Yesu Akwigisia Bitondo bya Masego
11
1 Busi bumozi Yesu abezaga akusega mu kiziki kimozi kisiembe. Gaasilile kusega, umozi wa ku beigisibwa bage amubwide bunee: “Mukota, twigisie kusega anga bweigisizie Yoana beigisibwa bage.” 2 Yesu ababwide bunee: “Nkungu zimukusega, tendazi bunee:
‘Tateiswe,
izina lyobe liganunwe,
Bukota bwobe buvwe,
3 Tukase idia lyeitu lya busi na busi,
4 Tusigilile ku bwagi bweitu;
Kubuno nu iswe tukusigilila unsania ukutwagila.
Nu ntutusige kwingila mu malindiko, tondo utonie
ku bubi.’”
5 Abatendile lingo bunee: “Ndi umozi wa kumuli eli na kilemba kyage, nu amwendela munkatini mwa kindi nu kumusega bunee: ‘Kilemba kyane, nkase nsombi za tumpampa tusatu. 6 Kubuno umozi ku bilemba byane ambaside nu we eli mu lugendo, nu nsili na kampa ka kumukasa.’ 7 Nu ndi wozo uli munda mwa numba zage amwakula bunee: ‘Ntunkutie, kubuno nigala lwibi kalazi, nu bana bane beiyombeka kalazi, nsikuvwama lingo kuyuka buno nikukase tumpampa.’ 8 Nkukubula buno aba ndi ntanayuka kumukasa tumpampa kubuno eli kilemba kyage, tondo ku kabamba ka kutalekela kumusega, anayuka nu anamukasa anga bweiyaninaga. 9 Nu nne namubula buno, Segazi, nu nti mwakaswe; londazi nu nti mwamone; kokomonazi nu nti mwigulilwe lwibi. 10 Kubuno muntu unsania wasega nti akaswe, nu wozo walonda nti amone, nu wozo ukukokomona ku lwibi nti eigulilwe. 11 Nazi isi wa mwana kumuli, ndi mwana wage amusega kampampa nu nti amukase ikozi? Aba ndi amusega kyena nti amukase nzoka mu kiziki kya kyena? 12 Aba ndi amusega iyungu, nti anamukasa nkutu? 13 Nu ndi inyuwe bantu babi mwizi kukasa bana beinyu nkaso nsoga, embe lino Soinyuwe uli mwigulu, ndi ntanakasana Muuza Wasililila ku babo bakumusega?”
Yesu nu Belzebuli
14 Yesu abezaga akwimbya musumbu wabezaga kaluma mu muntu. Nu gatukile wozo musumbu mweli, wozo muntu wabezaga kaluma atendile. Nu musanganano wangamine. 15 Tondo bamozi babwide bunee: “Akutikya basumbu ku magala ma Belzebuli, mukota wa basumbu.” 16 Nu bango, bamugelekile, ububo bamusegile kalolesio kakutuka kwigulu. 17 Tondo Yesu amenyaga makengelo mabo nu ababwide bunee: “Na bukota na bukota bwibegania bwobwenyene nti bwabiga; aba na numba na numba zibegania zozenyene nti zagoa. 18 Ndi Satana akwibegania wenyene, buni bunavwama kwemana bukota bwage? Nkutenda bubuno kubuno mukutenda buno, nkwimbya basumbu ku magala ma Belzebuli. 19 Ndi nkwimbya basumbu ku magala ma Belzebuli, bana beinyu bakubeimbia ku magala ma nazi? Ku kabamba kako, bobenyene babe ngatu zeitu. 20 Tondo ndi nne nkwimbya basumbu ku magala ma Kalaga, kasi bukota bwa Kalaga bwavule kumuli.
21 Nkungu zikulanga muntu wa magala numba zage na byuma bya bita kasi nti binsania byeli nabyo bili bulonge bukata. 22 Tondo ndi ungo muntu uli na magala kumutinga abasa nu kumukinda, nti amunyaga ngabo zage insania za bita, zaabezaga akulemanina, nu kulongania binsania byanyagaga.
23 Wozo uteli gamozi na nne nti eli musombi wane; nu wozo utakukundamania gamozi na nne nti akusagula.
Kusubya Kwa Musumbu
24 Gakutuka musumbu mu muntu, akutabanga ku biziki biteli na mazi kulonda ganomuninwa. Nu ndi ntagumona, akutenda buno, nasubye mu numba zane munatukile. 25 Nu gaakubasa, akuzisanga zayagilwa nu zalebibwa busoga. 26 Kusila, nti enda kutola bango basumbu mutubakamo bamutinga ku bubi; nu nti beingila mu zezo numba nu nti beikala muzo. Nu lukita luzinda lwa wozo muntu nti luli lubi nunse kutinga lulo lutangi.”
Mbogimbogi za Bulili
27 Gabezaga Yesu akutenda bubo, mukikulu umozi alalukile n'iyuki inene munkatini mwa musanganano nu amubwide bunee: “Mbogimbogi ku nda zakubutile, nu ku mabele makumomezie.” 28 Tondo Yesu akwide bunee: “Mbogimbogi nunse ku babo bakungwa ku idagi lya Kalaga nu kulyanza.”
