Kukengelezia Bantu ku Bitondo bya Bwengelezi
12
1 Ku nkungu zezo, musanganano wa bantu tununu na tununu wakundamenne aaba nu babezaga bakunyantana bwabobwabo. Nu Yesu alingile kutenda ku beigisibwa bage bunee: “Lwabusio lwa binsania, idangazi na mugago wa baFarisayo, u bwengelezi. 2 Kubuno takuli kitondo kyampa kyakukidwe kitakokulwa, aba kitondo kyabisilwe kitakabisulwa. 3 Ku bubo, kinsania kimwatendile mu kapilo kikongubwa mu kyengi, nu kinsania kimwatendile mu kutuzi munda mwa masio ma numba kikasambalwa gantata ga mutondo wa numba.” Wozo Watunganana Kukubwa Boba
4 Nkumubula bubuno beinyuwe bilemba byane: tamukue babo bakwita mubili boba. Nu kusila kwa bubo nti tabanavwama kukita bungo. 5 Tondo nkumulolesia nazi u mwatunganana kukua boba. Mukue boba ku wozo ukwita mubili wa muntu, nu eli na magala ma kumwisa mu Jehenamu. Ee, namubula buno wozo u mwatunganana kukua boba.
6 Ndi tuzoni tutano tatunakunzibwa ku binkulumba bibili? Tondo aba kamozi kuto takaneibililwa lwabusio lwa Kalaga. 7 Aba nu nzwili za ku matoe meinyu zaganzilwe insania. Tamukue boba; muli na bukunza bunene nunse kutinga tuzoni twingi.
Kwitabizia Aba Kutuna Yesu Kristo
8 Nkumubula buno, na muntu unsania ukanitabizagia bwasibwasi lwabusio lwa bantu, nti Mwana wa Muntu nu We akamwitabizia lwabusio lwa banzelo ba Kalaga. 9 Tondo wozo ukantunaga lwabusio lwa bantu, nu nne nti nkamutuna lwabusio lwa banzelo ba Kalaga. 10 Nu muntu unsania ukatendaga kitondo kibi kya kusomba Mwana wa Kalaga, akasigililwa, tondo wozo ukalingaga Muuza Wasililila ntakasigililwa.
11 Gabakenda n'inyuwe ku milondo lwabusio lwa numba za misanganano aba lwabusio lwa bangati nu bakota, tamuzangezange nu kukengela buni bumwakule aba buni bumwatende. 12 Kubuno Muuza Wasililila akamwigisia ku nkungu zezo bumwatunganana kutenda.
Musumo wa Mugumi Kikongolo
13 Muntu umozi mu musanganano abwide Yesu bunee: “Musozi, tenda ku mubuto wane buno abeganie ntiko zeitu.” 14 Yesu amwakwide bunee: “Uwe muntu, nazi wambikile kuba ngatu zeinyu aba mulongania wa bikulo byeinyu?” 15 Kusila, ababwide bunee: “Lolazi, mwidange busoga na nkita insania za buliagundu; kubuno kalamo ka muntu takanamoneka ku kabamba ka bikulo byage byingi byeli nabyo.” 16 Nu abeisile wono musumo bunee: “Isoa lya muntu umozi mugumi lyatubwide biguma byingi. 17 Nu eibuzizie mu mutima wage bunee: ‘Buni bunikita? Kubuno nsili na kiziki kya kukundamania matubulo mane mansania?’ 18 Kusila, abwide bunee: ‘Bubuno u bunakite: nasambule bigenge byane bya kubikila matubulo nu nobake bingo binene nunse kutinga bibyo, nu mubyo nakundamanie matubulo mane mansania nu bikulo byane binsania. 19 Nu natende mu mutima wane bunee: “Ee mutima wane, uli na bikulo byingi biwabika isuku ku myaka mingi; umunwa, ulie, unue nu ubogeboge.”’ 20 Tondo Kalaga amubwide bunee: ‘Uwe kikongolo, mu kino kindi kya lelo, kalamo kobe kakutolwa nu bibino biwibikilaga mbiki byabe bya nazi?’ 21 Ububo buli wozo ukwibikila bikulo byage we wenyene, tondo ntabe mugumi ku Kalaga.”
Kulemanina Kalaga
22 Kusila, Yesu abwide lingo beigisibwa bage bunee: “Bubo tamwikutie mu kalamo keinyu buno twalie kikizi? Aba ku mubili weinyu buno twavwale kikizi? 23 Kubuno kalamo katinga idia, nu mubili watinga nsulu. 24 Kengelazi buno tuzoni twa kibombobombo: Tatukuyikaga, aba tatukutubulaga, tatuli na matengu ma kubikila mu matubulo aba bigenge nu Kalaga akutulisagia. Nu inyuwe ndi tamuli basoga nunse kutinga tuzoni! 25 Nazi wa kumuli, ndi ku kitondo kya makengelo mage, anavwama kwitalikila nkungu emozi ku kalamo kage? 26 Umpanga ndi tamunavwama kukita kitondo kikino kikeke nunse, kubuni kumukwikutia na bingo bitondo binsania? 27 Kengelazi buni bukwasa maluba: tamakukita mulimo, aba tamakuluka; tondo nkumutenda buno aba Solomono, mu lutanuno lwage lunsania, ntavwalikizibwe anga limozi lya kumo. 28 Ndi Kalaga akuvwalikya bisugu bya masoa biligo lelo, bubuno, nu lubi biswe mu keiya, ndi ntanamuvwalikya nunse inyuwe bantu beli na bukatizio bukeke. 29 Nu beinyuwe, tamulonde bimwalie nu bimwanue nu tamwikutie kubyo. 30 Kubuno bibino binsania bikulondagwa na bantu batakatizia ba mu kisi, tondo Soinyuwe eizi buno mukwiyanina bibyo. 31 Tondo londazi tanga bukota bwa Kalaga nu nti mwatalikilwe bibino binsania.
