Ndi Tamwagalukya Makengelo Meinyu Mabi Nti Mukakua
13
1 Mu nkungu zezo, bantu bamozi bavule kumusambalila musagu wa Bagalilaya, u babo basambikagia Pilato asambika mikila zabo gamozi na zezo za kisansa kyabo. 2 Yesu abakwide bunee: “Ndi mukukengela buno babano bantu ba ku Galilaya babezaga nunse bagi kutinga bango bantu bansania ba ku Galilaya bababazizibwe ku lukita luluno? 3 Nkumubula buno, kilo! Tondo ndi tamwiyania nti mwazike nu inyuwe bansania anga babo. 4 Aba babo bantu ikumi nu kinana balimbilwe na kyindo kinene kya Siloamu nu kyabeitile, ndi mukukengela buno babezaga bagi kutinga bango bantu bansania babezaga mu Yerusalema? 5 Nkumubula buno, ta bubo, tondo ndi tamwiyania nti mwakue nu inyuwe bansania anga babo.” Musumo wa Muti Utakukolama Biguma
6 Kusila, Yesu abeisile lingo musumo wono bunee: “Muntu umozi abezaga na muti wa mutini wabezaga wayikwa mu isoa lyage lya mizabibu. Avule kulonda biguma kugo, tondo ntamonine kena. 7 Nu atendile ku wozo mulangi w'isoa lyage bunee: ‘Lola, kuseli myaka isatu nkuvwaga kulonda tuguma ku wono muti wa mutini, nu nsikumonaga kango kugo. Sindago, kubuni muti wono ukubigia bisogo.’ 8 Tondo wozo muntu amwakwide bunee: ‘Mukota, sigago lingo tanga mu wono mwaka. Niumbe bisogo mu ntungo mwago nu nabike bisogo bisoga bya kuwasia. 9 Embe ku ungo mwaka wakolame ku biguma; nu ndi ta bubo, nti wagusinde.’”
Yesu Akonia Mukikulu Wabezaga Wakumbama Mugongo
10 Yesu abezaga akwigisia mu numba emozi za musanganano ku Busi bumozi bwa Kumunwa. 11 Nu kwabezaga gago mukikulu umozi wabezaga wakitilwe kitunga na musumbu kutukila myaka ikumi nu kinana; abezaga akumbama mugongo nu ntavwamaga kwiyisanania aba kakeke. 12 Yesu, gaamumonineko, amumanine kwage, nu amubwide bunee: “Mukikulu, wakandulwa ku butunga bwobe.” 13 Nu amubikile maboko. Kazanga kongo eisanenne; nu aganwine Kalaga. 14 Tondo mwangati wa numba za musanganano ongilwe, kubuno Yesu onezie muntu ku Busi bwa Kumunwa, u Sabato, nu atendile ku musanganano bunee: “Kuli bindi mutuba bya kukita mulimo, vwazi umpanga mwonibwe mu bibyo bindi, tondo ta mu Busi bwa Kumunwa.” 15 Mukota amwakwide bunee: “Inyuwe bengelezi! Ndi kuli muntu umozi wa kumuli utakukandulaga ngombe zage aba mpunda zage kuzitikya mu mukumba nu kwenda kuzinusia mazi ku Busi bwa Kumunwa, u Sabato? 16 Nu wono mukikulu eli wa kibuti kya Abrahamu, nu akandilwe na Satana ku myaka ikumi nu kinana, ndi tabwatananina buno akandulwe mu kikando kikino mu Busi bwa Kumunwa?” 17 Gaatendaga bitondo bibino, basombi bage bansania babede na nsoni, nu musanganano unsania wabogilebogile ku bitondo bya lutanuno byakitaga.
Musumo wa Kaguma ka Bunyonyo
18 Yesu atendile lingo bunee: “Bukota bwa Kalaga bwasusanania na kikizi? Nu ninabulingimania na kikizi? 19 Bwasusanania na kaguma ka bunyonyo, katolilwe na muntu nu akalekede mu isoa lyage; kasile, nu kabede muti, nu tuzoni twa mu mpelela twikede ku ntabi zako.”
Musumo wa Mugago
20 Yesu atendile lingo bunee: “Kikizi kininalingimania na bukota bwa Kalaga? 21 Bwasusanania na mugago, watolilwe nu wasambikilwe na mukikulu mu byanzi bisatu bya bunga, buno bugali bunsania bugage.”
Mwingilo Mukeke
22 Nu Yesu atingile mu miino minene nu mu miino mikeke, eigisagia, mu kwenda ku Yerusalema. 23 Muntu umozi amubuzizie bunee: “Mukota, ndi babo bonibwa ndi ta beingi tugu?” Ababwide bunee: 24 “Idindikazi mwingile ku mwingilo mukeke nunse. Kubuno nkumubula buno, beingi bakulonda kwingila, tondo tabakubuvwama.
25 Nkungu zemanuke nyene numba nu kwigala lwibi nu inyuwe mwemana kumbuga, mwalinge kukokomona ku lwibi nu kutenda bunee: ‘Mukota, Mukota, twigulile.’ Nu we amwakule bunee: ‘Nsimwizi aba nsizi kumukutukila.’ 26 Nu mukalinga kutenda bunee: ‘Twalide nu twanune lwabusio lwobe, nu uwe wigisizie mu nzila zeitu.’ 27 Tondo amwakule bunee: ‘Nkumubula buno, nsimwizi aba nsizi kuni kumukutukila. Tukazi kwane inyuwe bansania bakiti ba mibi!’ 28 Nu kuko kukaba kulila nu kubuga meinyo, gamukamona ku Abrahamu, ku Isaka, nu ku Yakobo, nu ku balengania bansania mu bukota bwa Kalaga, nu inyuwe mubenyene mukiswa kumbuga. 29 Nu kwavwe bantu kutuka ku lulenge lwa kukutukaga kisongo kya busi, nu ku lulenge lukwiyombekaga ku busi, nu ku lulenge lwa kwikazi kwa kisi nu lwa kwidume kwa kisi, nu beikale ku meza mu bukota bwa Kalaga. 30 Nu lolazi, kuli beli bazinda bakaba batangi nu beli batangi bakaba bazinda.”
Yesu Akulilila Yerusalema
31 Mu nkungu zezo, baFarisayo bamozi bavule ku Yesu nu bamutendile bunee: “Enda, tuka gano, kubuno Herode akulonda kukwita.” 32 Abakwide bunee: “Endazi nu tendazi ku wozo mukala bunee: ‘lelo, nkwimbya basumbu nu nkonia nsambo za bantu lelo nu lubi, nu ku kindi kya bisatu nti nasililizia mulimo wane.’ 33 Tondo bwatunganana niende lelo, lubi nu ndele; kubuno tabwatunganana mulengania kukwila kumbuga kwa Yerusalema.
34 Ee Yerusalema, Yerusalema, ukwitaga balengania, nu ukulibulaga makozi ku babo b'ukusingilagwa. Mambizi manga natundaga kukundamania bana bobe anga bukukundamanagia nkoko bana bage munda mwa byupi byage, nu ntwabuzigile! 35 Ungwililazi; mwasigilwe numba zeinyu zakua na mulali; tondo nkumubula buno, tamukammonako lingo nunse, aaba nu gamukatenda buno ‘Akaswa mponga wozo ukuvwa ku izina lya Mukota.’” a