Musumo wa Muyiki wa Mbuto
4
1 Yesu alingile kwigisia lingo mu ntungo mwa kitatenge nu musanganano munene wakundamenne mu ntungo mwage ububo eingide nu eikede mu bwato bwabezaga mu kitatenge. Nu musanganano unsania wabezaga wikala gansi ku mutili. 2 Abeigisizie bitondo byingi mu misumo. Nu abatendile mu meigisia mage bunee: 3 “Ungwililazi, muyiki endile kuyika mbuto. 4 Gaaziyikaga, mbuto imozi zakolokile mu ntungo mwa nzila: tuzoni twavule, nu twazibobwede. 5 Nu ingo zakolokile gantata ga lwanda, gago takwabezaga bilongo byingi. Nu kazanga kongo zasile, kubuno takwabezaga bilongo byingi. 6 Tondo gasanukile musi, zaguluminne nu zomine, kubuno tazabezaga na mizi. 7 Nu ingo zakolokile mu mikele. Mikele zasile, nu zazilimbanizie, nu tazakolamine biguma. 8 Nu ingo zakolokile mu bilongo bisoga. Zakolamine biguma. Zakulile nu zanagile: nu zakolamine makumi masatu, ingo makumi mutuba, nu ingo lukama.” 9 Nu atendile bunee: “Wozo uli na matuzi ma kungwilila, nti ongwilile!” Kubuni Yesu Eisile Zezo Misumo
10 Gaabezaga wenyene, bantu bamutimbile, gamozi na babo ikumi nu babili. Bamubuzizie bwisulilwa bwa musumo. 11 Ababwide bunee: “Kumuli u kwakasilwe kakungu ka Bukota bwa Kalaga. Tondo ku babo beli kumbuga bakungwa binsania mu misumo, 12 buno kumona, bakumona, tondo tabanatitikizya, nu kungwa, bakungwa tondo tabanamenyinina, buno banakivwa kugaluka, nu bwagi bwabo bunavwa kusigililwa!”
Yesu Eiswide Musumo wa Muyiki wa Mbuto
13 Ababwide lingo bunee: “Ndi tamwizi musumo wono? Umpanga buni bumukamenya misumo insania? 14 Muyiki akuyika idagi. 15 Bamozi beli mu ntungo mwa nzila gakusambalwa idagi nu ndi basila kulyungwa, kazanga kongo Satana nti avwa nu nti atikya lilyo idagi libasambalilagwa. 16 Bango bakusekela mbuto zayikilwe ga lwanda: gabakungwa ku idagi, nti balisekela kazanga kongo na mbogimbogi. 17 Tondo tabeli na mizi munda mwabo, bakusigala bindi byingi. Nu, gavwe kabebe aba lubabazio ku kabamba k'idagi lya Kalaga, kazanga kongo akwikuka. 18 Bango bakusekela mbuto zayikilwe munkatini mwa mikele; u babo bakungwa idagi, 19 tondo mpipi za nsungio za kisi, bwengelezi bwa bikulo nu ntundo za bingo bitondo byingila, bikulimbania idagi nu nti talinakolama biguma. 20 Bango bakusekela mbuto zayikilwe mu bilongo bisoga; u babo bongule ku idagi lilyo, bakulisekela, nu kukolama biguma, umozi makumi masatu, ungo makumi mutuba nu ungo lukama.”
Musumo wa Itala
21 Ababwide lingo bunee: “Ndi muntu anavwa n'itala nu kulibika kunsi kwa luzi, aba kunsi kwa mugu? Ndi ntakulibika ga kyanikilo kyalyo? 22 Kubuno takuli kyabisilwe, kitakabisulwa, aba takuli kyatendagwa mu kakungu kitakongubwako. 23 Ndi muntu eli na matuzi makungwilila, nti ongwilile.”
24 Yesu ababwide bunee: “Idangazi na bibyo bimukungwa kubyo kubuno kulindika kukuno kumukulindika, u kuko kumukalindikilwa, lingo u kumukatalikilwa. 25 Kubuno wozo uli na kena akakaswa; tondo ku wozo uteli nako, nti akatikibwa kako keli nako.”
Musumo wa Mbuto Zikwasa
26 Abatendile lingo bunee: “Bukota bwa Kalaga bwasusanania na muntu wayikile mbuto zage gansi. 27 Geiyombekile, nu gaayukile, mu musi nu mu kindi, mbuto zabalukile nu zasile, nu zakulile lukita lutamenyaga nyenezo. 28 Kubuno bilongo bya kisi bikukolamagia biguma bibinyene, kulinga nsamba, kusila kiguma mu kiguma migili, 29 nu gelile biguma, kazanga kongo abisesile na mwene, kubuno matubulo meika.”
Musumo wa mbuto nkeke anga bunyonyo
30 Atendile lingo bunee: “Bukota bwa Kalaga, tubususanie na kikizi? Aba tubususanie na musumo mukizi? 31 Bwasusanania na mbuto za haradali; gazikuyikwa mu bilongo, nti zili nkeke ku mbuto insania zili mu kisi. 32 Tondo, gazasila kuyikwa, nu kwasa, nti zaba nnene kutinga insania. Nu nti zabika ntabi nnene; nu tuzoni twa mpelela tunavwama kumunwa mu kilimelime kyago.” 33 Abatendaga idagi lya Kalaga ku misumo za nkita ningi zasusanania na wono, abeigisizie lukita lubanavwama kusongolola. 34 Ntatendile nabo geteli misumo; tondo mu lumbisombiso eigisagia beigisibwa bage, bitondo binsania.
Yesu Akubotya Kisoa
35 Mu busi bubo mwigolo, Yesu abatendile bunee: “Tusokazi ku lisilya.” 36 Gabasigile musanganano, bendile nage anga bwabezaga mu bwato. Nu mango maato mabezaga bwigi nage. 37 Kwabede kisoa kinene, nu bimpumi bidibwide mu bwato, nu bwato bwiyede na mazi. 38 Nu We abezaga ku kansinsi ka bwato, eiyombeka ku tulo ga mwigo. Bamuyukizie, nu bamutendile bunee: “Musozi, gatunakua ndi bunakubela bubi?” 39 Gaayukile, azugide kisoa nu atendile ku kitatenge bunee: “Bota! Ikala kibibi:” nu kisoa kyasilile, nu kolile nunse. 40 Kusila ababwide bunee: “Kubuni kumukukua boba? Ndi tamuba na bukatizio?” 41 Bakule boba nunse, nu batendenne bwabobwabo bunee: “Muntu mukizi Wono, aba kisoa nu kitatenge nti bikumwanza?”