isonga.’ 32 Tondo Nne nkumubula bunee: ‘Ndi wamulume atikya mukikulu wage, kuteli ku kabamba ka butazi, nti amubika kitazi nu unsania wasonga wozo watikibwa nti akita butazi.’
33 Lingo, mungule bwatendagwa ku bantu ba wakalazi bunee: ‘Ntulumbile kilumbilo kya buza, tondo mukitile Mukota bilumbilo byobe binsania.’ 34 Tondo Nne nkumubula bunee: ‘Tamulumbile nunse, aba ku igulu, kubuno igulu lili kisumbi kya Bukota bwa Kalaga: 35 aba ku kisi kubuno kisi u kibikilo kya magulu mage, aba nu ku Yerusalema, kubuno mwino wozo guli wa Mukota Munene. 36 Aba ntulumbile ku itoe lyobe, kubuno ntunavwama kugalukya luzwili lumozi kulwengia aba kulwinia. 37 Tondo kwitabizia kweinyu kube, “Ee,” nu kutuna kweinyu kube, “ta bubo;” iyuki lya kutalika likutuka ku wozo mubi.’
38 Mungule bwatendagwa bunee: ‘Liso ku liso, nu linyo ku linyo.’ 39 Tondo Nne nkumubula bunee: ‘Tamulwane na muntu mubi: tondo ndi muntu akulibula lugizi ku itama lya seidume, nti wamutimbulila lingo lya seikazi. 40 Nu we wakusongela, nu kutola nsulu zobe za kuntata, mukase engo za kunsi. 41 Ndi muntu akwenzia lugendo lwa mutandi umozi, wende nage mitandi ibili. 42 Kasa wozo ukukusega, nu wozo ukukwamba ntumunanine.’
43 Mungule bwatendagwa bunee: ‘Tunda munyobe, nu somba wozo wakusomba.’ 44 Tondo Nne nkumubula bunee: ‘Tundazi beiti beinyu, sigililazi bamusomba. Tundazi babo bamusomba, nu segelazi babo bakumubabazagia,’ 45 bubo mwabe bana ba Soinyuwe uli mwigulu: kubuno akusanizia bantu babi nu bantu basoga kisongo kyage kya busi, nu akulokezagia bantu beisanana nu bateisanana mbula. 46 Ndi mukutunda bakumutundaga nti mukaligwa kikizi? Baligia ba kodi ndi tabakukitaga bubo nu bo? 47 Nu ndi mukusekela mibuto zeinyu tugu, nti ukutinga bango bantu buni? Ndi baBilongo tabakukitaga nu bo bubo? 48 Umpanga mube basililila, anga bwasililila Soinyuwe uli mwigulu.”