Kusambala kwa Yesu ku Mwiduko
6
1 Nu atendile lingo bunee: “Idangazi buno nkazo za mponga zeinyu tazimoneke ku bantu buno, mumenywe nabo; ndi mwakita bubo tamwakaswe lukalilo lusoga ku Soinyuwe uli mwigulu. 2 Kungwa ukukita bantu mponga, ntwide monze, anga bukukitaga bengelezi ku numba za misanganano nu mu nzila, buno baganunwe na bantu. Lebelebe nkumubula bunee: ‘Babo basila kuligwa kalazi.’ 3 Tondo kungwa ukukita bantu mponga, kuboko kwobe kwa seikazi takumenye bukukita kuboko kwobe kwa seidume; 4 bubo ndi wakita bantu mponga zibe ku lumbisombiso, nu Soinyuwe ukumona mu lumbisombiso nti akulige busoga.
5 Nu ndi ukusega Kalaga, ntube anga bengelezi; kubuno babo bakutunda kusega Kalaga nti bemana mu numba za misanganano nu mu ntungo mwa nzila buno bamonekeko na bantu. Lebelebe, nkumubula bunee: ‘Babo basila kuligwa kalazi.’ 6 Tondo, ndi ukusega Kalaga, nti wingila mu numba zobe nu nti wigala lwibi, nu nti wasega Soinyuwe ku lumbisombiso, nu Soinyuwe ukumona mu lumbisombiso akukase lukalilo lusoga.
7 Tondo ndi wasega Kalaga, tamutende bitondo byingi bya buliabulia anga bukukita batakatizia: bakukengela buno Kalaga akubongwa ndi batenda bitondo byingi. 8 Umpanga tamube anga babo; kubuno Soinyuwe eizi bimukwiyanina kungwa tamumusega. 9 Segazi ku Kalaga anga bubuno;
‘Tateiswe uli mwigulu, izina lyobe liganunwe.
10 Bukota bwobe buvwe, kusombola kwobe kukitwe
ku kisi anga bukukukitwa mwigulu.
11 Tukase lelo idia lyeitu.
12 Tusigilile misako za bwagi bweitu
anga butukusigililaga bakutwagilaga,
13 Nu ntutwenzie ku malindiko,
tondo tonie ku wozo mubi,’
(Kubuno uli na bukota, nu magala, nu lutanuno,
aaba nu ku nkiko zitanakuzinda. Amena.)
14 Kubuno ndi mukusigilila bantu misako za bwagi bwabo, nti Soinyuwe nu We uli mwigulu amusigilile misako za bwagi bweinyu. 15 Tondo ndi tamukusigilila bantu misako za bwagi bwabo, nu Soinyuwe nu We ntakamusigilila misako za bwagi bweinyu.
16 Lingo ndi mwikanda kulia, tamube anga bengelezi bakukanda malanga; buno bantu babamenye buno beikanda kulia. Lebelebe, nkumubula bunee: ‘Bakasilwe lukalilo lwabo.’ 17 Tondo uwe ndi wikanda kulia, nti woge ku meiso, nu ibongie mwambo ku itoe, 18 tondo ndi ntukulia, kita buno bantu tabamenye buno wikanda kulia; tondo Soinyuwe ukumona mu lumbisombiso akukase lukalilo lusoga.
19 Tamwibikile bikulo ku kisi, kuli kagembe nu nkisa bya kubibigia, nu beibi kwita numba nu kwiba; 20 tondo ibikilazi bikulo byeinyu mwigulu, kuteli kagembe nu nkisa bya kubibigia, nu lingo gatanavwama kwika ku beibi buno beibe; 21 kubuno gago geli bikulo byobe, u gago gabe mutima wobe.
22 Kasuku ka mubili keli liso: ububo ndi liso lyobe lili isoga, mubili wobe unsania nti guli na kyengi. Ndi kikyo kyengi kili muguli kise kapilo; nti keli kapilo nunse. 23 Tondo ndi liso lyobe lili ibi, mubili wobe unsania nti guli na kapilo. Ndi kikyo kyengi kili muguli kise kapilo; nti keli kapilo nunse.
24 Takuli muntu unavwama kukambila bakota babili: kubuno anasomba umozi, nu nti kutunda ungo; kubuno anze umozi, nu kubenga ungo. Tamunavwama kukambila Kalaga nu bikulo.
25 Kubuno nkumubula bunee: ‘Tamwikutie mu kalamo keinyu, buno twalie kikizi? aba twanue kikizi? aba ku mubili weinyu, buno twavwale kikizi;’ Ndi kalamo takatinga idia nu ndi mubili tawatinga nsulu? 26 Lolazi ku tuzoni twa mu mpelela, tatukuyika aba tatukutubula mbuto, aba tatukukundamania mu bigenge, tondo Soinyuwe wa mwigulu akutulisagia. Inyuwe ndi tamwatinga tuzoni ku busoga? 27 Nazi umozi wa kumuli unavwama kwitalikila bungo bulazi ku kima kya mubili wage?
28 Buni bumukulemanina nsulu? Kengelazi lukita lwa maluba ma mu masoa, lukita lumakwasa; tamakukita mulimo, aba tamakwidukila; 29 tondo nkumubula bunee: aba Solomono mu lutanuno lwage lunsania ntalebezibwe anga bwalebezibwe limozi lya mamo maluba. 30 Tondo ndi Kalaga akulebya bisugu bya masoa biligo lelo nu lubi bikutebwa mu ngulumina za keiya, ndi ntanamuvwalikya inyuwe beli basosu mu bukatizio bweinyu. 31 Tamwikutie nu tamutende bunee: ‘Twalie kikizi? aba, Twanue kikizi? aba, Twavwale kikizi?’ 32 Kubuno baBilongo bakulondaga bibino binsania; tondo Soinyuwe wa mwigulu eizi binsania bimukwiyanina. 33 Tondo londazi tanga Bukota bwa Kalaga, nu kwisanana kwage; nu mwatalikilwe binsania. 34 Umpanga tamwikutie ku bya lubi, kubuno busi bwa lubi bwidemanine bubwenyene. Bubi bwa busi bwaswage kubo.”