Kalolesio ka Yona
29 Gabede musanganano wamukundamanina, alingile kutenda bunee: “Kibuti kikino kili kibuti kibi nunse, kikusega kalolesio, tondo tabakakaswa kango kalolesio, umpanga kako ka mulengania Yona. 30 Kubuno anga bubo bwabezaga Yona kalolesio ku bantu ba ku Ninawe, ububo bukaba Mwana wa Muntu ku kibuti kikino. 31 Mukikulu mukota wa ku lulemge lwa kwidume kwa kisi, akemana ku busi bwa lusungio gamozi na bantu ba kibuti kikino, nu we akabasungia, kubuno avule kutuka kuzinda kwa kisi, buno ongwe ku menge ma Solomono, nu gano geli munene watinga Solomono. 32 Bantu ba ku Ninawe bakemana mu busi bwa lusungio, gamozi na kikino kibuti nu bakakisungia; kubuno beiyanizie ku misako zabo gabongule ku meigisia ma Yona, nu lola, gano geli munene kutinga Yona.
Kyengi kya Mubili
33 Takuli muntu wampa ukubangia itala nu kulibika ku kiziki kyabisama, aba kunsi kwa luzi, tondo akulibika ga kyanikilo, buno bantu bakwingila bamone ku kyengi. 34 Liso lyobe lili itala lya mubili wobe. Nkungu zili liso lyobe lisoga, mubili wobe unsania nti guli mu kyengi; tondo ndi liso lyobe lili ibi, mubili wobe unsania nti guli mu kapilo. 35 Idange busoga buno kyengi kili muguli kinavwa kuba kapilo. 36 Umpanga, ndi mubili wobe unsania guli mu kyengi nu takuli kyindi kyago mu kapilo, nti mubili unsania wabe mu kyengi anga bubo bukusanagia itala na kyengi kyalyo.”
Yesu Akukengelezia baFarisayo nu Basozi ba Milembe
37 Nu gabezaga Yesu eki atenda, muFarisayo umozi amumanine buno ende kulia kwage. Nu Yesu eingide nu eikede ku meza kulia. 38 Tondo wozo muFarisayo angamine gaamonine buno Yesu ntalinga koga lwabusio lwa kulia. 39 Nu Mukota amubwide bunee: “Inyuwe baFarisayo, mukusuga gantata ga kituma nu ga lupepe, tondo munda mweinyu mwiyala na ntundo za bunyagi nu mibi. 40 Inyuwe muli bikongolo! Ndi ta wozo wakitile bya gantata, u wozo wakitile lingo bya munda? 41 Tondo kasanazi nkaso za bibyo bili munda, nu lolazi, binsania nti byabe bisoga kumuli.
42 Tondo kabebe kumuli inyuwe baFarisayo kubuno mukutikya kyindi ky'ikumi kya nsyogo nu kya kinzani, nu kya bisugu binsania, tondo mukusiga bwisanana nu lutundo lwa Kalaga, zezo u zatananina kukita, kuteli kusiga bibyo bingo.
43 Kabebe kumuli baFarisayo kubuno mukutunda bisumbi bili lwabusio mu numba za misanganano nu mukutunda kusekelwa mu masoko. 44 Kabebe kumuli! Kubuno mwasusanania na nsinda zitakumonekako; nu bantu bakutinga gantata gazo geteli kuzimenya.”
45 Nu umozi wa ku basozi ba milembe amubwide bunee: “Musozi, kutenda bubo kuli kutulinga iswe.”
46 Nu Yesu akwide bunee: “Kabebe lingo kumuli inyuwe basozi ba milembe kubuno mukwekya bantu mizigo mizitu zibatanavwama kweka nu inyuwe mubenyene tamukwitubya kuzo aba na munwe weinyu umozi. 47 Kabebe kumuli! Kubuno mukobaka nsinda za balengania, nu basoinyuwe u babeitile. 48 Nu bubo bukulolesia buno mukwitabizia bwakitile basoinyuwe, kubuno bo u beitile balengania nu inyuwe mukobaka nsinda zabo. 49 Ku bubo, menge ma Kalaga mabwide bunee: ‘Nkabasingila balengania nu basingwa; bakeita bamozi kubo nu bakasungia bango,’ 50 buno mikila za balengania bansania zakubukile kutukila kulinga kwa kisi zibe gantata ga kibuti kikino, 51 kutukila mikila za Abeli aaba nu kwika ku mikila za Zekaria, wozo witilwe gasamba kayulo nu numba za kukumbamina. Ee nkumubula bubuno: Zikasubwa gantata ga kibuti kikino.
52 Kabebe kumuli basozi ba milembe, kubuno mwatikizye mutandulwa wa bumenyinino! Tamwingide mubenyene nu mwabigenne babo batundaga kwingila.”