Bugumi bwa Mwigulu
32 Tamukue boba, inyuwe kibombo kikeke; kubuno Soinyuwe amonine buno, buli busoga kumukasa bukota. 33 Kunziazi bimuli nabyo nu nti mwakasa bazambi bikulo bimwamona. Ikitilazi nsago za bikulo zitanakunguka, nu isuku litakusila mwigulu, kiziki kitanavwama kwika ku mwibi nu kuko kutanateta kagembe nunse. 34 Kubuno gago geli isuku lyeinyu, u gago lingo gabe mitima zeinyu.
Bakambi Bakulanga Busoga
35 Bibunda byeinyu bikandwe nu tusuku tweinyu tubangibwe. 36 Nu inyuwe, mususanie na bakiti ba mulimo bakulindila mukota wabo kutuka ku kisagulo ky'isonga, buno bamwigulile gaabase nu kuzumia ku lwibi. 37 Mbogimbogi ku bakiti ba mulimo babano bakusangwa bakukesia ntende gakubasa Mukota wabo! Lebelebe nkumubula buno: eiswike mukoma wage nu abeikazie ku meza kulia idia nu avwe kubakitila. 38 Nu ndi abasa ku nkungu za mulangi wa babili aba wa basatu, nu kubasanga kayikayika, nti mbogimbogi ku bakambi babano! 39 Tondo menyazi buno: songo nyene numba anumenyaga nkungu zavwe mwibi, anakesezie ntende, nu ntanasigilide numba zage zisambulwe. 40 Ububo nu inyuwe, mube kayikayika kubuno Mwana wa Muntu akavwa mu nkungu zimutakukengela.”
Mukiti Musoga nu Mukiti Mubi
41 Petro amubuzizie bunee: “Mukota, ndi ukwisa musumo wono kutuli aba ku bantu bansania?” 42 Nu Mukota amubwide bunee: “Nazi wozo mukiti mukatizia nu uli na menge, wabikwa na mukota wage buno abe mwangati wa numba zage nu akasane idia ku bango bakiti ku nkungu zaswagia? 43 Mbogimbogi ku mukiti wozo buno, mu kusubya kwa mukota wage, akasangwa akukita bubuno! 44 Lebelebe nkumubula buno, akamubika mwangati wa byage binsania. 45 Tondo ndi wozo mukiti akengela mwage mu mutima buno, mukota wane eizizia ntasubya. Nu ndi alinga kulibula bango bakiti banyage, bamulume nu bakikulu, nu kulia nu kunua nu kukua na maku, 46 nti Mukota wa wozo mukiti akavwa kitangalabesi mu busi bwatakumukengela nu mu nkungu zatakumenya. Akamusesa byindi byindi nu kumusungia gamozi na batakatizia.
47 Nu wozo mukiti wizi lutundo lwa mukota wage, nu nteibika kayikayika aba ntakita anga buli lutundo lwage, akalibulwa bituto byingi nunse. 48 Tondo wozo utalumenyininne, akitile bitondo byatananina lusungio, ntakalibulwa bubibu, kubuno ku wozo wakasilwe byingi, bakamusega byingi. Nu ku wozo wabikilwa byingi, bakitila kumusega byingi nunse.
Bitondo bya Yesu Bikulekanukya Bantu
49 Navule kwisa keiya ga kisi; nu ninatundile nunse kumona kako keiya kasila kubangibwa! 50 Tondo nili na lututiko lunatunganana kututikwa nalo nu nakandwa nunse aaba galukazindilila. 51 Ndi mukukengela buno navule kubika bubobelelo mu kisi? Nkumubula buno, tabubo, tondo malekanuko. 52 Kubuno kutukila kano kaluma mu numba emozi, bantu batano balekanukibwe, basatu ku lwabo lulenge nu babili ku lwabo lulenge. 53 Isi wa mwana akalekanuka nage nu mwana akalekanuka n'isi; nina wa mukinga akalekanuka na mukinga wage nu mukinga akalekanuka na nina; ninabyala akalekanuka na mukamwana wage, nu mukamwana wage akalekanuka na ninabyala.”
Kusongolola Tulolesio twa Nkiko
54 Nu abwide lingo ku musanganano bunee: “Gamukumonaga ku lutundutundu lwakumpamia igulu kuko kukwiyombekaga kisongo kya busi, kazanga kongo nti mukutenda bunee: ‘mbula zavwa,’ nu nti bubo bwaba. 55 Nu gamukumonaga lumpumpu lwa ku lulenge lwa kwidume kwa kisi lukupupa, nti mwatenda bunee: ‘Kukuba musi mukali’ nu nti bubo bwaba. 56 Bengelezi! Buni bumukumenyaga kusongolola lukita lwa kisi nu lw'igulu; tondo kubuni tamukumenyaga bwisulilwa bwa zeno nkungu?
Kugomia na Basombi Bobe
57 Kubuni tamunavwama kwidongekela mubenyene bubo buli bulili? 58 Gokwenda gamozi na musombi wobe lwabusio lwa ngatu, geleka nunse kwikulumania nage gamukili mu nzila buno anavwa kukubasia lwabusio lwa ngatu, nu ngatu anavwa kukukasana ku mukoloboyo nu wono anavwa kukubika mu kikando. 59 Nkukubula buno ntunatuka kuko, aaba nu gokasililaga kuliga kinkulumba kizinda.”