Kusambala kwa Yesu ku Mwiduko
7
1 Nu atendile lingo bunee: “Tamusungie bango, buno munavwa kusungibwa. 2 Kubuno lusungio lulo lumukusungia bango, u lulo lumukasungibwa; nu kulindika kumukulindika bango, u kuko kumukalindikwa nu inyuwe. 3 Nu uwe, buni buukulola kikolokolo kili mu liso lya munyobe tondo ntukumona ku lwasa luli mu liso lyobe? 4 Buni buunavwama kutenda ku munyobe bunee: ‘Munane, vwa tanga nikutikye kikolokolo kili mu liso lyobe,’ nu uwe uli na lwasa lunene mu liso lyobe? 5 Uwe mwengelezi, tikya tanga lwasa luli mu liso lyobe; nti u buunavwama kutikya kikolokolo kibi mu liso lya munyobe. 6 Tamukase mboa kikyo kyaswaga, aba tamwise busanga bweinyu bwa bukunza bubibu gakutinga ngulube, zinavwa kubunyanta na magulu mazo, nu gazasile kubunyanta nti zavwa kukwita nu uwe.
7 Segazi, nu nti mwakaswe; londazi, nu nti mwamone; kokomonazi, nu nti mwigulilwe. 8 Kubuno unsania ukusega, nti akaswe; nu we ukulonda, nti amone; nu we ukukokomona, nti eigulilwe. 9 Nazi umozi ndi mwana wage amusega kampampa anamukasa ikozi? 10 Aba ndi akumusega kyena nti anamukasa nzoka? 11 Kubuno ndi inyuwe, bantu babi, mwizi kukasa bana beinyu bisoga, embe Soinyuwe lino uli mwigulu ndi ntanamenya kubakasa bisoga babo bakumusega?
12 Umpanga bubo bumukutunda bango bantu bamukitile, ububo nu inyuwe bumubakitile kubuno bubo u mulembe nu bulengania.
Nzila Ibili
13 Ingilazi ku mwingilo wabumbutana: kubuno kuli ungo mwingilo watanuka, nu nzila zago zenda ku buzimizi, nu beingi bakwingilaga mugo. 14 Kubuno wozo mwingilo wabumbutana nu kuzinda kwa nzila zago kuli kalamo, nu bakukamona tabeingi.
Balengania ba Buza
15 Idangazi na balengania ba buza. Bakavwa ku lukita anga lwa mikoko, tondo munda mwabo muli anga mboa nkali za mu lubanda. 16 Mukabamenya ku biguma byabo. Ndi bantu bakukola biguma bya mizabibu ku mikele? Aba biguma bya mutini ku binkelenkele? 17 Bubo muti unsania musoga ukukolama biguma bisoga; nu muti mubi ukukolama biguma bibi. 18 Tondo muti musoga tagunakolama biguma bibi; aba muti mubi kukolama biguma bisoga. 19 Nu muti unsania utakolama biguma bisoga nti wasindwe, nu nti wiswe mu keiya. 20 Bubo mukabamenya ku biguma byabo. 21 Ta na muntu na muntu ukumbula bunee: ‘Mukota, Mukota,’ ukeingila mu Bukota bwa mwigulu, tugu wozo ukukita kusombola kwa Tatane uli mwigulu. 22 Beingi bakambula ku busi bubo bunee: ‘Mukota, Mukota, ndi tatwalenganizie mu izina lyobe? Nu ndi tatwatikizya basumbu ku izina lyobe, nu ndi tatwakitaga migeleko mingi ku izina lyobe?’ 23 Nu nkababula bunee: ‘Nsyamumenyine nunse: tukazi, bakiti ba bubi.’
Bobaki Babili
24 Muntu unsania ukungwaga bibino bitondo byane nu kubyanza akalingimanibwa na muntu wa menge, wobakile numba zage ga lwanda; 25 mbula zalokile, mwiyalo wavule, nu kisoa kyabede kinene nu kyidibwide ku zezo numba; nu tazagwede: kubuno mango mazo mabezaga ga lwanda. 26 Nu muntu unsania ukungwa ku bibino bitondo byane nu ntakubyanza, akalingimanibwa na kikongolo, kyobakile numba zage ga misege: 27 mbula zalokile, mwiyalo wavule, kisoa kyabede kinene nu kyidibwide ku zezo numba, nu zagwede; nu kugwa kwazo kwabede na kilumo kinene.”